Bu gün şəhid gizir Aqil Məlikovun anadan olmasının 31-ci ildönümüdür.
Butov.az AZƏRTAC-a istinadən xəbər verir ki, 1990-cı il avqustun 12-də Masallının Böyük Xocavar kəndində doğulan Aqil Məlikov əsgəri xidməti başa vurduqdan sonra yenidən Azərbaycan Silahlı Qüvvələrində xidmətə qayıtmışdı. Aqilin ən böyük arzusu işğal altında olan torpaqlarımızın erməni tapdağından xilas olunmasında iştirak etmək, üçrəngli bayrağımızı torpaqlarımıza sancmaq idi. Elə bu amal uğrunda da canını fəda edərək şəhidlik zirvəsinə yüksəldi.
Torpağa tapşırıldığı kənd qəbiristanlığında keçirilən anım tədbirində rayon ictimaiyyətinin nümayəndələri, şəhid ailələrinin üzvləri iştirak edib. Tədbirdə çıxış edənlər şəhid Aqil Məlikovun ömür yolundan, döyüş meydanında göstərdiyi şücaətdən danışıblar. Qeyd olunub ki, xidmət etdiyi müddət ərzində onun sayıqlığı sayəsində dəfələrlə düşmənin təxribat qrupunun mövqelərimizə hücumunun qarşısı alınıb. Onun son uğurlu döyüşləri isə 2016-cı ilin aprelində olub. Aqil Məlikov Lələtəpə yüksəkliyinin düşməndən azad olunmasında böyük şücaət göstərib. Lakin elə həmin ilin noyabr ayında Füzuli rayonunun Alxanlı kəndində düşmənin təxribatının qarşısını alarkən qəhrəmancasına şəhid olub.
Ölümündən sonra “Hərbi xidmətdə fərqlənməyə görə” III dərəcəli medalı ilə təltif edilib.