22-01-2026, 21:56
Kamran Əsədovun qaynı ona təzyiq edirmiş
Gəncə şəhər Məhkəməsində son qəbul imtahanlarında qanunsuz texniki vasitələrdən istifadə halları ilə bağlı cinayət işi üzrə təqsirləndirilən təhsil eksperti Kamran Əsədov və tarix müəllimi Gündüz Abbasovun cinayət işi üzrə növbəti məhkəmə prosesi keçirilib.
Hakim Elçin Məmmədovun sədrliyi ilə keçirilən prosesdə şahidlərdən bəziləri ifadə verib.
Proses təxminən 3 saatdan artıq davam edib.
Məhkəmədə şahid qismində tanınan G. Quliyeva ifadə verib. O, Gündüz Abbasovu yox, amma Kamran Əsədovu tanıdığını bildirib.
İfadəsində qeyd edib ki, övladı buraxılış imtahanından az bal toplayıb. K. Əsədovu ekspert kimi tanıdığını və ondan övladının kollecə qəbul olmasında kömək istədiyini deyib. K. Əsədov isə öz növbəsində kömək edəcəyini, hətta, universitetə qəbul olacağını bildirib.
Bunun müqabilində K. Əsədova 15 min manat ödəyib.
G. Quliyeva eyni zamanda K. Əsədovun köməkçisi olan Bəhmən adlı şəxsin ona məhkəməyə getməməsi üçün təsir etdiyini də deyib. Ona vatsap mesajlaşma proqramı vasitəsilə səs yazısı atdığını bildirib. Hakim G. Quliyevadan səs yazısını təqdim edilməsini istəyib.
O əlavə edib ki, sonradan verdiyi pulu geri istəsə də, K. Əsədov məbləği qaytarmaqdan imtina edib.
Lakin qadın ibtidai istintaqa çağırıldıqdan sonra K. Əsədov 15 min manatı geri qaytarıb.
Daha sonra Bəhmən Hüseynli hakimə ifadə verib.
Onun şahidlərə hansı səbəbdən təsir etdiyi soruşulub, lakin B. Hüseynli hakimin sualına tam cavab verə bilməyib.
Bundan sonra B. Hüseynlidən avadanlıqların kimin vasitəsilə hazırlandığı və necə quraşdırılması soruşulub. O bildirib ki, avadanlıqların mahiyyətini bilməyib, həmin şəxslərin K. Əsədovun ofisində məşq etdiyini görüb. O bildirib ki, kürəkəninin pul almasına şahidlik etməyib.
Məlumat üçün bildirək ki, B. Hüseynli K. Əsədovun qaynıdır.
Qeyd edək ki, növbəti məhkəmə prosesi sabah saat 14:00-a təyin olunub.
22-01-2026, 19:33
Prezidentin ailəsi Trampla birgə - FOTO
Leyla Əliyeva Prezident İlham Əliyevlə Amerika Birləşmiş Ştatlarının Prezidenti Donald Trampın görüşündən fotolar paylaşıb.
22-01-2026, 18:00
Masazırda ev yandı - 1 nəfər öldü
Abşeron rayonu, Masazır qəsəbəsində yanğın olub.
Hadisə yerinə FHN-nin Dövlət Yanğından Mühafizə Xidmətinin qüvvələri cəlb edilib. Yanğının yayılmasının qarşısı alınıb və qısa müddətdə söndürülüb. 1978-ci il təvəllüdlü Nigar Eminbəylinin meyiti çıxarılaraq təhvil verilib.
22-01-2026, 17:46
YAP Veteranlar Şurası toplaşdı - Mehdiyevin məsələsinə baxıldı?
Yeni Azərbaycan Partiyasının Veteranlar Şurasının bugünkü iclasında Ramiz Mehdiyevin üzvlükdən xaric edilməsi məsələsi müzakirə edilməyib.
Bunu Milli Məclisin Aqrar siyasət komitəsinin sədri, YAP Veteranlar Şurasının üzvü Tahir Rzayev bildirib.
"Veteranlar Şurasının bu gün keçirilən iclasında əsasən 2025-ci il ərzində görülmüş işlərə dair hesabat dinlənilib. İclasda il ərzində təşkil olunan tədbirlər, veteranların müxtəlif görüş və tədbirlərdə iştirakı ilə bağlı məsələlər müzakirə edilib.
Eyni zamanda, 2026-cı il üçün nəzərdə tutulan fəaliyyət planı müzakirə olunaraq təsdiqlənib. Şuraya yeni üzvlərin qəbulu və ya üzvlükdən xaric edilmə ilə bağlı hər hansı müzakirə aparılmayıb.
İclas zamanı veteranlar gündəlikdəki məsələlərlə bağlı fikirlərini bölüşüb, ölkə başçısının həyata keçirdiyi siyasəti dəstəklədiklərini vurğulayıb, əldə olunan nailiyyətlərə münasibət bildiriblər. Bununla yanaşı, qarşıda duran vəzifələr və gələcək fəaliyyət istiqamətləri barədə də fikir mübadiləsi aparılıb",-T.Rzayev deyib.
22-01-2026, 17:38
Qurban Qurbanovun 500-cü qələbəsi
Qurban Qurbanov baş məşqçi karyerasında 500-cü qələbəni qazanıb.
“Qarabağ”ın təcrübəli çalışdırıcısının yubileyi Çempionlar Liqasının Liqa mərhələsinin VII turuna təsadüf edib.
Azərbaycan çempionu “Ayntraxt”la (Frankfurt, Almaniya) ev matçında 3:2 hesabı ilə qalib gəlib. Bu, “Qarabağ”ın Qurbanovun baş məşqçiliyi dövründə 471-ci qələbəsi olub.
Mütəxəssis “Neftçi”də 25, Azərbaycan milli komandasında 4 qələbədə pay sahibi olub. Klub karyerasındakı 496 qələbədən 364-ü Premyer Liqa, 54-ü ölkə kuboku, 78-i avrokuboklarda qeydə alınıb. Mütəxəssisin 500-cü qələbəsi karyerasındakı 857-ci matça təsadüf edib. O, komandaları ilə keçirilən oyunların 58,34 faizində qalib gəlib.
Qeyd edək ki, Qurbanov baş məşqçi kimi ilk qələbəsini 2006/07 mövsümündə “Neftçi”nin “sükanı arxası”nda əldə edib. 2006-cı il avqustun 6-da “Gənclərbirliyi”ni qəbul edən paytaxt təmsilçisi böyük hesabla qalib gəlib – 6:1.
22-01-2026, 10:38
Yeni dünya reallıqları və
Azərbaycanın strateji mövqeyi
Azərbaycan Respublikasının Prezidenti cənab İlham Əliyevin 20 yanvar 2026-cı ildə Davosda “Euronews” televiziyasına verdiyi müsahibə müasir beynəlxalq münasibətlər sistemində baş verən fundamental dəyişikliklər fonunda Azərbaycanın tutduğu prinsipial mövqeni və formalaşdırdığı uğurlu strateji xətti bir daha aydın şəkildə ortaya qoydu. Dövlət başçısının fikirləri həm qlobal siyasi reallıqların düzgün təhlili, həm də milli maraqlara əsaslanan praqmatik siyasətin nəticələri baxımından xüsusi əhəmiyyət daşıyır.
Prezident İlham Əliyev vurğuladı ki, beynəlxalq hüquq normaları artıq dünya ictimaiyyətinin bütün üzvləri üçün mütləq meyar kimi qəbul edilmir. Məhz bu səbəbdən Azərbaycan öz strateji məqsədlərini milli maraqlar əsasında müəyyən edib və bütün addımlarını beynəlxalq hüquqa tam uyğun şəkildə atıb. Ölkəmizin siyasi inkişafı, suverenliyinin və ərazi bütövlüyünün bərpası həm hüquqi əsaslara, həm də ümumbəşəri dəyərlərə söykənib. Bu yanaşma yeni formalaşan beynəlxalq münasibətlər sistemində Azərbaycanın mövqeyini daha da möhkəmləndirib. Prezidentin qeyd etdiyi kimi, bu gün dünyada vəziyyəti artıq qanunun aliliyi deyil, güc amili müəyyənləşdirir və belə bir şəraitdə hər bir dövlət öz potensialına uyğun siyasət yürütməli, regional və qlobal müstəvidə mümkün qədər çox ölkə ilə sağlam münasibətlər qurmalıdır. Azərbaycan bu strategiyanın uğurlu nümunəsini ortaya qoyub.
Müsahibədə dövlət başçısı “Zayed İnsan Qardaşlığı Mükafatı”na layiq görülməsini də xüsusi məmnunluqla qeyd etdi. Bu mükafatın Qafqazda onilliklər boyu davam edən münaqişə və qan tökülməsindən sonra sülhün bərqərar olunmasına yönəlmiş səylərə verilən yüksək qiymət olduğunu bildirdi. Prezident İlham Əliyev vurğuladı ki, Cənubi Qafqaz bu gün yeni inkişaf mərhələsinə qədəm qoyur və region artıq aylar ərzində sülh şəraitində yaşayır. Azərbaycan və Ermənistan arasında münasibətlərin əməkdaşlıq müstəvisinə keçməsi, nəqliyyat və enerji sahəsində məhdudiyyətlərin aradan qaldırılması hər iki ölkə üçün qarşılıqlı fayda yaradır. Dövlət başçısının fikrincə, hökumətlərin və vətəndaş cəmiyyətinin birgə səyləri nəticəsində Qafqazda uzunmüddətli deyil, əbədi sülhə nail olmaq mümkündür və Azərbaycanın əsas məqsədi də məhz budur.
Prezident İlham Əliyev ölkə daxilində sabitliyin möhkəm əsaslara söykəndiyini xüsusi olaraq vurğuladı. Bildirildi ki, Azərbaycanda daxili təhlükəsizliklə bağlı potensial risklər mövcud deyil və bütün mümkün təhdidlər xarici amillərlə əlaqəlidir. Bu baxımdan regionda, xüsusilə də qonşu ölkələrdə sabitliyin qorunması Azərbaycanın daim diqqət mərkəzindədir. Dövlətimizin başçısı sülh və sabitliyin hər bir ölkə üçün uğurun yeganə yolu olduğunu qeyd edərək, müharibənin ağır nəticələrini yaşamış Azərbaycan üçün bu anlayışların xüsusi dəyər daşıdığını bildirdi. Enerji bazarındakı vəziyyətə toxunan cənab Prezident neft qiymətlərinin sabitliyini müsbət amil kimi dəyərləndirdi və bunun həm istehsalçılar, həm də istehlakçılar üçün proqnozlaşdırılan gələcək baxımından vacib olduğunu qeyd etdi.
Müsahibədə Azərbaycanın enerji sahəsindəki unikal mövqeyi də geniş şəkildə diqqətə çatdırıldı. Prezident İlham Əliyev bildirdi ki, Azərbaycan Cənubi Qafqazda enerji ehtiyatlarına malik olan və digər ölkələrə neft və qaz ixrac edən yeganə dövlətdir. Bu gün 16 ölkəyə, o cümlədən Avropa İttifaqının 10 üzv dövlətinə təbii qaz ixrac edən Azərbaycan boru kəməri qazının coğrafi əhatəsinə görə dünyada lider mövqedədir. Müasir nəqliyyat infrastrukturu, geniş boru kəməri şəbəkəsi və zəngin resurslar ölkəmizə Avropanın enerji təhlükəsizliyinin gücləndirilməsində etibarlı tərəfdaş olmaq imkanı yaradır. Eyni zamanda, bu əməkdaşlıq Azərbaycan üçün də yüksək gəlirli bazarlara çıxış deməkdir.
Prezident İlham Əliyev Avropa Parlamentinin Azərbaycana qarşı uzun illərdir davam edən qərəzli mövqeyinə də münasibət bildirdi. Dövlət başçısı qeyd etdi ki, rəsmi Bakı artıq bu cür tənqidlərə reaksiya vermir və Avropa Parlamenti ilə əməkdaşlıq dayandırılıb. Azərbaycan Avropa Komissiyası ilə konstruktiv əməkdaşlığı davam etdirməklə kifayətlənir. Prezident vurğuladı ki, Ermənistanın belə Azərbaycanla münasibətləri müsbət dəyərləndirdiyi bir vaxtda, Avropa Parlamentinin ittihamları məntiqsiz və ədalətsiz görünür. Ağ Evdə Azərbaycan və Ermənistan arasında sülh müqaviləsinin paraflanması regionda yaranmış yeni reallıqların bariz göstəricisidir.
Prezident İlham Əliyevin Davosdan dünyaya ünvanladığı bu mesajlar bir daha göstərdi ki, Azərbaycan müasir qlobal çağırışlar fonunda müstəqil siyasət yürüdən, regional sabitliyin və beynəlxalq əməkdaşlığın fəal tərəfdarı olan güclü dövlətdir. Milli maraqlara əsaslanan bu xətt ölkəmizin gələcək uğurlarının əsas təminatıdır.
Məmmədağa Orucəliyev
“Qobu” qəzetinin baş redaktoru
22-01-2026, 08:47
DOST Mərkəzindəki
dostlar
Neçə illərdir ki, adət etdiyimiz bürokratiya, süründürməçilik, bəzi hallarda məmur özbaşınalığı və kobudluğu ilə üzləşməmək üçün idarə və müəssisələrə ayaq basmamağa çalışırdım. Fəqət qocalıq məni qeydiyyatda olduğum Yasamal rayonundan 1 saylı Bakı DOST mərkəzinə sürüdü. Sənədlərimi də götürüb giriş qapısına yaxınlaşdım. Mühafizəçilər ədəb-ərkanla qeydiyyat masasına yönəltdilər. Yaxınlaşdım, gəlişimin səbəbini öyrənib oradan da pensiya masasına yönləndirdilər. Aparıcı mütəxəssis Brilyant Yusif qızı Hacıyeva problemimi diqqətlə dinləyib, bütün suallarıma mükəmməl cavab verdi. Pensiyamın yenidən hesablanması üçün lazım olan sənədlərin siyahısını da yazıb mənə verdi ki, unutmayım. Məmnuniyyətlə çıxıb getdim. Qeyd olunan sənədləri toplayıb bir müddətdən sonra ienə Mərkəzə gəldim.
“DOST könüllüləri”-Elmira Eyvazova, Şəfəq Abbasova, Sevinc Bayramova, adını bilmədiyim daha neçə-neçə könüllülər yaxınlaşıb növbə nömrəmi soruşur, yer göstərib əyləşdirməyə çalışaraq darıxmağa imkan vermirlər. Növbəm bu dəfə də Brilyant Hacıyevanın masasına düşdü. Bu səfər keçən dəfəkindən də çox mehribanlıq göstərdi. O qədər ləyaqətli, səmimi, xoş rəftar etdi ki, elə bildim öz doğmalarımdan biridir. Düzdü bu dəfə də nəsə çatışmırdı, yenidən bura qayıtmalı olacaqdım. Amma bu vaxta qədər heç bir idarədə, heç bir dövlət qurumunda insanlara qarşı belə humanist yanaşma, diqqət, nəzakətli davranış görmədiyimdən burda gördüklərim məni çox təsirləndirmişdi. Brilyanta burda görüb müşahidə etdiklərimdən, onun yüksək peşəkarlıqla, ləyaqətlə xidmətindən yazı yazmaq istəyimi bildirdim. Minnətdarlığını bildirərək, nəzakətlə imtina etdi, istəmədi. Mərkəzin rəhbərliyinə xidmətdən razılıq məktubu yazıb, vətəndaş məmnuniyyətinə görə, Brilyant Hacıyevaya təşəkkür elan etməsini xahiş etdim.
Sonralar müxtəlif məsələlərlə bağlı dönə-dönə bura gəlsəm də, təşəkkürlə bağlı müraciətimin nəticəsinin nə olduğunu bilmədim, amma onu bildim ki, 1 saylı DOST Mərkəzində hamı müraciət edən vətəndaşlara dost münasibəti göstərir. Elə ona görə də bu barədə yazmaq qərarımı qətiləşdirdim. Niyətimi "Dayanıqlı və Operativ Sosial Təminat Agentliyi"nin (DOST) İctimaiyyətlə əlaqələr və kommunikasiya departamentinin müdiri Şahin Əliyevə bildirdim. İnformasiya əldə etməyimizə heç bir problem olmadığını bildirdi. Beləliklə vətəndaşların xatirəsində yaxşı iz buraxan DOST-çu dostlarla daha yaxından tanış olduq:
Əliyeva Elza Fəqan qızı Salyan şəhərində anadan olub. Ali təhsilini sosial iş ixtisası üzrə yüksək göstəricilərlə bitirib. Əmək fəaliyyətinə müxtəlif təşkilatlarda eyni zamanda DOST Mərkəzlərində könüllülük fəaliyyəti ilə başlayıb. 3 ilə yaxındır ki, 1saylı Bakı DOST Mərkəzində çalışır. Fəaliyyəti dövründə vətəndaşlara sosial xidmətlərin göstərilməsi, həssas əhali qrupları ilə iş və vətəndaşlara xidmət sahəsində aktiv iştirak edir.
İmaməliyeva Aytəkin Aydın qızı Sumqayıtda anadan olub. 2019-cu ildə orta məktəbi bitirib Bakı Slavyan Universitetinin Beynəlxalq münasibətlər ixtisasına qəbul olunub. 2023-cü ildə bakalavr təhsilini tamamlayaraq Abşeron DOST Mərkəzində könüllü fəaliyyətə başlayıb. Könüllü fəaliyyəti başa çatdıqdan sonra- 2023-cü ilin noyabrında monitorinq şöbəsində iki ay müddətində təcrübəçi kimi fəaliyyət göstərib. 1 iyul 2024-cü ildən 1 saylı Bakı DOST Mərkəzinin Xidmətlər şöbəsində referent vəzifəsində çalışır.
Əslində burda çalışanların birini digərindən çox da fərqləndirmək olmur. Çünki hamısının ümdə vəzifəsi vətəndaş məmnuniyyətini təmin etməkdir.
1 saylı Bakı DOST Mərkəzinin Xidmətlər şöbəsinin müdiri Elsevər Cabbarov bildirdi ki, Mərkəz 9 may 2019-cu ildən bəri gün ərzində təxminən 400-450 nəfərə xidmət göstərməklə fəaliyyət göstərir. Vətəndaşlara “bir pəncərə” prinsipi ilə məşğulluq, pensiya, sosial müavinət və təqaüdlər, sosial xidmətlər, əlillik, tibbi-sosial ekspertiza və reabilitasiya, sosial sığorta, əmək münasibətləri, həmçinin sosial-hüquqi, sosial-məişət xidmətləri, sosial-pedaqoji xidmət olmaqla, ümumilikdə 162 adda xidmət göstərilir. Mərkəzdə “Könüllü DOST” proqramı üzrə 50 nəfərədək könüllü fəaliyyət göstərir.
Şöbə müdiri xidmət barədə məlumat verdikdən sonra əsas qəhrəmanımız Brilyant Hacıyevanı dinlədik.
Bildirdi ki, Tərtər rayonunda doğulub. Bakı Dövlət Universitetinin Coğrafiya fakültəsini bitirib. BDU-da Təhsildə qiymətləndirmə və monitorinq üzrə magistratura təhsilini başa vurduqdan sonra könüllülük fəaliyyətinə başlayıb. Bir neçə təcrübə proqramına qoşulub. Bütün mərhələləri uğurla keçəndən sonra burda işə dəvət olunub. İki ilə yaxındır pensiyaçıların, sosial cəhətdən həssas təbəqələrin nazını çəkə-çəkə, onlara qayğı göstətə-göstərə özünə hörmət-izzət, sevgi, sayğı, çalışdığı quruma isə nüfuz, etimad, etibar qazandırır. Bu missiyasını davam etdirməkdən zövq alır. Deyir ki, bu iş mənim üçün çox maraqlı, mənalı bir işdir, həm də insanlara qanunauyğun istiqamət vermək, müşküllərini həll etmək mənim üçün həqiqi bir missya oldu. Bu sahədə fəaliyyət göstərməkdən çox şadam. Həm DOST Mərkəzinin prinsipi olaraq, həm də Prezidentimizin buyurduğu kimi, vətəndaşların sosial rifahı, məmnunluğu bizim öncəliyimiz, əsas prioritetimizdir.
Mərkəzdə görüşümüz əsnasında 18-20 yaş arası könüllülərin əhatəsində Ağayeva Lyudmila Ağa qızı diqqətimizi çəkdi. Sən demə 74 yaşlı Lyudmila xanım “Gümüşü könüllü”dür. Deyir ki, 46 il biologiya müəllimi işləmişəm. Pensiya kartımın vaxtı bitmişdi, müddəti uzatmaq üçün Kapital Banka getmişdim, bura yolladılar. Gəldim, qızların pərvanə kimi hərləndiklərini gördüm, xoşuma gəldi, maraqlandım ki, məni də bura götürərlərmi?!
Sağolsunlar götürdülər. İndi də “Gümüşü könüllü” olaraq gəlib gedirəm. Burda bu gözəl balalarla tərbiyəvi mövzuda söhbətlər edirik. Həyat təcrübəmlə bağlı onları maraqlandıran suallara cavab verirəm. Bir aydır fəaliyyətə başlamışam. Davam etmək fikrindəyəm.
Bəli həyat davam edir. Biz də işinə ləyaqətlə, peşəsinə sədaqətlə, vətənimizə, dövlətimizə şərəflə xidmət edən hər kəsə uğur arzulayırıq!
Tamxil ZİYƏDDİNOĞLU,
“Bütöv Azərbaycan” qəzetinin baş redaktoru,
Fotolar Vəfalı Qasımovundur.
22-01-2026, 00:56
Azərbaycan futbolu adına çox sevinirəm - Qurban Qurbanov
"Qələbə münasibəti ilə azarkeşlərimizi təbrik edirəm. Bu qalibiyyət onların haqqı idi. Belə soyuq havada komandaya dəstək oldular".
Bunu "Qarabağ"ın baş məşqçisi Qurban Qurbanov mətbuat konfransında deyib.
"Bəlkə də azarkeşlər bu qələbəni bizdən çox istəyirdilər. Təbii ki, futbolçularımı da təbrik edirəm. Meydanda intizamlı oyun var idi. Hətta, deyərdim ki, bəzi matçlarda görmədiyimiz intizamı gördük. Azərbaycan futbolu adına çox sevinirəm", - o qeyd edib.
22-01-2026, 00:53
Mən sehrbaz deyiləm...
Çox məyusuq. Erkən qol buraxdıq.
Bu sözləri Almaniyanın “Ayntraxt” komandasının müvəqqəti baş məşqçisi Dennis Şmitt UEFA Çempionlar Liqasının liqa mərhələsinin VII turunda Bakıda "Qarabağ"a 2:3 hesabı ilə məğlub olduqları oyundan sonra təşkil olunan mətbuat konfransında deyib.
O, birinci qoldan sonra komandasının toparlandığını bildirib: "Fasilədə müəyyən danışıqlarımız oldu. Taktiki dəyişikliklər etdik:
"Qarabağ" hesabı bərabərləşdirənə qədər üstün idik. Amma rəqib də hücumlar edirdi. Bu matçı analiz edib, qarşıdakı görüşlərə daha yaxşı hazırlaşacağıq. Az vaxtımız var idi, oyunçular meydanda can qoydular, amma bir səhv hər şeyi dəyişdi. Bilirəm ki, futbolçular psixoloji olaraq yaxşı vəziyyətdə deyil. Lakin komandanın yaxşı potensialı var. Nəzərə almaq lazımdır ki, itkilərimiz də var idi. Mən sehrbaz deyiləm".
22-01-2026, 00:49
İlham Əliyev "Qarabağ"ı TƏBRİK ETDİ
Azərbaycan Prezidenti İlham ƏlTƏBRİKiyev "Qarabağ" klubunu UEFA Çempionlar Liqasının əsas mərhələsinin VII turunda Almaniyanın "Ayntraxt" klubu üzərində 3:2 hesablı qələbə qazanması münasibətilə təbrik edib.
İlham Əliyev bu barədə sosial şəbəkə hesabında paylaşım edib.
"Çempionlar Liqasının əsas mərhələsində "Ayntraxt" komandası üzərində parlaq qələbə qazanması münasibətilə Qarabağ futbol klubunu ürəkdən təbrik edirəm! Hakimin ədalətsiz və qərəzli qərarlarına baxmayaraq, haqq-ədalət öz yerini tapdı. Birinci dəfə deyil ki, UEFA tərəfindən təyin edilən hakimlər ədalətsiz və qərəzli qərarları ilə Qarabağın qələbə yolunu kəsməyə çalışırlar. Ümid edirəm ki, UEFA bu hakimin kimin tərəfindən təyin olunmasına aydınlıq gətirəcək. Ədaləti və əyilməz ruhu məğlub etmək mümkün deyil. Yaşasın Qarabağ!".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!