12-11-2021, 13:08
General-mayor Hikmət Həsənov özü Prezidentin Zəfər Günündə Şuşada hərbçilərlə görüşündə iştirak etməməsinin səbəbini açıqladı. Bu, obyektiv səbəbdir. İnsan müalicəsi ilə məşğuldur. Müdafiə Nazirliyi lazım bilsə idi, onunla bağlı müəyyən açıqlama yayardı.
Bu sözləri Axar.az-a hərbi ekspert, polkovnik Üzeyir Cəfərov general-mayor Hikmət Həsənovla bağlı yayılan müxtəlif xəbərlərə münasibət bildirərkən deyib.
“Son günlər bir neçə il əvvəl baş vermiş neqativ hadisələrlə bağlı şayiələr yayılıb, orada da Hikmət Həsənovun adı hallanır. H.Həsənov Azərbaycanda sıravi insan deyil, generaldır, düşünmürəm ki, onunla bağlı nəyisə gizlətmək mümkün olsun. Hər hansı bir şey olsaydı, rəsmi şəkildə elan edilərdi və burda gizlədəcək heç nə yoxdur”, - ekspert bildirib.
Ü.Cəfərov general-mayor H.Həsənovun Ağdam istiqamətində minaya düşməsi ilə bağlı xəbərin yeni yayılmasına isə bu cür aydınlıq gətirib:
“Həmin vaxt müharibə gedirdi, ola bilsin, məqbul sayılmayıb. H.Həsənov ürəyindən əməliyyat keçirib, ürəyinə stend qoyulub və döyüşlərdən artıq qayıdıb, indi o xəbərin yayılmasının heç bir narahatlığı yoxdur. Sadəcə bəzi insanlar bizdə sensasion xarakterli məlumatları istədikləri formada təqdim etməyi sevirlər ki, auditoriya toplasınlar. Bunu qətiyyətlə pisləyirəm. İnformasiya müharibəsində boşluğa yol verməməliyik. Şayiələrin qarşısını almaq üçün sərt addımlar atmaq lazımdır. Əsgərlərimiz gecə-gündüz ayaqüstə, canları-qanları ilə xidmət edir, ancaq təəssüf ki, kimlərsə bekarçılıqdan evdə kompüter arxasında müəyyən dezinformasiyalar, şayiələr yayır. Son dərəcə diqqətli və ehtiyatlı olmalıyıq”.
Butov.az
12-11-2021, 13:04
Avropa Dərman Agentliyinin (EMA) İnsan Sağlamlığı üçün Dərman Komitəsi (CHMP) COVID-19 koronavirusu üçün Ronapreve və Regkirona dərmanlarına istifadəsinə icazə verilməsini tövsiyə edib.
Trend xəbər verir ki, bu barədə təşkilatın yaydığı məlumatda bildirilir.
Qeyd olunur ki, CHMP Ronapreve və Regkirona ilə müalicənin virusa yoluxma riski olan xəstələr arasında xəstəxanaya yerləşdirmə və koronavirusdan ölüm hallarının sayını əhəmiyyətli dərəcədə azaltdığını göstərən araşdırmaların nəticələrini təhlil edib. Başqa bir araşdırmaya əsasəa, bir ailə üzvü COVID-19-a səbəb olan SARS-CoV-2 virusuna yoluxduğu təqdirdə Ronapreve ailə daxili koronavirusa yoluxma ehtimalını azaldır.
Komitə Ronapreve-nin böyüklər və 12 yaşdan yuxarı yeniyetmələr üçün istifadəsini, Regkirona-nın isə yalnız böyüklər üçün istifadəsini tövsiyə edib. Yaxın vaxtlarda hər iki dərmanla bağlı tövsiyələr Avropa Komissiyasına göndəriləcək.
Butov.az
12-11-2021, 12:58
Zaur Xudiyev yazır...
“Ya sök, ya tik, nə fərqi var?
Bu daxma düzəlməyəcək.
Gəl, sənə təsəlli verim,
Darıxma, düzəlməyəcək...”
Salam Sarvan bu şeiri yazanda yəqin heç ağlına da gətirməzdi ki, nə vaxtsa futbol mövzusunda bir yazının epiqrafı olacaq.
Hələ xeyli müddət bundan əvvəl, milli komandada baş məşqçilər əlcək kimi dəyişiləndə, hər gələn isə boynubükük, üzüqara yola salınanda bu şeiri özüm üçün zümzümə edirdim.
“Bu daxma düzəlməyəcək...”.
Bəli, özülü yanlış qoyulan, kökü, dayanacağı olmayan daxmanı nə qədər söküb-tiksən də düzələn deyil. Elə bizim milli komandamız kimi.
Milli komandamız daha bir tsikli bir xalla başa vurdu. Elə Nikola Yurçeviçin baş məşqçilik etdiyi AÇ-2020-nin seçmə mərhələsində olduğu təhər. Taleyin acı ironiyasıdır ki, məhz elə həmin qrupda olduğu kimi, bu dəfə də 8 oyundan sonra 7 dəfə meydanı başıaşağı tərk edən komandamız cəmi bir dəfə bərabərliyə sevinib.
Hələ bu harasıdır?! Eyni ötən tsikldə olduğu kimi, bu dəfə də qapımızda 18 qol görmüşük, bizim isə cəmi 5 dəfə rəqibləri məyus etməyə gücümüz çatıb.
İndi siz mənə deyin görüm, milli komandanın baş məşqçisinin Yurçeviç, De Byazi, Əli, Vəli, Pirvəli olmasının nə fərqi var axı? Bu sistemlə, bu oyunçularla, bu çempionatla, bu təfəkkürlə nəyə nail olmaq olar ki?
“Darıxma, düzəlməyəcək...”.
Amma zaman gözləmir, ən düzəlməyəcək şeylər belə düzəlirsə, bizim futbola nə mane olur?
Niyə “Qarabağ” Avrokuboklarda üç oyundan sonra qrupdan çıxmağı təmin edə bilir, amma əsasını “Qarabağ”lı futbolçuların təşkil etdiyi yığma 8 oyundan sonra cəmi 1 xal toplayır?
Nədir bu qədər kəskin uçurumun, dərin fərqin səbəbi? Kim, harada, nəyi səhv edir?
İnanın, məsələ təkcə Lüksemburqa məğlubiyyət deyil. Əlbəttə, bir zamanlar üstdən aşağı baxdığımız, cırtdan dövlət hesab edib qrupumuza düşəndə ən az potensial 4 xal kimi gördüyümüz, ərazisi ölkə başçısının təbiri ilə desək, işğaldan azad etdiyimiz ərazilərin yarısı qədər olan Lüksemburqa öz meydanında uduzmaq ayıbdır, biabırçılıqdır. Amma əmin olun ki, futbolumuzun mövcud faciəsinin miqyası bundan qat-qat daha böyük, daha ağırdır.
Bu ölkənin uşaq futbolçuları asfalt üzərində, süni örtüklü meydançalarda şikəst edilirsə, bu ölkənin region komandaları ölkə çempionatına uzaqdan baxırsa, 60-dan çox şəhər və rayonu olan ölkənin milli çempionatında cəmi 8 komanda iştirak edirsə, onun da 6-sı paytaxtı təmsil edirsə, hansı inkişafdan, hansı nəticədən danışa bilərik?
Ölkə futbolunun lokomotivi hesab olunan Tovuz, Gəncə, Lənkəran bu gün böyük futboldan uzaqdadırsa, nəyə ümid etməliyik?
Milliləşdirilmiş, ad-soyadı azərbaycanlılara oxşayır deyə zorla bizə sırınan legionerlərə?
Yoxsa zamanında oyunu ilə göz qamaşdıran, Azərbaycan yığmasını seçdikdən sonra isə sürətlə enişə keçən xaricdə yetişmiş Emin Mahmudov, Renat Dadaşov, Ramil Şeydayev kimi azərbaycanlılara?
Məşhur rusiyalı rəssam Fyodor Reşetnikovun “Yenə də iki” tablosunu görmüş olarsınız yəqin. Uşaq dərsdən yenə iki alıb evə gəlir, ailədə hamı ona baxır, o isə üzünü çevirib, utanır. Bəli, utanır. Ən azından hələ də utanacaq yeri qalıb.
Bizim isə heç ikiyə də gücümüz çatmır. Yenə də bir!
Görəsən, utanırlarmı?
Butov.az
12-11-2021, 11:31
Dünya bazarında neft ucuzlaşıb.
WTI markalı neftin dekabr fyuçersləri 0,67 % ucuzlaşaraq, bir bareli 81,04 ABŞ dolları olub.
“Brent” markalı neftin yanvar fyuçersləri 0,72 % faiz ucuzlaşaraq, bir bareli 82,27 ABŞ dolları təşkil edib.
Mənbə: Bloomberg
Butov.az
12-11-2021, 11:26
Bu gün İstanbulda Türkdilli Dövlətlərin Əməkdaşlıq Şurasının (Türk Şurası) dövlət başçılarının VIII Zirvə Toplantısı keçiriləcək
Butov.az xəbər verir ki, toplantıda Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan, Qazaxıstan Prezident Kasım-Jomart Tokayev, Qırğız Respublikası Prezidenti Sadır Caparov, Özbəkistan Prezidenti Şavkat Mirziyoyev, Türkmənistan Prezidenti Qurbanqulu Berdimuhammedov, Macarıstanın Baş naziri Viktor Orban və Türk Şurasının Baş katibi Bağdat Amreyev iştirak edəcək.
“Elektron dövrdə “Yaşıl texnologiyalar” və Ağıllı şəhərlər” mövzusunda təşkil olunan toplantıda liderlər bir çox mühüm məqamları, o cümlədən təşkilatın gələcəyini müəyyənləşdirən məsələləri müzakirə edəcəklər.
Tədbir çərçivəsində təşkilata sədrliyin Azərbaycandan Türkiyəyə təhvil verilməsi, həmçinin, Türkmənistanın müşahidəçi statusunda Şuraya qatılması gözlənilir.
12-11-2021, 11:22
12 Noyabr - Azərbaycan Respublikasının Konstitusiya günüdür.
Bu gün Azərbaycan Respublikası Konstitusiyasının qəbul edilməsindən 26 il ötür.
Müstəqil Azərbaycanın ümummilli lider Heydər Əliyevin rəhbərliyi ilə hazırlanan ilk Konstitusiyası 1995-ci il noyabrın 12-də qəbul edilib.
1995-ci ildə qəbul olunmuş Konstitusiya müstəqil Azərbaycanın ilk, ümumilikdə isə respublikanın dördüncü Konstitusiyasıdır. Azərbaycanın Konstitusiya quruluşunun tarixi SSRİ dövrünə təsadüf edir. Azərbaycanın ilk Konstitusiyası 1921-ci ilin mayın 19-da, onun SSRİ Konstitusiyasına uyğunlaşdırılmış yeni redaksiyası isə 1925-ci il martın 14-də qəbul olunub. 1978-ci ilin aprelin 21-də qəbul edilmiş son Konstitusiya da, əvvəlki konstitusiyalar kimi, SSRİ Konstitusiyasına uyğunlaşdırılıb. 1918-1920-ci illərdə mövcud olmuş Azərbaycan Xalq Cümhuriyyəti isə dövlətin əsas qanununu qəbul edə bilməyib.
SSRİ hakimiyyətinə son qoyularaq dövlətimiz müstəqillik əldə etdikdən sonra yeni Konstitusiyanın hazırlanması zərurəti meydana çıxdı. Bunun üçün Prezident Heydər Əliyevin rəhbərliyi ilə xüsusi komissiya yaradıldı və bundan sonra Konstitusiya layihəsi ümumxalq müzakirəsinə çıxarıldı. 1995-ci il noyabrın 12-də müstəqil Azərbaycanın ilk Konstitusiyası referendumla qəbul olundu.
Konstitusiyanın qəbulu müstəqillik tariximizin ən mühüm hadisələrindən biri olmaqla yanaşı, ümummilli lider Heydər Əliyevin Azərbaycan dövlətçiliyi qarşısındakı böyük xidmətlərindən biridir. Bu Konstitusiya müstəqil dövlət quruculuğu prosesini tənzimləyən, demokratik inkişafa təminat yaradan, cəmiyyətin siyasi, sosial, mədəni, iqtisadi sferalarında köklü dəyişiklikləri özündə ehtiva edən, qanunvericiliyin təkmilləşdirilməsində hüquqi baza rolunu oynayan mükəmməl və mütərəqqi sənəd idi. Sözügedən referendumda seçicilərin 86 faizi iştirak edib və onların 91,9 faizi Konstitusiyanın qəbul edilməsinin lehinə səs verib.
Əsas Qanun noyabrın 27-də hüquqi qüvvəyə minib.
Azərbaycanda ilk konstitusiya məhkəmə nəzarəti orqanı olan Azərbaycan Respublikası Konstitusiya Məhkəməsi isə 1998-ci il iyul ayının 14-də yaranıb.
Müstəqil Azərbaycanın dövlət quruculuğunun əsasını təşkil edən ilk Konstitusiya 5 bölmə, 12 fəsil, 158 maddədən ibarətdir. Buna qədər üç dəfə Konstitusiyamıza dəyişiklik edilib: 2002-ci il avqust, 2009-cu il mart və 2016-cı il sentyabr. Müvafiq tarixlərdə referendum yolu ilə Konstitusiyaya əlavə və dəyişikliklər edilib.
Konstitusiya günü bayram kimi qeyd olunsa da, noyabrın 12-si iş günüdür.
Azərbaycan Respublikasının Konstitusiya Günü bu il daha fərqli əhval-ruhiyyədə qeyd olunur. Çünki ötən il Müzəffər Azərbaycan Ordusu döyüş meydanında tarix yazaraq öz ərazi bütövlüyünü bərpa edib. Azərbaycan xalqı dövlət başçısı İlham Əliyevin ətrafında yumruq kimi birləşərək tarixi ədalətsizliyə son qoyub. Odur ki, bu il Azərbaycan xalqı üçün hər bir özəl günün anlamı ikiqat dəyər daşıyır. Konstitusiya Günümüz bu il uzun müddətdən sonra ərazi bütövlüyünü bərpa etmiş ölkəmizin hər bir yerində böyük qürur və iftixar hissi ilə qeyd olunacaq.
Butov.az
12-11-2021, 11:12
Azərbaycan Respublikasının Prezidenti İlham Əliyev noyabrın 11-də İstanbulda Qırğız Respublikasının Prezidenti Sadır Japarovla görüşüb.
Bununla bağlı AZƏRTAC məlumat yayıb.
Butov.az
12-11-2021, 10:59
Bu gün İstanbulda Türkdilli Dövlətlərin Əməkdaşlıq Şurasının (Türk Şurası) dövlət başçılarının VIII Zirvə Toplantısında qurumun adının dəyişdirilməsi gözlənilir.
“Haber Global”ın məlumatına görə, Türk Şurası bundan sonra Türk Dövlətləri Təşkilatı adı ilə fəaliyyətinə davam edəcək.
VIII Zirvə toplantısı Türkiyə Prezidenti Rəcəb Tayyib Ərdoğanın sədrliyi ilə keçiriləcək. Zirvənin gündəm mövzuları ilə yanaşı, keçiriləcəyi yer də diqqət çəkir. Liderlərin zirvəsi Demokratiya və Azadlıqlar Adasında baş tutacaq.
Butov.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!