Bəzi televiziya verilişlərinə baxanda adam XXI əsrdə yaşadığını unudur. O qədər cılız, xalq üçün, millət üçün bir zərrə qədər əhəmiyyəti olmayan məsələlərə böyük vaxt ayrılır ki, təəccüblənməyə bilmirsən. Belə verilişlərin bilərəkdən, ya fərqinə varmadan hazırlanması suallar doğurur. Dəhşətlisi bu deyil, tanımış ziyalıların, hüquqşünasların, xeyli sayda sadə insanların belə verilişlərdə iştirakıdır. Görəsən, onlar bu verilişlərdən necə faydalanırlar, hansı ibrət dərsi alırlar? Niyə soruşmurlar ki,-Telli Namiqlə küsülüdür, ya küsülü deyil, kimsə Türkiyədə ərə gedib və yaxud boşanıb-bütün bunların Azərbaycan xalqına nə dəxli var? Falçıların, "görücü"lərin, "cin çıxardan"ların tez-tez ekrana çıxarılması hansı məqsəd güdür? Nədən ölkədə yüzlərlə müzakirəsi vacib məsələləri kənara qoyub, şəxsi ailə-məişət münasibətlərini ictimailəşdirirlər? Mən özünə hörmət edən insanları bu tip verilişlərin iştirakçısı olmaqdan çəkinməyə çağırıram. Ekranda görünmək xatirinə belə verilişlərə çıxmaq heç kəsə şərəf gətirməz. Yüz faiz əmin olun ki, cəmiyyətin böyük əksəriyyəti həmin verilişlərin ekspertlərinə də, adi iştirakçılarına da mənfi münasibət bəsləyirlər. Unutmayın ki, cavabdeh şəxslər sonda sizi günahlandıraraq belə verilişlərin "aşağı zövqlü tamaşaçı"lar üçün hazırlandığını deyirlər. Siz doğrudanmı "aşağı zövqlü tamaşaçı" adını özünüzə yaraşdırırsınız?