27-02-2026, 21:03
Pakistanla Əfqanıstan niyə döyüşür?
Pakistan və Əfqanıstan arasında münasibətlər son günlər kəskin şəkildə gərginləşib. Rəsmi İslamabad və Kabilin açıqlamasına görə, Pakistan ötən gecə Əfqanıstan ərazisində hava zərbələri endirib, Talibanın hərbi postları və sursat anbarları hədəfə alınıb.
Bu addımın Əfqanıstan tərəfinin Pakistan sərhəd qüvvələrinə hücumundan sonra atıldığı bildirilib. Pakistanın müdafiə naziri vəziyyəti “açıq müharibə” adlandırıb.
Pakistan uzun illər Talibanı dəstəkləsə də, 2021-ci ildə onların hakimiyyətə qayıdışından sonra münasibətlər gözlənildiyi kimi inkişaf etməyib. İslamabad iddia edir ki, “Təhrik-e-Taliban Pakistan” (TTP) qruplaşmasının rəhbərliyi və döyüşçüləri Əfqanıstan ərazisində sığınacaq tapır və Pakistana qarşı hücumlar həyata keçirirlər. Kabil isə bu ittihamları rədd edir və əksinə, Pakistanı İŞİD döyüşçülərinə sığınacaq verməkdə suçlayır.
Son aylarda sərhəddə toqquşmalar və keçid məntəqələrinin bağlanması ticarətə və hərəkətə ciddi təsir göstərib. Pakistan tərəfi 2024-cü ilin sonundan bəri ölkədə baş verən bir sıra terror aktlarının Əfqanıstanla əlaqəli olduğunu bildirir. Bajaur bölgəsində 11 təhlükəsizlik əməkdaşının və iki mülki şəxsin ölümü ilə nəticələnən son hücuma görə məsuliyyəti TTP üzərinə götürüb.
Analitiklər hesab edir ki, Pakistan hərbi əməliyyatları genişləndirə bilər. Talibanın canlı qüvvəsi təxminən 172 min nəfər olsa da, Pakistan ordusunun 600 mindən çox aktiv şəxsi heyəti və güclü hava qüvvələri var. Pakistan nüvə silahına malikdir.
27-02-2026, 20:50
Taliban qaydaları qadınları təhlükəyə atır – XƏBƏRDARLIQ
Talibanın tətbiq etdiyi qaydalar Əfqanıstanda qadınların və uşaqların həyatını təhlükə altına qoyur.
Bu barədə Əfqanıstan üzrə BMT-nin Xüsusi Məruzəçisi Riçard Bennet məlumat verib.
Onun sözlərinə görə, qadınlar xəstəxanaya müraciət edərkən kişi qəyyumun müşayiəti, geyim qaydalarına riayət və kişi həkim tərəfindən müayinə kimi tələblərlə üzləşir. Bəzi hallarda qadınlara kişi müşayiəti olmadığı üçün təcili yardım xidməti göstərilmir.
Bennetin BMT İnsan Hüquqları Şurasına təqdim etdiyi hesabatda bir qadının tək olduğu üçün xəstəxana qapısında doğuş etdiyi, başqa bir qadının isə övladını xəstəxanaya apara bilmədiyi üçün itirdiyi qeyd olunub.
Ekspert bildirib ki, qadınların tibbi təhsilinə qoyulan qadağa gələcəkdə qadın həkimlərin sayını azaldacaq və bu, səhiyyə sistemini daha da zəiflədəcək.
Əfqanıstanın sabiq səhiyyə naziri Suraya Dalil isə doğuş zamanı ana və uşaq ölümlərinin arta biləcəyi ilə bağlı narahatlığını ifadə edib.
27-02-2026, 20:05
Şamaxıda 3-cü ZƏLZƏLƏ
Şamaxı rayonunda yenidən zəlzələ qeydə alınıb.
Bu barədə Azərbaycan Milli Elmlər Akademiyası nəzdində Respublika Seysmoloji Xidmət Mərkəzi məlumat yayıb.
Bildirilib ki, maqnitudası 3,3 olan zəlzələ yerli vaxtla saat 19:12-də qeydə alınıb.
Zəlzələlərin Tədqiqatı Bürosunun məlumatına əsasən, zəlzələ ocağının dərinliyi 9 kilometr olub və hiss edilməyib.
16:00
Azərbaycan Milli Elmlər Akademiyası nəzdində Respublika Seysmoloji Xidmət Mərkəzindən Fövqəladə Hallar Nazirliyinin Böhran Vəziyyətlərində İdarəetmə Mərkəzinə daxil olmuş məlumata əsasən, 27.02.2026-cı il tarixində yerli vaxtla saat 15:52-də Şamaxı rayonunda 4.7 maqnituda zəlzələ qeydə alınıb.
Bu barədə FHN-dən məlumat verilib.
Zəlzələ episentrdə 5 bala yaxın, ətraf rayonlarda 3-4 bala yaxın hiss olunub.
Zəlzələ nəticəsində dağıntı və ya insan xəsarəti barədə bu vaxtadək Fövqəladə Hallar Nazirliyinə məlumat daxil olmayıb.
***
16:02
Şamaxıda 5 bal gücündə zəlzələ olub.
Bu barədə Respublika Seysmoloji Xidmət Mərkəzindən bildirilib.
Məlumata görə, zəlzələ episentrdə 5 bala yaxın, ətraf rayonlarda 3-4 bala yaxın hiss olunub.
***
Azərbaycanda zəlzələ olub.
Bu barədə Respublika Seysmoloji Xidmət Mərkəzindən bildirilib.
Qeyd edilib ki, zəlzələ yerli vaxtla 15:52-də Şamaxıda baş verib.
13 km dərinlikdə baş verən zəlzələnin maqnitudası isə 4,7-dir.
27-02-2026, 19:52
Həkim pasiyentin 151 min manat pulunu ələ keçirdi
Bakıda fəaliyyət göstərən "EMV Dent" klinikasında diş həkimi işləmiş 1972-ci il təvəllüdlü Şərur rayon sakini Elşən Musa oğlu Zaxarov pasiyentinə özünü klinikanın sahibi kimi təqdim edib, onun külli miqdarda pulunu ələ keçirib.
O, dişlərini müalicə etdiyi Tahir Əhmədağa oğlu Hüseynovla müalicə dövründə yaxın münasibətlər yaradıb. Hüseynovun etibarını qazanıb, implant, rentgen və "Skaner Catcam" aparatları alınmasına şərikli vəsait qoyduqları halda yaxşı qazanc əldə edəcəkləri barədə ona yalan məlumat verib.
Zərərçəkmiş şəxsi inandırdıqdan sonra 29 noyabr 2023-cü ildə işlədiyi "EMV Dent" klinikasındakı xidməti otağında bu adla Tahir Hüseynovdan ümumilikdə 151 min manat alıb və mənimsəyib.
İstintaq orqanı tərəfindən Elşən Zaxarovun barəsində Cinayət Məcəlləsinin 178.2.3-cü (külli miqdarda ziyan vurmaqla dələduzluq törətmək) maddəsi ilə ittiham elan edilib.
Məhkəmədə E.Zaxarov ittiham üzrə özünü təqsirli bilməyib. Bildirib ki, digərləri də onu aldatdığı üçün başına bu hadisələr gəlib:
"Onlar mənə Rusiyaya sanksiyalar tətbiq edildiyindən implantların həmin ölkədə daha tez satıla biləcəyini dedilər. Buna görə bütün malları həmin ölkəyə yolladım və bir müddət sonra maraqlananda onların yoxa çıxdığını gördüm. Həmin şəxsləri tapdım, onların yanına getdikdə mübahisələrimiz yarandı, dava zamanı diz qapağımı vuraraq sındırdılar. İmplantları Rusiya ərazisinə göndərməyimdən zərərçəkmişin məlumatı olmayıb".
Məhkəmədə təqsirləndirilən şəxsin ibtidai istintaq zamanı verdiyi ifadəsi açıqlanıb.
Həmin ifadədə müttəhim Tahirdən 151 min manat pul aldığını təsdiqləyib:
"Pulların hamısını Nərimanov rayonunda "Metropark"la üz-üzə yerləşən "EMV dent" klinikasında iş otağımda götürmüşəm. Məqsədim implant alıb-satıb, qazanc əldə edərək Tahirlə yarı bölmək olub".
Zərərçəkmiş də məhkəmədə qeyd edib ki, onlar Elşənlə hər implanta görə qazancı böləcəklərinə razılaşıblarmış...
Bakı Ağır Cinayətlər Məhkəməsinin hökmü ilə Elşən Zaxarov 6 il 6 ay müddətə azadlıqdan məhrum olunub.
Zərərçəkmiş şəxsin mülki iddiası qismən təmin edilib. 151 min manat maddi ziyanın və 444 manat dövlət rüsumunun mülki cavabdeh şəxsdən tutularaq zərərçəkmişə ödənilməsi qərara alınıb. O, təqsirləndirilən şəxsə qarşı 154 min manat mülki iddia qaldırıbmış.
Zərərçəkmiş və müttəhimin apellyasiya şikayətləri təmin olunmayıb.
Qeyd edək ki, Elşən Zaxarov diş həkimi kimi sosial şəbəkələrdə də aktiv olub. Paylaşımlarda Azərbaycanda ilk ağrısız, kəsiksiz, qansız və ən əsası, şəkər xəstələrinə də icra oluna bilən implant dişlərin düzəldilməsi barədə məlumatlar verib.
Həmçinin sosial şəbəkələrdə onun tərəfindən 3 dəqiqəyə ağrısız, qansız implantasiya icra etməsi haqda da reklam xarakterli materiallar yayılıb.
27-02-2026, 19:46
İmişlidə güclü yanğın başlayıb
İmişli rayonunda güclü yanğın başlayıb.
Bu barədə Fövqəladə Hallar Nazirliyinin (FHN) mətbuat xidmətindən məlumat yayıb.
Qeyd olunub ki, nazirliyin "112" qaynar telefon xəttinə İmişli rayonu, Əlyetməzli kəndində qamışlıq sahədə yanğın baş verməsi barədə məlumat daxil olub.
Məlumatla əlaqədar dərhal əraziyə FHN-in Dövlət Yanğından Mühafizə Xidməti İmişli Rayon Yanğından Mühafizə Hissəsinin qüvvələri cəlb ediliblər.
Hazırda yanğınla mübarizə tədbirləri davam etdirilir.
27-02-2026, 19:44
Azərbaycanlı tələbə necə saxlanılıb?
ABŞ-da Kolumbiya Universitetinin azərbaycanlı tələbəsi Elmina Ağayevanın İmmiqrasiya və Gömrük Mühafizəsi Xidməti (ICE) tərəfindən saxlanılması ölkədə geniş rezonans doğurub.
Hadisə ilə bağlı bir sıra yeni detallar açıqlanıb.
Məlumata görə, Elmina Ağayeva səhər saat 6 radələrində universitet kampusunun yaşayış binasında saxlanılıb. ABŞ mətbuatının yazdığına görə, ICE əməkdaşları binaya daxil olarkən özlərini “itkin düşmüş beş yaşlı qızı axtaran polis əməkdaşları” kimi təqdim ediblər. Onların müşahidə kameralarında həmin uşağın fotosu ilə göründüyü bildirilir. Daha sonra eyni bəhanə ilə tələbənin otağına yönəldikləri iddia olunur.
Kolumbiya Universitetinin prezidenti Kler Şipman bildirib ki, agentlər binaya məhkəmə orderi olmadan daxil olublar. Universitetin ictimai təhlükəsizlik xidməti əməkdaşlarının onlardan order tələb etdiyi, lakin sənəd təqdim olunmadığı və rəhbərliklə əlaqə yaratmaq üçün vaxt istənildiyi halda buna imkan verilmədiyi vurğulanıb. Şipman qeyd edib ki, başqa qurumun əməkdaşı kimi təqdim olunaraq binaya daxil olmaq protokol pozuntusudur və qəbuledilməzdir. Onun sözlərinə görə, universitet ərazisindəki binalara giriş üçün mütləq məhkəmə qərarı və ya rəsmi çağırış sənədi tələb olunur.
Hadisə Nyu-Yorkda demokrat siyasətçilərin və yerli rəsmilərin sərt reaksiyasına səbəb olub. Manhetten dairəsinin nümayəndəsi Bred Hoylman-Siqal bildirib ki, ICE əməkdaşları qəsdən kampus təhlükəsizlik xidmətini çaşdıraraq tələbənin mənzilinə daxil olublar və bu, ciddi vətəndaş hüquqları pozuntusudur. Nyu-York Şəhər Şurasının sədri Culi Menin isə ICE-in məktəb və universitetlərdə əməliyyat keçirməsinin cəmiyyətdə qorxu və etimadsızlıq yaratdığını deyib.
Ştatın qubernatoru Keti Hokul saxlanmanı kəskin tənqid edərək ICE-in məktəblər, universitetlər və yataqxanalar kimi “həssas məkanlarda” əməliyyat keçirməsini qadağan edən qanun layihəsi təklif etdiyini açıqlayıb və sənədin təcili qəbuluna çağırıb. Senatda demokratların lideri Çak Şumer də həbsi “qəbuledilməz” adlandırıb.
Məsələ fevralın 26-da Nyu-York meri Zöhran Məmdaninin Ağ Evdə ABŞ Prezidenti Donald Trampla keçirdiyi görüşdə qaldırılıb. Mer mənzil əlçatanlığı proqramının müzakirəsi üçün nəzərdə tutulan görüşdə dörd saxlanılan miqrantın, o cümlədən Elmina Ağayevanın işini gündəmə gətirib. Məlumata görə, Tramp müraciəti qəbul edib və həmin şəxslərin azadlığa buraxılması barədə göstəriş verib.
Rəsmi qurumlar Elmina Ağayevanın saxlanma səbəbi və immiqrasiya statusu barədə detallı açıqlama verməyib. Universitet rəhbərliyi məxfilik prinsiplərinə istinad edərək bu məsələyə münasibət bildirməkdən imtina edib.
Qeyd edək ki, Elmina Ağayeva sosial şəbəkələrdə aktiv fəaliyyəti ilə tanınır. O, tələbə həyatı və ABŞ-da təhsil təcrübəsi ilə bağlı videolar paylaşır və TikTok platformasında 113 mindən, instaqramda isə 107 mindən çox izləyiciyə malikdir. Saxlanılarkən onun sosial şəbəkədə “ICE məni qanunsuz saxladı, xahiş edirəm kömək edin” məzmunlu paylaşım etdiyi bildirilir.
27-02-2026, 19:30
İstanbulda terror hazırlığı edən dörd nəfər saxlanılıb
İstanbulda terror aktı hazırlığında olan 4 nəfər saxlanılıb.
Türkiyənin Milli Kəşfiyyat Təşkilatı və Baş Polis İdarəsinin birgə əməliyyatı nəticəsində terror təşkilatı DHKP-C-nin üzvü olduğu bildirilən şəxslər 25 fevral 2026-cı ildə keçirilən eyni vaxtlı reydlərlə yaxalanaraq saxlanılıblar.
Məlumata görə, şübhəlilər İstanbulda strateji hədəflərə qarşı silahlı və partlayış xarakterli hücum planlaşdırırmış. Qurumlar terror təşkilatlarına qarşı birgə əməliyyatların davam etdirildiyini açıqlayıblar.
27-02-2026, 19:06
Ucarda açıq ərazidə yanğın olub
Ucarda 3 hektara yaxın sahədə quru ot, kol-kos və ağaclar yanıb.
Hadisə axşam saatlarında rayonun Qarabörk kəndi ərazisində baş verib. Boş ərazidə başlayan yanğın ağaclıq əraziyə keçib. Nəticədə kol-kos, bir neçə ağac yanıb.
Hadisə yerinə FHN-nin Ucar rayon Yanğından mühafizə hissəsinin canlı qüvvəsi və texnikası cəlb olunub. Yanğınsöndürənlərin çevik müdaxiləsi nəticəsində yanğın söndürülüb və alovun əhatə dairəsinin genişlənməsinin qarşısı alınıb.
27-02-2026, 18:50
Ceyhun Bayramov Ahmet Qurbanov ilə görüşüb
27 fevral 2026-cı il tarixində Azərbaycan Respublikasının xarici işlər naziri Ceyhun Bayramov Türkmənistanın xarici işlər nazirinin müavini Ahmet Qurbanovun rəhbərlik etdiyi nümayəndə heyətini qəbul edib.
Bu barədə Xarici İşlər Nazirliyi məlumat yayıb.
Görüş zamanı, iki ölkə arasında dostluq və qardaşlıq münasibətlərinin daha da möhkəmləndirilməsi istiqamətində siyasi dialoqun dinamik inkişafı məmnunluqla qeyd olunub, ali və yüksək səviyyəli səfərlərin və təmasların əhəmiyyəti vurğulanıb. Bu çərçivədə, ötən il ölkəmizin Prezidentinin Türkmənistana, Türkmənistan Xalq Məsləhətinin sədri Qurbanqulu Berdiməhəmmədovun Azərbaycana səfərləri və əldə olunmuş nəticələr məmnunluqla xatırlanıb.
Görüş zamanı, Azərbaycan və Türkmənistan arasında mövcud olan strateji tərəfdaşlıq münasibətlərinin xarakterinə uyğun olaraq, ticarət-iqtisadiyyat, enerji, nəqliyyat və logistika, o cümlədən Xəzər dənizində əməkdaşlıq, humanitar və mədəniyyət sahələrində əməkdaşlığın genişləndirilməsi imkanları nəzərdən keçirilib və perspektivləri müzakirə edilib.
Bu çərçivədə, Azərbaycan və Türkmənistan arasında iqtisadi və humanitar sahələrdə əməkdaşlıq üzrə Birgə Hökumətlərarası Komissiyanın əlaqələrin inkişafında mühüm rol oynadığı vurğulanıb. Ötən il Türkmənistanın Azərbaycanda, bu il isə Azərbaycanın Türkmənistanda mədəniyyət günlərinin təşkilinin əhəmiyyəti qeyd olunub, bununla yanaşı, xalçaçılıq və atçılıq kimi ortaq dəyərlərimizin təbliğatının vacibliyi diqqətə çatdırılıb.
Eyni zamanda, regional və beynəlxalq gündəliyin aktual məsələləri üzrə fikir mübadiləsi aparılıb, çoxtərəfli platformalar çərçivəsində əməkdaşlığın daha da inkişaf etdirilməsinin əhəmiyyəti vurğulanıb.
Xalqlarımız arasında tarixən mövcud olan ənənəvi dostluq və qardaşlıq əlaqələrinin bundan sonra Azərbaycan ilə Türkmənistan arasında tərəfdaşlıq münasibətləri zəminində daha da inkişaf edəcəyinə dair həmfikirlik ifadə olunub.
Görüş zamanı, habelə qarşılıqlı maraq doğuran digər ikitərəfli və çoxtərəfli məsələlər ətrafında fikir mübadiləsi aparılıb.
Eyni gündə, Azərbaycan Respublikası və Türkmənistan Xarici İşlər Nazirlikləri arasında növbəti siyasi məsləhətləşmələr keçirilib.
Siyasi məsləhətləşmələrə Azərbaycan tərəfindən xarici işlər nazirinin müavini Samir Şərifov, Türkmənistan tərəfindən isə xarici işlər nazirinin müavini Ahmet Qurbanov başçılıq edib.
27-02-2026, 18:33
Qanunsuz ağackəsmə faktları aşkarlanıb
Bakı və Sumqayıt şəhərlərində, həmçini Qax rayonunda yaşıllıqların qanunsuz kəsilməsi faktları aşkar edilib.
Bu barədə Dövlət Ekoloji Təhlükəsizlik Xidmətindən məlumat verilib.
Qeyd olunub ki, Xidmətin əməkdaşları tərəfindən son bir həftə ərzində keçirilən nəzarət tədbirləri zamanı Bakı, Sumqayıt şəhərləri və Qax rayonu ərazisində yaşıllıqların qanunsuz kəsilməsi faktları aşkarlanıb.
Araşdırma zamanı Bakı şəhəri Xətai rayonu Kazımağa Kərimov küçəsi 18 ünvanında 1 ağac, Yasamal rayonu Şərifzadə küçəsi bina 134 ünvanında 2 ağac, Binəqədi rayonu Biləcəri qəsəbəsi Sumqayıt şosesi 10A ünvanında 30 ağac, Binəqədi rayonu Biləcəri qəsəbəsi 53E ünvanında 42 ağac, Qaradağ rayonu Bakı-Ələt avtomobil yolunun 50-ci kilometrliyində 13 ağac, 12 kol, Sumqayıt şəhəri 21-ci məhəllə ərazisində 6 ağac, 4 kol, dənizkənarı bulvar ərazisində 17 ağac, Sumqayıt şəhəri Heydər Əliyev prospekti ilə 20 Yanvar küçələrinin kəsişməsində 21 ağac, Qax rayonu Zərnə kəndi ərazisində isə 9 ağacın qanunsuz kəsildiyi müəyyən edilib.
Hər bir faktüzrə yaşıllıqlara dəymiş ziyanın məbləği cinayət tərkibi yaratdığından məsələyə hüquqi qiymət verilməsi üçün toplanmış materiallar hüquq-mühafizə orqanlarına göndərilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!