6-12-2021, 18:26
Azərbaycanda son sutkada koronavirus (COVID-19) əleyhinə 154 vaksin vurulub.
Nazirlər Kabineti yanında Operativ Qərargahdan verilən məlumata görə, bir gündə birinci mərhələ üzrə vaksinasiya olunanların sayı 143, ikinci mərhələ üzrə vaksinasiya olunanların sayı 8, buster doza üzrə vaksinasiya olunanların sayı isə 3 nəfərdir.
Ölkədə vurulan vaksinlərin ümumi sayı 10 703 142, birinci mərhələ üzrə vaksinasiya olunanların ümumi sayı 5 098 684, ikinci mərhələ üzrə vaksinasiya olunanların sayı 4 593 286, buster doza üzrə vaksinasiya olunanların sayı isə 1 011 172 təşkil edir.
Bütöv.az
6-12-2021, 18:20
Azərbaycan Güləş Federasiyasının ofisindən içərisində 63 min manat dəyərində olan pulun yerləşdiyi dəmir seyfi oğurlayan Kamran Mütəllimov barədə detallar məlum olub.
Bütöv.az-ın əldə etdiyi xəbərə görə, o, əvvəl federasiyada ofisiant işləyibmiş.
Bu səbəbdən də seyfin harada yerləşdiyini dəqiq bilirmiş.
Qeyd edək ki, Kamran Mütəllimov dekabrın 1-də iş yoldaşı Vüqar Əsgərov və İmran Zeynalovla birgə federasiyanın mühasibat otağından 63 min manat dəyərində (orada yerli valyutadan başqa, ABŞ dolları, Türkiyə lirəsi də olub – red.) seyfi oğurlayıb və pulu öz aralarında bölüblər. Onlar oğurluğa İmran Zeynalova məxsus “KİA Rio” avtomobilində gəliblər.
Dekabrın 4-də Daxili İşlər Nazirliyi məlumat yayaraq hər üç şəxsin saxlandığını bildirib.
6-12-2021, 18:09
Azərbaycanın Serbiya, Monteneqro, Bosniya və Herseqovinadakı sabiq fövqəladə və səlahiyyətli səfiri olmuş Eldar Həsənovun cinayət işi üzrə növbəti məhkəmə iclası keçirilib.
"Report" xəbər verir ki, Bakı Ağır Cinayətlər Məhkəməsinin hakimi Əfqan Hacıyevin sədrliyi ilə keçirilən prosesdə xaricdə yaşayan əcnəbi vətəndaşların məhkəməyə göndərdiyi məktublar elan olunub.
Məktubda göstərilib ki, pandemiya ilə əlaqədar şahid Azərbaycana gələ bilmir və ibtidai istintaqa verdiyi ifadəsini təsdiqləyib.
Daha sonra E.Həsənov əcnəbilərin ifadələrinə münasibət bildirib. O, şahidlərin dedikləri ilə razılaşmayıb.
Növbəti proses dekbrın 10-da davam etdiriləcək.
Xatırladaq ki, aparılan istintaqla Həsənov Eldar Hümbət oğlunun Azərbaycan Respublikasının Rumıniya, Serbiya Respublikası, Bosniya və Herseqovina və Monteneqroda fövqəladə və səlahiyyətli səfiri kimi fəaliyyət göstərdiyi 2010-2020-ci illərdə qabaqcadan əlbir olan bir qrup şəxs halında 17.931.316 manat (16.893.868 avro) pul vəsaitini səfirliklər üçün yeni inzibati binaların alınması, habelə təmir-tikinti işləri ilə əlaqədar israf etmə və mənimsəməsinə, cinayət yolu ilə əldə edildiyini bilə-bilə 11.804.661 manat (11.156.716 avro) məbləğində pul vəsaitini leqallaşdırmasına, rəsmi sənədlərə bilə-bilə yalan məlumatlar daxil edərək vəzifə saxtakarlığı törətməsinə, vəzifəli şəxs kimi vəzifə səlahiyyətlərindən sui-istifadə etməklə dövlətin qanunla qorunan mənafelərinə ağır nəticələrə səbəb olan 327.373 manat (180.728 avro) məbləğində mühüm zərər vurmasına və dövlət büdcəsinin xeyli miqdar təşkil edən 192.387 manat (101.761 avro) pul vəsaitindən təyinatı üzrə istifadə etməməsinə əsaslı şübhələr müəyyən edilib.
Buna görə, E.Həsənova Azərbaycan Respublikası Cinayət Məcəlləsinin 179.3.2 (mənimsəmə və ya israfetmə, külli miqdarda törədildikdə), 193-1.3.2 (cinayət yolu ilə əldə edilmiş pul vəsaitlərini və ya digər əmlakı leqallaşdırma, külli miqdarda törədildikdə) 308.2 (vəzifə səlahiyyətlərindən sui-istifadə etmə, ağır nəticələrə səbəb olduqda) 308-1.1 (Dövlət büdcəsinin vəsaitindən təyinatı üzrə istifadə etməmə) və 313-cü (vəzifə saxtakarlığı) maddələri ilə ittiham elan olunub.
Qeyd edək ki, E.Həsənovun birgə ittiham olunduğu cinayətlərin digər iştirakçıları barəsində cinayət işi ayrıca icraata ayrılaraq istintaqı davam etdirilir.
Bütöv.az
6-12-2021, 17:54
Sosial şəbəkələrdə tanış olduqları şəxsləri Yasamal rayonunda yerləşən “Qanlı göl” adlanan əraziyə çağırıb onlara qarşı quldurluq edən və zərərçəkənlərin şəxsiyyətlərini alçaldan videolar çəkərək hədələyən dəstə üzvləri həbs ediliblər.
Teleqraf.com xəbər verir ki, bu barədə Daxili İşlər Nazirliyi məlumat yayıb.
Noyabrın 26-da Bakıda alı təhsil alan xarici ölkələrdən birinin vətəndaşı polisə müraciət edərək bildirib ki, sosial şəbəkələrdə tanış olduğu bir nəfər onu Yasamal rayonunda yerləşən “Qanlı göl” adlanan əraziyə çağırıb.
Orada olan yarımtikilidə tanımadığı 4 nəfər ona qarşı fiziki zor tətbiq etməklə 1 ədəd dəyəri 1500 manat olan mobil telefonunu və 100 manat pulunu ələ keçiriblər.
Həmin şəxslər daha sonra zərərçəkənin şəxsiyyətini alçaldan hərəkətlər edərək onu mobil telefon vasitəsi ilə lentə alıb polisə bu barədə şikayət edəcəyi təqdirdə həmin görüntüləri sosial şəbəkələrdə yayacaqları ilə hədələyiblər.
Yasamal rayon Polis İdarəsi və 28-ci polis bölməsinin əməkdaşlarının həyata keçirdikləri təxirəsalınmaz əməliyyat nəticəsində hadisəni törətməkdə şübhəli bilinən dəstənin rəhbəri Sadiq Ovçiyev, Ağababa Musayev, Elnur Vəliyev, Nihat Rəhimli, Sübhan Xanlarov və Aqşin Məmmədov saxlanılaraq istintaqa təqdim ediliblər.
Araşdırma zamanı müəyyən edilib ki, bu şəxslər eyni üsulla, yəni sosial şəbəkələrdə tanış olub görüşmək adı altında müxtəlif vaxtlarda daha 12 nəfəri “Qanlıgöl” adlanan əraziyə çağırıb onlara qarşı da quldurluq ediblər.
Dəstə üzvləri həmin zərərçəkənlərin də şəxsiyyətlərini alçaldan hərəkətlər edərək mobil telefon vasitəsi ilə çəkiblər.
Onların mobil telefonlarına baxış zamanı müxtəlif şəxslərə qarşı etdikləri hərəkətlər və hədə-qorxu videoları aşkar edilərək götürülüb.
Qeyd olunan faktlarla bağlı Yasamal rayon Polis İdarəsinin istintaq şöbəsində Cinayət Məcəlləsinin müvafiq maddələri ilə cinayət işi başlanılıb.
Dəstə üzvləri barəsində məhkəmənin qərarı ilə həbs qətimkan tədbiri seçilib.
Bu şəxslərin əməllərindən zərərçəkən və hələ də polisə şikayət etməyən vətəndaşlar varsa bu barədə Yasamal rayon Polis İdarəsinə, ərazi üzrə polis orqanlarına, həmçinin "102" Xidməti-Zəng Mərkəzinə və Nazirliyin sosial şəbəkələrdəki rəsmi hesablarına məlumat verə bilərlər.
Bütöv.az
6-12-2021, 17:23
Sabiq əmək və əhalinin sosial müdafiəsi naziri Səlim Müslümovun cinayət işi üzrə ibtidai istintaq davam edir.
APA-nın əldə etdiyi məlumata görə, sabiq nazir barəsində seçilmiş həbs-qətimkan tədbirinin uzadılması ilə bağlı istintaq orqanının təqdimatına baxılıb.
Səbail Rayon Məhkəməsində keçirilən prosesdə təqdimat təmin edilərək Səlim Müslümov barəsində seçilmiş həbs-qətimkan tədbiri daha 3 ay uzadılıb.
Qeyd edək ki, Səlim Müslümovun Azərbaycan Respublikasının əmək və əhalinin sosial müdafiəsi naziri vəzifəsində işlədiyi müddətdə nazirliyin fəaliyyət istiqamətləri üzrə əlillərin və sağlamlıq imkanları məhdud uşaqların reabilitasiyası və sosial müdafiəsinin təşkil edilməsi, işəgötürənlərin əmək, məşğulluq və sosial müdafiə məsələləri ilə bağlı fəaliyyətlərinə dövlət nəzarətinin həyata keçirilməsi və digər səlahiyyətlərin yerinə yetirilməsi zamanı çoxsaylı sui-istifadə hallarına yol verməsinə dair faktlar Dövlət Təhlükəsizliyi Xidmətində araşdırılıb.
Toplanılmış materiallar əsasında başlanılmış cinayət işi üzrə Səlim Müslümovun xidməti vəzifələrinin icrası ilə əlaqədar özü üçün qanunsuz üstünlüklər əldə etmək məqsədilə qulluq səlahiyyətlərindən tamah niyyəti ilə qulluq mənafeyinə qəsdən zidd olaraq istifadə edib dövlətin qanunla qorunan mənafelərinə ağır nəticələrə səbəb olan zərər vurmasına, habelə onun tərəfindən tabeçiliyində işləyən vəzifəli şəxslərdən vasitəçi kimi istifadə etməklə müxtəlif rayonlarda əlillər üçün fərdi yaşayış və internat evlərinin tikinti-təmirinin aparılması işlərini yerinə yetirən fiziki və hüquqi şəxslərə ayrılmış pul vəsaitlərinin bir hissəsinin tələb edilərək alınmasına əsaslı şübhələr müəyyənləşib.
Həmçinin Səlim Müslümovun nazirliyin Dövlət Əmək Müfəttişliyi Xidməti tərəfindən ölkə ərazisində istehsal, sosial-məişət və iaşə təyinatlı obyektlərin inşası və yenidən qurulması zamanı əməyin mühafizəsi tələblərinə əməl olunması, onların istismara buraxılmasına razılığın verilməsi, əməyin mühafizəsi tələblərinə uyğunluğu ilə bağlı müəssisələrdə aparılmış yoxlamaların nəticələrinə görə müxtəlif vaxtlarda külli miqdarda pul vəsaitləri qismində təkrar rüşvət almasına dair məlumatlar əldə olunub. Eyni zamanda, Daxili nəzarət şöbəsi tərəfindən ərazi strukturlarında aparılmış yoxlamaların nəticələri ilə bağlı onun həmin nazirliyin müxtəlif ərazi şöbələrinin rəhbərlərinin hər birindən 10 mindən 30 min manatadək külli miqdarda təkrar rüşvət almasına əsaslı şübhələr müəyyənləşib.
Səlim Müslümov Azərbaycan Respublikası Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə təqsirləndirilən şəxs qismində məsuliyyətə cəlb olunaraq barəsində məhkəmənin qərarı ilə həbs qətimkan tədbiri seçilib.
Bütöv.az
6-12-2021, 17:10
Azərbaycan Respublikasının Prezidenti İlham Əliyev, Birinci vitse-prezident Mehriban Əliyeva və qızları Leyla Əliyeva dekabrın 6-da Quba rayonuna səfərə gediblər.
AZƏRTAC xəbər verir ki, Prezident İlham Əliyev, Birinci vitse-prezident Mehriban Əliyeva və qızları Leyla Əliyeva ulu öndər Heydər Əliyevin şəhərin mərkəzində ucaldılmış abidəsini ziyarət edərək önünə gül dəstəsi qoyub, Quba Olimpiya İdman Kompleksində yenidənqurma, əsaslı təmir və tikinti işlərindən sonra yaradılan şəraitlə tanış olub, “Quba ABAD Factory” qablaşdırma vasitələrinin istehsalı müəssisəsinin açılışında iştirak ediblər.
Prezident İlham Əliyev Quba-Qonaqkənd avtomobil yolunun açılışını edib.
Dövlətimizin başçısı İlham Əliyev, Birinci vitse-prezident Mehriban Əliyeva və qızları Leyla Əliyeva Heydər Əliyev Fondu tərəfindən Qubanın Birinci Nügədi kəndində inşa olunmuş 1 nömrəli tam orta məktəbdə, Qonaqkənd qəsəbəsində yeni inşa olunan Mədəniyyət Evində yaradılan şəraitlə tanış olub və Qonaqkənd qəsəbəsinin sakinləri ilə görüşüb, qəsəbə sakinləri ilə birgə ulu öndər Heydər Əliyevin Qonaqkənd qəsəbəsində ucaldılan abidəsinin önünə gül dəstəsi qoyublar.
Sonda xatirə şəkli çəkdirilib.
Bütöv.az
6-12-2021, 12:23
Bəri başdan deyim ki, Dövlət Sərhəd Xidmətinin o məlum gün media ilə işi guya pis təşkil etdiyi barədə iddialarla razı deyiləm. Başlayaq ondan ki, hadisədən dərhal sonra yayılan məlumatda məkan, ünvan göstərilmişdi:
"Dövlət Sərhəd Xidmətinin və Baş Prokurorluğun birgə məlumatında bildirilirdi ki, noyabr ayının 30-da saat 10:40 radələrində Dövlət Sərhəd Xidmətinin hərbi helikopteri Xızı rayonu ərazisində yerləşən “Qaraheybət” aviasiya poliqonunda təlim uçuşları yerinə yetirərkən qəzaya uğrayıb. Qəza nəticəsində helikopterin heyəti arasında həlak olanlar və yaralananlar var".
Dövlət Sərhəd Xidmətinin və Baş Prokurorluğun rəhbər heyəti hadisə yerindədir. Hadisə ilə əlaqədar birgə araşdırma tədbirləri həyata keçirilir.
Artıq biz bilirik nə olub, harda olub. Yəni qəza Qaraheybət aviasiya poliqonunda baş verib. O da yazılıb ki, Qaraheybət poliqonu Xızı rayonu ərazisində yerləşir. Yəqin ki, hadisə rayonuna istənilən və ya istəyən kütləvi informasiya vasitəsi özü getməliydi. Hadisə rayonuna xüsusi avtobus reysinin təşkil edilməsini gözləmədən.
Yeri gəlmişkən, REAL-ın birinci çəkiliş qrupu poliqona məlumatı alandan təxminən yarım saat sonra getmişdi. Mən hadisənin miqyasını nəzərə alaraq özüm də qəza yerinə yola düşdüm. Düzü, çətin tapdıq. Amma bunun da səbəbi DSX-nın əməkdaşları deyildi. Ərazidə şəbəkə tez-tez itir. Əlaqə saxlamaq mümkün olmur. Qarşında azı beş-altı cığır var. Bəzən getdiyin cığırdan geri qayıdır, yeni cığırın izinə düşürsən. Yolumuzun üstdə başqa həmkar kanalların maşınları da var idi. Amma dayanmışdılar. Elə biz də tez-tez dayanmalı olurduq. Axır ki, birləşərək getdik. Kanallardan birinin əməkdaşını hətta biz öz maşınımıza götürdük. Hadisə rayonuna çatdıq.
Ərazidə gözləməyimizi xahiş etdilər. Ən təcrübəli və yaşlı reportyor kimi mən Dövlət Sərhəd Xidmətinin rəhbərliyinin qəza baş verən ərazidə dayanmış nümayəndəsinə yaxınlaşmağa icazə aldım. Başa düşürdüm ki, dəhşətli hadisə baş verib. 14 nəfər hərbçi, pilot, superpeşəkar, Dövlət Sərhəd Xidmətinin əməkdaşları həlak olub. Gözümüzün qabağında qəzaya uğramış helikopter gövdəsi var. Araşdırma aparan bəzi əməkdaşlar predmetlə işləyirlər. Dərd üz vermiş qurumun təmsilçilərinin gərginliyinə anlayışla yanaşmaq lazımdır.
Amma eyni zamanda reportyor olaraq bizim də öz vəzifəmiz var. Hamının adından xahiş etdim ki, hadisə rayonunda brifinq versinlər. Düzdür, o saat razılaşmadılar. Amma 20-25 dəqiqə sonra alındı. Helikopterin yanında küləyin səsi mikrofonlara ciddi mane olduğundan, razılaşdıq ki, açıqlama yaxınlıqdakı məntəqədə verilsin.
Yeri gəlmişkən onu da deyim ki, brifinqi keçirən DSX rəisinin müavini İlham Mehdiyev İkinci Qarabağ Müharibəsində döyüşüb, bir sıra istiqamətlərdə aparılan əməliyyatlara şəxsən rəhbərlik edib, göstərdiyi fədakarlığa görə “Vətən Müharibəsi Qəhrəmanı” adı alıb. Həlak olanlar həm də onun döyüş yoldaşları, silahdaşları, dostlarıdır. Və general leytenant öz əzizləri haqqında danışırdı.
Dövlət Sərhəd Xidmətinin mətbuat xidmətini, bir az da irəli gedərək, ümumiyyətlə Dövlət Sərhəd Xidmətini ittiham, tənqid hədəfinə çevirən həmkarlarımızdan daha həssas, daha müdrik və daha ədalətli olmalarını xahiş edərdim. Adətən belə hadisələr ümumi girişə açıq olmur. Məsələn, bu saat yadıma 1995-ci ilin noyabr ayında Bakı metrosunun “Ulduz” stansiyasında baş verən dəhşətli yanğın düşür. Bizi hadisə yerinə buraxmamışdılar. Gözlədik, xüsusi qurum çəkdiyi kadrları özü bizə təqdim etdi. Sonra bütün güc strukturlarının rəhbərlərindən müsahibə aldım. Başqa belə hadisələrin media tərəfindən işıqlandırılması da müəyyən problemlərlə müşayiət olunur.
Düzdür, tez-tez 2-ci Qarabağ müharibəsinin gedişində brifinqlərin keçirilməsi, operativ məlumatlandırma sisteminin əla təşkili misal çəkilir. Əlbəttə belədir. Biz Prezidentin köməkçisinin, müdafiə nazirliyinin mətbuat xidmətinin operativ məlumatlandırma üsulunun birbaşa şahidləriyik. Amma onu da unutmayaq ki, birinci halda artıq dövlətin müharibənin rəsmi bəyan edilməsindən sonra vahid informasiya-məlumat sxemi var idi. Brifinqlər bu sxemin tərkib hissəsi idi. Ən gözlənilməz hadisələr belə burda dəqiqliklə nəzərə alınmışdı. Amma etiraf edək ki, 30 noyabrda Qaraheybət poliqonunda baş verən hadisə gözlənilməz idi. O helikopter müharibə hərəkətlərinin içində vurulmamışdı. Əgər belə bir hadisə olsaydı, heç şübhəsiz, İkinci Qarabağ müharibəsinin gedişi barədə verilən başqa məlumatlar kimi bu xəbər də brifinqdə veriləcəkdi.
İkinci məsələ, Dövlət Sərhəd Xidmətinin hər hansısa kanala xüsusi münasibəti barədə əsassız iddialar. Əgər belə bir yanaşma olsaydı, yəqin ki, korporativ maraqlar baxımından Real TV-nin rəhbəri kimi mən brifinq yox, eksklüziv müsahibə tələb edər, yəqin, ala da bilərdim. “Yaşınız qədər təcrübəm var” deyə biləcəyim yerdir burası. Amma demirəm. Hamı kimi mən də sıraya durmuşdum. Və brifinqi də hamı üçün istədim.
Əlbəttə, mənim də narazı olduğum məqamlar var idi. Amma mən bu detalları ictimailəşdirmədən, Sərhəd Xidmətinin Aparatına, qurumun mətbuat təmsilçisinə şəxsən çatdırırdım. Amma eyni zamanda onu, təmsil etdiyi qurumun vəziyyətini başa düşməyə çalışırdım. Təsəvür edin: ortada 14 meyit var! Ortada qəza var. Ortada bu şəkil var. General polkovnik Elçin Quliyevin şəhid atasından gözünü qaçırdığı bu şəklin ağırlığını təsəvvür edirsiz? Mən təsəvvür edirəm!
Hə, kimsə deyə bilər ki, jurnalist belə gəldi, qərəzsizlik bu yandan aşdı, operativlik o tərəfdən keçdi. Bağışlayın məni, dostlar, həmkarlar, mənim mənsub olduğum, təklif etdiyim jurnalistikada dövlət birinci gəlir. Nə bilirik: bəlkə “heç bir kənar müdaxilə baş verməyib” demək özü də lazımdır. Ola bilsin ki, bu xəbərin başqa əhəmiyyəti var?! Bilmədiyimiz. Sətiraltı! Bəlkə hansısa fərziyyənin yoxlanılması üçün işlədilən ifadə fintidir. Axı verilən brifinqdə “bütün ehtimallar araşdırılır” da deyilmişdi. Baş prokurorun birinci müavini “hadisə ilə bağlı intensiv zəruri istintaq hərəkətləri davam etdirilir” da demişdi. Hara soxuluruq öz qeyri-peşəkarlığımızla, Feysbuk həvəskarlığımızın laykpərvərliyi ilə!
Sosial şəbəkələrdə nə qədər Şerlok Holms peyda olub! Nə qədər boşboğaz çənə gimnastikası ilə məşğul oldu?! Olsun e, yəqin bu da lazımdır! Amma öz hobbiçiliyinizə ciddi dövlət qurumlarını qatmayın!
Hörmətli Mətbuat Şurasını hansı təzyiqdi belə narahat edən? Bəs neçə illərdir mən bədbəxt təzyiqlə, təhdidlə, təhqirlə üzləşirəm, hanı sizin həssas münasibətiniz?
Bütöv.az
6-12-2021, 12:17
Prezident İlham Əliyev Azərbaycan Respublikası Hesablama Palatası əməkdaşlarının təltif edilməsi haqqında sərəncam imzalayıb.
Bununla bağlı Prezident.az məlumat yayıb.
Sərəncamla Azərbaycan Respublikası Hesablama Palatasının yaradılmasının 20 illiyi münasibətilə Palatanın fəaliyyətində xidmətlərinə görə aşağıdakı şəxslər təltif edilirlər:
3-cü dərəcəli “Vətənə xidmətə görə” ordeni ilə
Gülməmmədov Vüqar Tapdıq oğlu
“Tərəqqi” medalı ilə
Hümbətov Qüdrət Məhəmməd oğlu
Səfərov Fəqan Şayıb oğlu
“Dövlət qulluğunda fərqlənməyə görə” medalı ilə
Atalıyev Elgün Yavər oğlu
Əliyeva Nahidə Azər qızı
Həsənov Əfqan Famil oğlu
Həsənova Lalə Eyvaz qızı
Məmməd Zadə Seymur Malik oğlu
Mürşüdov Ürfət İsax oğlu
Paşayev Fariz Vaqif oğlu
Vəliyev Zaur Teyyub oğlu.
Bütöv.az
6-12-2021, 12:03
Bu dəfə Nikol Paşinyanın qızı Maryam Paşinyan erməni diasporunun nümayəndələrinin qəzəbinə tuş gəlib.
Bütöv.az erməni KİV-ə istinadən xəbər verir ki, açıq havada kafelərin birində dostları ilə birlikdə oturan zaman Maryama anidən bir nəfər yaxınlaşıb. Həmin şəxs baş nazirin qızına “Sənin atan 5 min insan öldürüb”, - deyərək, Nikolu İuda ilə müqayisə edib.
Qeyd edək ki, İuda xristianlar üçün lənətlə xatırlanan addır. Belə ki, İsa peyğəmbərin 12 həvarisindən biri olan İuda peyğəmbərə satqınlıq edib və İsa peyğəmbər onun əməlləri nəticəsində romalılar tərəfindən həbs edilib.
6-12-2021, 12:01
Dövlət büdcəsini yağmalamış, özünə və ailəsinə olduqca böyük biznes qurmuş sabiqlərdən Fazil Məmmədov ortalıqda gəzir. O nazir olduğu illərdə Əmək və Əhalinin Sosial Müdafiəsi naziri postunda böyük büdcə vəsaitlərinə sərəncam vermiş Səlim Müslümov isə bu gün həbsdədir. Halbuki Fazil Məmmədov büdcə vəsaitlərinin dalına keçməkdə Səlim Müslümovdan da fərasətli idi.
Səlim Müslümovun həbsindən sonra onun büdcədən 1 milyard manata yaxın vəsait çırpışdırması iddiaları ortaya çıxıb və həmin iddialar bu günə qədər də təkzib edilməyib. Bu ilin fevralında həbsə alınan Səlim Müslümovun barəsində cinayət işi araşdırılmaqdadır. Onun həbsi ilə bağlı Dövlət Təhlükəsizliyi Xidmətinin yaydığı məlumatda bildirilirdi ki, nazir vəzifəsində işlədiyi müddətdə nazirliyin fəaliyyət istiqamətləri üzrə əlillərin və sağlamlıq imkanları məhdud uşaqların reabilitasiyası və sosial müdafiəsinin təşkil edilməsi, işəgötürənlərin əmək, məşğulluq və sosial müdafiə məsələləri ilə bağlı fəaliyyətlərinə dövlət nəzarətinin həyata keçirilməsi və digər səlahiyyətlərin yerinə yetirilməsi zamanı çoxsaylı sui-istifadə hallarına yol verməsi araşdırılır. Toplanılmış materiallar əsasında başlanılmış cinayət işi üzrə Səlim Müslümovun xidməti vəzifələrinin icrası ilə əlaqədar özü üçün qanunsuz üstünlüklər əldə etmək məqsədilə qulluq səlahiyyətlərindən tamah niyyəti ilə qulluq mənafeyinə qəsdən zidd olaraq istifadə edib dövlətin qanunla qorunan mənafelərinə ağır nəticələrə səbəb olan zərər vurmasına, habelə onun tərəfindən tabeçiliyində işləyən vəzifəli şəxslərdən vasitəçi kimi istifadə etməklə müxtəlif rayonlarda əlillər üçün fərdi yaşayış və internat evlərinin tikinti-təmirinin aparılması işlərini yerinə yetirən fiziki və hüquqi şəxslərə ayrılmış pul vəsaitlərinin bir hissəsinin tələb edilərək alınmasına əsaslı şübhələr müəyyən edilib.
Həmçinin Səlim Müslümovun nazirliyin Dövlət Əmək Müfəttişliyi Xidməti tərəfindən ölkə ərazisində istehsal, sosial-məişət və iaşə təyinatlı obyektlərin inşası və yenidən qurulması zamanı əməyin mühafizəsi tələblərinə əməl olunması, onların istismara buraxılmasına razılığın verilməsi, əməyin mühafizəsi tələblərinə uyğunluğu ilə bağlı müəssisələrdə aparılmış yoxlamaların nəticələrinə görə müxtəlif vaxtlarda külli miqdarda pul vəsaitləri qismində təkrar rüşvət almasına dair məlumatlar əldə olunub. Eyni zamanda, daxili nəzarət şöbəsi tərəfindən ərazi strukturlarında aparılmış yoxlamaların nəticələri ilə bağlı onun həmin nazirliyin müxtəlif ərazi şöbələrinin rəhbərlərinin hər birindən 10 mindən 30 min manatadək külli miqdarda təkrar rüşvət almasına əsaslı şübhələr müəyyən edilib. Səlim Müslümov Azərbaycan Respublikası Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə təqsirləndirilən şəxs qismində məsuliyyətə cəlb olunaraq barəsində məhkəmənin qərarı ilə həbs qətimkan tədbiri seçilib. Dekabrın 14-də Səlim Müslümov barəsindəki həbs qətimkan tədbirinin müddəti bitir. Müddət bitənə qədər Səlim Müslümov barəsindəki cinayət işi yekunlaşdırılaraq məhkəməyə göndəriləcək.
Fazil Məmmədova gəlincə, o, vəzifədən çıxarılandan sonra isə həbs ediləcəyi xəbərləri bir-birini əvəzləyirdi. Vergilər naziri vəzifəsində Azərbaycan sahibkarlığına qarşı cinayətə bərabər addımlarının araşdırılması gündəmdə idi. Bu gün də Fazil Məmmədovun nazirliyi dövründə baş verən qanunsuzluqlar araşdırılacağı günü gözləyir.
Vəzifədən çıxarılandan sonra “öldü”, “xəstədir” xəbərləri bir-birini əvəzləsə də, bu gün Fazil Məmmədov rahat həyatını yaşayır. Onun səhhəti normaldır və hazırda Bakıda işləri ilə məşğuldur. Əlində nazir olduğu dövrdə cəmləşdirdiyi biznesi ilə məşğul olur. Fazil Məmmədov nazir olduğu dövrdə, 2010-cu ildə təsis edilmiş “Synergy Group” MMC Azərbaycanda fəaliyyət göstərən ən iri özəl investisiya şirkətlərindən biri idi.
“Synergy Group” MMC qeyri-neft sektorunda müxtəlif və inkişaf yönümlü şirkətlərdən ibarət idi. İstehsalat, tikinti, kənd təsərrüfatı, İKT, otelçilik, təhsil, səhiyyə və bank işi sahələri üzrə iri yatırımlar edirdi. Şirkətlərin böyük əksəriyyəti Bakıdan kənarda yerləşməklə, regionların sosial-iqtisadi inkişafında mühüm paya malik olmuşdu.
Vəzifədən çıxarılandan sonra, Fazil Məmmədovun sağlıq durumu qəfil pisləşmişdi. 2018-ci ilin əvvəllərində Gəncə Beynəlxalq Hospitalında tibb elmləri üzrə fəlsəfə doktoru İlyas Həsənovun nəzarəti altında müalicə alan Fazil Məmmədovun sonrakı müalicəsinin Türkiyədə davam etdirilməsi qərara alınmışdı. F.Məmmədov 2018-ci ilin iyununda ambulans təyyarə ilə Türkiyəyə aparılıb. O “American Hastahanesi”nin professorları Orhan Bilge və Mustafa Keremin nəzarətində olub. Müayinələr zamanı Fazil Məmmədovda pankreatit aşkarlanmışdı. Sabiq nazir Türkiyədə olarkən səhhətinin nisbətən stabilləşdiyi dövrlərdə məşhur “Çırağan Palace”da dincəlirdi. Onun istintaqa cəlb edilməsinin ertələnməsi ilk dövrlərdə sağlıq durumu ilə izah olunsa da, sonradan Fazil Məmmədovun topladığı sərvətin böyük hissəsi ilə vidalaşması hesabına azadlıqda qalması xəbərləri yayılmışdı.
Adı uzun illər Azərbaycan mətbuatının diqqət mərkəzində olan isimlərdən biri də Rövşən Əkbərovdur. 44 günlük Vətən Müharibəsi günlərində qeybə çəkilən, möhtəşəm zəfərdən sonra Rusiyaya yollanan Rövşən Əkbərov sonradan ölkəyə çağırıldı və qandallandı. Hazırda cəzaçəkmə müəssisəsində 10 illik həbs cəzasını çəkən Əkbərov barəsindəki hökmdən apelyasiya şikayəti verib. Rövşən Əkbərov məhkəməyə müraciətində bərəsində bəraət hökmünün çıxarılmasını istəyir.
Qeyd edək ki, rəsmi məlumata əsasən, Rövşən Əkbərovun 2001-ci il mayın 31-dən iyunun 1-nə keçən gecə Kiyev şəhəri, Deqtyaryov küçəsi 7 ünvanda yerləşən “Sikora” kafesində yeyib-içdikdən sonra, saat 04 radələrində həmin kafenin yaxınlığında Elçin Əliyev ilə aralarında yaranmış cüzi münaqişə səbəbindən xuliqanlıq niyyəti ilə sonuncunun ürək nahiyəsinə kəsici-deşici predmetlə xəsarət yetirərək Elçin Əliyevi qəsdən öldürməsinə əsaslı şübhələr müəyyən edilib. Rövşən Əkbərova Cinayət Məcəlləsinin 12.1, 120.2.2 (qəsdən adam öldürmə) və 12.1, 221.3-cü (xuliqanlıq) maddələri ilə ittiham elan edilərək, barəsində məhkəmənin qərarı ilə həbs qətimkan tədbiri seçilib. Onun barəsində olan cinayət işinin istintaqı başa çatdırılaraq baxılması üçün Bakı Hərbi Məhkəməsinə göndərilib. Məhkəmənin hökmü ilə o, 10 il müddətinə azadlıqdan məhrum edilib. Hökmə əsasən, Rövşən Əkbərovun ittiham olunduğu Cinayət Məcəlləsinin 12.1, 221.3-cü (xuliqanlıq) maddəsi ittihamdan xaric edilib. Zərərçəkmiş tərəfin mülki iddiası qismən təmin olunub. Belə ki, məhkəmə Rövşən Əkbərovdan 40 min 10 manat pulun tutularaq zərərçəkmişin hüquqi varisi Fəday Əliyevə verilməsi barədə qərar çıxarılıb. Eyni zamanda məhkəmə Rövşən Əkbərovun hərbi rütbəsini və fəxri adlarının alınmasını zəruri hesab etməyib. Buna səbəb işdə hərbi rütbənin alınması ilə bağlı təqdimat olmadığı göstərilib.
(Mənbə: Musavat.com)
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!