12-05-2024, 15:32
Rusiya sərhədçiləri Zəngəzurda keçid məntəqələrini bağlayır
Rusiya sərhədçiləri Ermənistanın Azərbaycanla sərhəddə yerləşən Zəngəzur vilayətindəki postlarını bağlamağa başlayıblar.
Onlar 44 günlük müharibədən sonra, 2020-ci ilin dekabrında vilayətin Gorusla Qafan rayonları arasında yerləşən Çakaten kəndində məskunlaşıblar.
Bundan əvvəl Ermənistan parlamentinin hakim fraksiyasının rəhbəri Hayk Konjorian Rusiya sərhədçilərinin Qeqarkunik, Sünik, Tavuş, Ararat və Vayots Dzor bölgələrindən çıxarıldığını bəyan edib.
Rusiya Prezidentinin mətbuat katibi Dmitri Peskov bildirib ki, Rusiya sərhədçilərinin Ermənistanın bir sıra rayonlarından çıxarılması iki ölkə liderlərinin Moskvada keçirilən görüşündə razılaşdırılıb.
12-05-2024, 15:20
400-dən çox namizəd dövlət qulluğu imtahanı verib
Dövlət İmtahan Mərkəzi (DİM) tərəfindən bu gün dövlət qulluğunda inzibati vəzifələrin A növünə aid olan AB və AC qruplarına uyğun vəzifələr üzrə dövlət qulluğuna qəbul imtahanı, həmçinin inzibati rəhbər vəzifələrə aid olan AB, AC və inzibati icraçı vəzifələrə aid olan BA, BB vəzifə qruplarına uyğun vəzifələr üzrə dövlət qulluğunda fəaliyyətin davam etdirilməsi imtahanı keçirilib.
Dövlət qulluğuna qəbul imtahanı, həmçinin dövlət qulluğunda fəaliyyətin davam etdirilməsi imtahanı (BB vəzifə qrupları istisna olmaqla) DİM-in yeni istifadəyə verilmiş elektron imtahanlar korpusunda təşkil olunub.
Burada namizədlər kompüter vasitəsilə imtahanı veriblər. Namizədlər imtahanı yekunlaşdırdıqda və ya imtahan üçün ayrılan vaxt başa çatdıqda nəticələrlə tanış olmaq imkanına malik olublar. Nəticələr həmçinin DİM-in saytında iştirakçıların şəxsi kabinetlərinə yerləşdirilib.
Xatırladaq ki, yeni imtahan korpusunda yaradılan bulud əsaslı texnoloji infrastruktur müasir innovativ “private cloud” platformasında qurulub. DİM tərəfindən hazırda keçirilən 45 növ imtahanın hər biri iştirakçı sayı nəzərə alınmaqla bu binada təşkil oluna bilər. İmtahan korpusunda yaradılan innovativ platforma xüsusi proqram təminatı və texnoloji infrastrukturdan ibarət olaraq, binadan kənarda da bütün ölkə üzrə elektron imtahanların keçirilməsi və idarə edilməsinə imkan verir.
Məhz bu texnologiya sayəsində Naxçıvanda keçirilən imtahan da elektron formada təşkil olunub və vahid mərkəzdən idarə olunub.
Yeni imtahan korpusunun fəaliyyətə başlaması biliyin qiymətləndirilməsi kimi kütləvi prosesin rəqəmsallaşdırılması istiqamətində atılan ilk addımdır.
Dövlət qulluğuna qəbul imtahanı
İmtahanda 111 namizəd iştirak edib. İmtahan nəticələrinə əsasən, AB4 altqrupu üzrə 3 nəfər, AC1 altqrupu üzrə 4 nəfər, AC2 altqrupu üzrə 5 nəfər, AC3 altqrupu üzrə 8 nəfər, AC4 altqrupu üzrə 14 nəfər olmaqla, ümumilikdə 34 namizəd tələb olunan şərtləri ödəyərək uğur qazanıb.
Dövlət qulluğunda fəaliyyətin davam etdirilməsi üzrə imtahan
Qeyd olunduğu kimi, AB, AC, BA vəzifə qrupları üzrə imtahan elektron formada Bakı və Naxçıvan şəhərlərində keçirilib. Bu imtahanda 88 namizəd iştirak edib. İmtahan nəticələrinə əsasən, AB1 altqrupu üzrə 1, AB4 altqrupu üzrə 3, AC2 altqrupu üzrə 1, AC3 altqrupu üzrə 6, AC4 altqrupu üzrə 4, BA1 altqrupu üzrə 4, BA2 altqrupu üzrə 13, BA3 altqrupu üzrə 24, BA4 altqrupu üzrə 14 nəfər olmaqla, ümumilikdə 70 namizəd tələb olunan şərtləri ödəyərək uğur qazanıb.
Elektron imtahanlarının nəticələri ilə bağlı Apellyasiya komissiyası 13-15 may tarixlərində saat 14:00-dan 17:00-dək Dövlət İmtahan Mərkəzində fəaliyyət göstərəcək (Ünvan: Bakı şəhəri, Nəsimi rayonu, Akademik Həsən Əliyev küçəsi, 299).
BB vəzifə qrupuna aid olan vəzifələr üzrə kağız daşıyıcılar vasitəsilə keçirilən imtahanın nəticələri 2 gün ərzində elan olunacaq.
12-05-2024, 14:31
Azərbaycanlı qol güləşçisi super ağır çəkidə Avropa çempionu oldu - FOTO
Azərbaycanlı qol güləşçisi, super ağır çəki dərəcəsində yarışan Tərxan Müzəffərov Slovakiyada keçirilən 33-cü Avropa Çempinonatının qızıl medalını qazanıb.
Tərxan Müzəffərov super ağır çəkidə İtaliya, Gürcüstan, Ukrayna, Macarıstan və Bolqarıstandan olan güclü rəqiblərini məğlub edərək 1-ci yerin sahibi olub.
Qeyd edək ki, 2014-cü ildən bəri qol güləşi üzrə super ağır çəki dərəcəsində Azərbaycana heç bir medal gəlmirdi.
Tərxan Müzəffərovun bu çəkidə qızıl medal qazanması ilə son 10 ildə super ağır çəkidə Azərbaycana ilk medal daxil olub.
12-05-2024, 14:19
Qəzza zolağında 2 gündə İsrailin 5 hərbçisi ölüb
Qəzza zolağında HAMAS-a qarşı aparılan hərbi əməliyyatda İsrail Ordusunun daha bir hərbçisi həlak olub.
Bu barədə İsrail Ordusu məlumat yayıb.
Qeyd edilib ki, “Naxal” briqadasının döyüşçüsü 20 yaşlı Ariel Tsimm Qəzza şəhərinin Zeytun rayonunda HAMAS silahlıları ilə atışmada ölüb. O, son iki gündə “Naxal” briqadasının həyatını itirən 5-ci hərbçisidir. Mayın 11-də briqadanın 4 döyüşçüsü bu məkanda baş verən partlayışda həlak olub.
Beləliklə, Qəzza zolağında quru əməliyyatı başlayandan bu günə qədər İsrail Ordusu 272 hərbçisini itirib. Ümumilikdə, keçən ilin payızında Qəzza sektorunda vəziyyətindən gərginləşməsindən sonra ötən dövr ərzində İsrail Ordusu 620 hərbçisini itirib.
12-05-2024, 13:33
Gürcüstanda tələbələr də etiraza başlayır
Gürcüstanda tələbələr tətilə və etiraz aksiyasına başlayacaqlar.
Bu barədə Tbilisi Dövlət Universitetinin tələbələri birgə açıqlama ilə çıxış ediblər.
Onlar bildiriblər ki, hökumətin “Xarici təsirin şəffaflığı haqqında” qanun layihəsini qəbul etmək niyyətinə cavab olaraq, bazar ertəsindən etibarən auditoriyalara daxil olmaqdan imtina edəcəklər və Gürcüstanda etiraz aksiyası keçirəcəklər.
Tələbələr müəllimlərini və digər universitetlərdən olan həmkarlarını da tətilə qoşulmağa çağırırlar.
Onlara artıq Şota Rustaveli adına Batumi Dövlət Universitetinin tələbələri, Qriqol Robakidze Universiteti (GRU), Qafqaz Universitetinin tələbə hərəkatı, GIPA Universiteti Tələbə Hərəkatı da qoşulub.
Eyni zamanda İliya Universitetinin professor və müəllimləri onlara qoşulacaqlarını bildiriblər.
12-05-2024, 12:40
Sabahın hava proqnozu
Mayın 13-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Bu barədə Milli Hidrometeorologiya Xidmətindən məlumat verilib.
Lakin gecə və axşam bəzi yerlərdə yağış yağacağı ehtimalı var. Arabir güclənən şimal-qərb küləyi əsəcək.
Havanın temperaturu gecə 12-15° isti, gündüz 17-19° isti olacaq. Atmosfer təzyiqi 754 mm civə sütunundan 759 mm civə sütununa yüksələcək. Nisbi rütubət 65-75 % olacaq.
Azərbaycanın rayonlarında bəzi yerlərdə arabir yağış yağacağı gözlənilir. Ayrı-ayrı yerlərdə leysan xarakterli intensiv olacağı, şimşək çaxacağı, dolu düşəcəyi, dağlıq ərazilərdə qara keçəcəyi ehtimalı var. Bəzi yerlərdə arabir duman olacaq. Arabir güclənən qərb küləyi əsəcək.
Havanın temperaturu gecə 12-16° isti, gündüz 17-21° isti, dağlarda gecə 2-6° isti, gündüz 6-10° isti olacaq.
12-05-2024, 11:34
Ermənistanda əsgərlikdən yayınma cəzaları sərtləşdirildi
Ermənistanda hərbi xidmətdən yayınmağın qarşısını almaq üçün təhsil qaydaları sərtləşdirilib.
Təhsil eksperti Serob Xaçatryan deyib ki, Elm və Təhsil Nazirliyi təhsil yaşına çatmış uşaqların orta məktəblərə qəbulunda çətinlik yaratmaqla ancaq oğullarının hərbi xidmətə çağırılmasını təxirə salmağa çalışan valideynlərin fırıldağının qarşısını almağa çalışır.
Qeyd edək ki, mövcud ümumtəhsil prosedurunda dəyişiklik edilib. Dəyişikliyə əsasən 2025-ci ildən başlayaraq 7 və 8 yaşlı uşaqlar məktəbə qəbul olunduqdan sonra birinci sinfə yox, yaşlarına uyğun olaraq dərhal ikinci və ya üçüncü sinfə gedəcəklər.
"İndi valideynlər uşaqlarını məktəbə bir il gec göndərsələr, bu onun üçün fəlakət olacaq. Uşaq dərhal ikinci sinfə getsə, təhsili sadəcə uğursuz olacaq. Ən istedadlı uşaq belə, həm birinci, həm də ikinci siniflərin proqramını dərhal mənimsəyə bilmir", - Xaçatryan deyib.
Mütəxəssis qeyd edib ki, övladını bir-iki il gec məktəbə göndərən valideynlər üçün əsas motivasiya oğlanlar üçün ordudan möhlətdir, valideynlər sadəcə olaraq 6 yaşın məktəb üçün tez olduğunu düşünür.
Ekspertin sözlərinə görə, yeni qaydaya görə, uşaq vaxtında məktəbə göndərilməsə, valideynlər yenə də istədiklərinə nail olmayacaqlar, çünki şagirdlər həmyaşıdları ilə eyni sinifdə oxuyacaq və məktəbi 18 yaşlarında bitirəcəklər.
"Nazirlik sərt qərar təklif edir. Ümid edir ki, valideynlər uşaqlar üçün çətinlik yaratmamaq üçün belə bir addım atmayacaqlar. Bu qərar yalnız valideynlər əvvəlki qaydanın artıq işləmədiyini görüb, uşaqlarını vaxtında məktəbə göndərsələr, müsbət təsir göstərəcək", - Xaçatryan deyib.
Psixoloji mərkəzlərdən birinin rəhbəri, psixoloq Miqrdat Madatyan məsələyə başqa tərəfdən yanaşıb. Onun fikrincə, nazirliyin qərarı birinci sinifdə təhsilin mənasını şübhə altına alır.
11-05-2024, 21:43
DİN-dən xəbərdarlıq
Daxili İşlər Nazirliyi ölkə vətəndaşlarına, o cümlədən sosial şəbəkə istifadəçilərinə xəbərdarlıq edib.
Bununla bağlı nazirlik sosial çarx hazırlayıb.
Xəbərdarlıqda deyilir: "Kibertəhlükələr gündən-günə artmaqdadır. Vətəndaşlar kütləvi dələduzluğa məruz qalır. Təhlükə var. Qaçılmaz deyil. Hər bir vətəndaş diqqətli olmalıdır. İnanmayın, yalandır. Yalan vədlər sosial şəbəkələrdə tüğyan edir. Zərərçəkməmək üçün çağırışlara biganə yanaşmayın".
11-05-2024, 21:18
Lənkəranda yenidən zəlzələ oldu
Lənkəranda yenidən zəlzələ olub.
AMEA nəzdində Respublika Seysmoloji Xidmət Mərkəzinin Zəlzələlərin Tədqiqatı Bürosundan saat 17:23-də qeydə alınan yeraltı təkanların maqnitudası 4.4 bala bərabər olub.
Ocağı 13 kilometr dərinlikdə yerləşən zəlzələ episentrdə 4 bal, ətraf rayonlarda 3 bala qədər hiss olunub.
11-05-2024, 19:36
Zəlzələ ilə bağlı daha bir qurum açıqlama yaydı
Mayın 11-də saat 17:23 radələrində Azərbaycanın cənub rayonlarında yeraltı təkanlar hiss olunub.
Hadisə ilə bağlı Lənkəran Şəhər İcra Hakimiyyəti yanında fəaliyyət göstərən Fövqəladə Hallar Komissiyası da məlumat yayıb.
Zəlzələ Lənkəran rayonu ərazisində 6, ətraf rayonlarda isə 5,3 bala qədər hiss olunub. Dərhal yerlərlə əlaqə yaradılıb, dəqiqləşdirmələr aparılıb. İndiyədək zəlzələ nəticəsində hər hansı dağıntı və ya xəsarət barədə məlumat daxil olmayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!