AMEA-nın Məhəmməd Füzuli adına Əlyazmalar İnstitutunda Xurşidbanu Natəvan haqqında bədii-sənədli filmin çəkilişlərinə başlanılıb.

Butov.az xəbər verir ki, bu barədə AZƏRTAC-a AMEA-dan bildirilib. Azərbaycanın görkəmli qadın şairi Natəvanın 190 illik yubileyi ilə əlaqədar hazırlanan filmdə bir sıra görkəmli elm və mədəniyyət xadimləri ilə yanaşı, Əlyazmalar İnstitutunun baş direktoru akademik Teymur Kərimli də məsləhətçi-mütəxəssis qismində çıxış edib. O, çəkiliş qrupuna Azərbaycan mədəniyyətində və ictimai həyatında dərin izlər qoymuş, Qarabağın sonuncu xanı Mehdiqulu xanın yeganə varisi, parlaq istedad sahibi, Şuşada “Məclisi-üns”ün yaradıcısı Xurşidbanu Natəvanın həyat və yaradıcılığı, onun əlyazma irsi haqqında ətraflı məlumat verib. Alim Xan qızının Əlyazmalar İnstitutunda qorunan “Gül dəftəri” adı ilə məşhur olan şeir albomundan da danışıb, şairin öz əli ilə çəkdiyi şəkillərlə bəzədilmiş bu albomun unikal sənət incisi olduğunu qeyd edib.

Qeyd edək ki, Xurşidbanu Natəvana həsr olunmuş filmin ssenari müəllifi Bənövşə Məmmədova, quruluşçu rejissoru Elçin Məmmədov, quruluşçu operatorları Taleh Həsənzadə və Bədəl Bədəlovdur.