11-05-2024, 15:54
Gürcüstanın baş naziri: “Bizim yolumuz yalnız Avropa İttifaqınadır”
Gürcüstanın baş naziri İrakli Kobaxidze Avropa Gününə həsr olunmuş tədbirdə bildirib ki, ölkəsinin yolu yalnız Avropa İttifaqınadır və əsas xarici siyasət prioriteti Avropa İttifaqına (Aİ) üzvlükdir.
Kobaxidzenin sözlərinə görə, hökumət Avropa İttifaqında olduğu kimi, inkişaf və rifah səviyyəsinə nail olmaq istəyir.
“Avropada qanunun aliliyi, demokratiya, insan haqları və rifah dövləti kimi dəyərlər geri dönməz şəkildə bərqərar oldu. Avropanın mərkəzində, Düsseldorfda keçirdiyim üç ili xatırlayıram. Avropa mədəniyyətinin keyfiyyəti və rifahı haqqında o zaman ilk əldən aldığım təəssüratı xatırlayıram. Bu, çox böyük təəssüratdır və biz Gürcüstanda da məhz bu inkişaf səviyyəsinə və eyni rifah səviyyəsinə nail olmaq istəyirik.
Ona görə də təbii ki, bizim yolumuz ancaq Avropa İttifaqından keçir və bizim əsas xarici siyasət prioritetimiz Avropa İttifaqına üzvlüklə bağlıdır. Əminəm ki, bu gün Avropa İttifaqının üzləşdiyi iqtisadi və ya dəyər problemləri müvəqqətidir və bizim böyük avropalılar qarşısında borcumuzdur ki, hər birimiz 1950-ci il mayın 9-da əsası qoyulan Avropa İttifaqının bərpasına öz töhfəmizi verək. Biz bu məsuliyyətlə hərəkət etməliyik”, - deyə İrakli Kobaxidze bildirib.
11-05-2024, 14:57
Prezident Şuşanın azad edilməsindən danışdı: “...bu sıldırım qayalara dırmaşaraq...”
Azərbaycan Respublikasının Prezidenti İlham Əliyev və birinci xanım Mehriban Əliyeva Şuşa şəhərində “Xarıbülbül” VII Beynəlxalq Musiqi Festivalının açılışında iştirak ediblər.
Dövlətimizin başçısı tədbirdə çıxış edib.
Prezident İlham Əliyevin çıxışının tam mətnini təqdim edirik:
- Hörmətli ICESCO-nun Baş direktoru cənab əl-Malik.
Hörmətli qonaqlar, əziz dostlar.
Bildiyiniz kimi, Şuşa şəhəri İslam dünyasının mədəniyyət paytaxtı elan olunmuşdur. Bu qərara görə ICESCO-ya, onun rəhbərliyinə, ICESCO-ya üzv ölkələrə - qardaş ölkələrə öz təşəkkürümü bildirmək istəyirəm. Şuşa bu şərəfli ada layiq görülüb və biz bunu İslam dünyasının Azərbaycana növbəti dəstəyinin, hörmətinin əlaməti kimi qəbul edirik.
Birinci dəfə deyil ki, Azərbaycan şəhəri bu şərəfli ada layiq görülür. 2009-cu ildə Bakı, 2018-ci ildə isə Naxçıvan şəhəri də İslam dünyasının mədəniyyət paytaxtı elan edilmişdir. Bu dəfə isə Azərbaycanın mədəniyyət paytaxtı Şuşa bu şərəfli adı daşıyacaq.
Biz İslam həmrəyliyi istiqamətində ardıcıl fəaliyyət göstəririk. Azərbaycan İslam dünyasının birləşməsi, İslam həmrəyliyinin gücləndirilməsi üçün böyük səylər göstərir.
Ölkəmizdə bir çox beynəlxalq tədbirlər, musiqi festivalları, mədəni tədbirlər keçirilir. Təbii ki, Şuşa şəhərinin İslam dünyasının mədəniyyət paytaxtı olması bizə əlavə imkan verəcək ki, öz mədəniyyətimizi həm müsəlman ölkələrinin ictimaiyyətinə, həm də dünya ictimaiyyətinə çatdıraq.
Şuşa Azərbaycanın bir çox dahi mədəniyyət xadimlərinin vətənidir. Şuşada doğulmuş, burada boya-başa çatmış görkəmli və dahi mədəniyyət xadimləri bizim qürur mənbəyimizdir. Şuşa nəinki Azərbaycanda, bütövlükdə Qafqaz bölgəsində və daha böyük coğrafiyada tarixən mədəniyyət ocağı kimi tanınırdı. Şuşanın mədəniyyət xadimlərinin fəaliyyəti hər zaman böyük diqqət cəlb edirdi.
Biz 28 il Şuşasız yaşayırdıq. Həm şuşalılar, həm bütün Azərbaycan xalqı bu illəri mənəvi əzab illəri kimi öz yaddaşlarında saxlayırlar və saxlayacaqlar. Dünən Şuşa şəhərinin dirçəldilməsi istiqamətində növbəti addım atılmışdır, ilk sakinlər uzun fasilədən sonra öz doğma şəhərinə qayıdıb burada məskunlaşmışlar. Şuşanın tarixi simasının bərpası istiqamətində fəal işlər gedir. Şuşa, sözün əsl mənasında, dirçəlir. Şuşanın bir çox tarixi və dini abidələri işğal dövründə işğalçılar tərəfindən tamamilə dağıdılmışdır. Hazırda dörd məscid yenidən qurulub, digər məscidlərdə təmir-bərpa işləri aparılır.
Bu işğala baxmayaraq, Şuşa öz ruhunu - Azərbaycan ruhunu qoruyub saxlaya bildi. Biz Şuşa azad olunandan sonra Şuşaya qayıtdıqda bir daha hər birimiz bunu görmüşük və dəfələrlə görürük. Şuşaya gələn hər bir insan əyani şəkildə görür ki, burada Azərbaycan ruhu var. Şuşa işğal, əsarət dövründə əyilmədi və biz – Azərbaycan xalqının nümayəndələri Şuşaya qayıtmalı idik. Qan tökərək, şəhidlər verərək, - Allah bütün şəhidlərimizə rəhmət eləsin, - Şuşanın azad edilməsi, şəhər döyüşləri nəticəsində azad edilməsi tariximizin parlaq səhifəsidir.
Qeyd etdiyim kimi, Şuşa mədəniyyət ocağı kimi tanınsa da, hazırda, eyni zamanda, qəhrəmanlıq rəmzidir, zəfər rəmzidir və sülhün rəmzidir. Çünki məhz Şuşanın azad olunmasından sonra işğalçılar tam anladılar ki, müqavimət göstərmək onlara heç nə verməyəcək və beləliklə, bu gün biz Şuşanı tam haqlı olaraq sülhün rəmzi kimi qiymətləndirə bilərik.
Mən xarici qonaqları səmimiyyətlə salamlayıram. Builki “Xarıbülbül” festivalı bu hadisəyə - Şuşanın İslam dünyasının mədəniyyət paytaxtı elan olunmasına həsr edilib. Bu gün bir çox müsəlman ölkələrinin kollektivləri bizim üçün müqəddəs olan Cıdır düzündə öz məharətlərini ifadə edəcəklər. Bu, birlik bayramı olacaq, bu, həmrəylik bayramı olacaq. Eyni zamanda, Azərbaycan xalqının əyilməz ruhunu nümayiş etdirən bu məkan həm işğala qədər, həm işğal dövründə, həm də işğala son qoyulandan sonra hər birimiz üçün doğma və əzizdir. Bizim qəhrəman əsgər-zabitlərimiz, bax, bu sıldırım qayalara dırmaşaraq yüngül silahlarla şəhəri düşməndən azad etmişlər.
Əminəm ki, bundan sonra Azərbaycan torpaqlarında daim sülh olacaq. Arzum budur, əminəm, bütün Azərbaycan xalqının arzusu budur ki, qoy, heç vaxt bu səma altında bir daha top səsləri eşidilməsin. Qoy, bundan sonra burada ancaq musiqi sədaları səslənsin. Sağ olun.
11-05-2024, 14:23
Saxlanılan eks-deputat sərbəst buraxıldı
Ermənistanın sorğusu əsasında Rusiyada saxlanılan keçmiş deputat Tiqran Urixanyan sərbəst buraxılıb.
Bu barədə Ermənistan KİV-ləri məlumat yayıb.
Məlumatda eks-deputatın sərbəst buraxılma səbəbi açıqlanmayıb.
Ermənistanda Tiqran Urixanyanın barəsində vəzifəli şəxs tərəfindən qanunsuz sahibkarlıq fəaliyyətinin həyata keçirilməsi ittihamı ilə cinayət işi qaldırılıb.
11-05-2024, 14:14
Ceyhun Bayramovla Ararat Mirzoyan razılığa gəldilər
10-11 may 2024-cü il tarixlərində Azərbaycan Respublikasının xarici işlər naziri Ceyhun Bayramov və Ermənistan Respublikasının xarici işlər naziri Ararat Mirzoyan arasında Qazaxıstanın Almatı şəhərində danışıqlar aparılıb.
Bu barədə Azərbaycan Xarici İşlər Nazirliyi (XİN) məlumat yayıb.
Məlumata görə, nazirlər delimitasiya üzrə irəliləyişi və bununla bağlı əldə edilmiş razılaşmaları alqışlayıblar. Nazirlər və onların nümayəndə heyətləri “Azərbaycan və Ermənistan arasında sülhün və dövlətlərarası münasibətlərin təsis edilməsi haqqında ikitərəfli Saziş” layihəsinin müddəalarının müzakirəsini davam etdiriblər.
Tərəflər hələ də fikir ayrılıqlarının mövcud olduğu açıq qalan məsələlər üzrə danışıqları davam etdirməyə razılaşıblar.
Səfər çərçivəsində, nazirlər Qazaxıstanın Baş nazirinin müavini - xarici işlər naziri Murat Nurtleu ilə ayrı-ayrılıqda ikitərəfli, o cümlədən üçtərəfli formatda görüşüblər.
Nazir Ceyhun Bayramov Azərbaycan və Ermənistan arasında danışıqlara ev sahibliyi etdiyinə görə Qazaxıstan tərəfinə minnətdarlığını bildirib.
11-05-2024, 13:54
Zakir Həsənov Prezidentin xəbərdarlığı ilə bağlı göstərişlər verdi
Mayın 11-də Azərbaycan Respublikasının müdafiə naziri general-polkovnik Zakir Həsənovun rəhbərliyi ilə toplantı keçirilib.
Bu barədə Müdafiə Nazirliyi məlumat yayıb.
Əvvəlcə mərhum dövlət başçısı Heydər Əliyevin və torpaqlarımızın suverenliyi, ərazi bütövlüyü uğrunda şəhid olan Vətən övladlarının xatirəsi bir dəqiqəlik sükutla yad edilib.
Müdafiə naziri mayın 10-da Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Şuşada birinci yaşayış kompleksinin açılışı zamanı şəhərə köçmüş ilk sakinlərlə görüşündəki çıxışından irəli gələn tapşırıqları toplantı iştirakçılarına çatdırıb.
Ali Baş Komandanın çıxışının Azərbaycan Ordusunda bütün şəxsi heyətə çatdırılmasının əhəmiyyətini qeyd edən nazir bununla bağlı aidiyyəti üzrə müvafiq göstərişlər verib.
11-05-2024, 13:26
Sabahın havası
Mayın 12-də Azərbaycanda gözlənilən hava şəraitinin proqnozu açıqlanıb.
Bu barədə Milli Hidrometeorologiya Xidmətindən məlumat verilib.
Proqnoza görə, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi, lakin axşam bəzi yerlərdə arabir yağış yağacağı gözlənilir. Gecəyə doğru intensivləşəcəyi, şimşək çaxacağı ehtimalı var. Səhər bəzi yerlərdə duman olacaq. Mülayim cənub-qərb küləyi axşama doğru arabir güclənən şimal-qərb küləyi ilə əvəz olunacaq.
Havanın temperaturu gecə 13-17°, gündüz 20-25° olacaq. Atmosfer təzyiqi 756 mm civə sütunundan 753 mm civə sütununa enəcək. Nisbi rütubət gecə 70-75 %, gündüz 55-60% olacaq.
Azərbaycanın rayonlarında şimal və qərb rayonlarından başlayaraq havanın bəzi yerlərdə arabir yağıntılı olacağı gözlənilir. Ayrı-ayrı yerlərdə leysan xarakterli intensiv olacağı, şimşək çaxacağı, dolu düşəcəyi, axşam yüksək dağlıq ərazilərdə sulu qara keçəcəyi ehtimalı var. Bəzi yerlərdə arabir duman olacaq. Qərb küləyi ayrı-ayrı yerlərdə arabir güclənəcək.
Havanın temperaturu gecə 13-17°, gündüz 25-30°, dağlarda gecə 3-8°, gündüz 10-15° olacaq.
11-05-2024, 12:46
Daha bir tələbə qəfil vəfat etdi
Azərbaycanda daha bir tələbə vəfat edib.
Bakı Slavyan Universitetinin Şərqi Avropa Dilləri fakültəsinin II tədris ili tələbəsi Bayramova Sevinc Sirac qızı vaxtsız dünyasını dəyişib.
Məlumatı Bakı Slavyan Universiteti yaysa da, ölüm səbəbi açıqlanmayıb.
Allah rəhmət eləsin!
11-05-2024, 12:42
Ermənistanda etirazlar davam edir: bu gün 50 nəfər saxlanılıb
Ermənistanda Baş nazir Nikol Paşinyanın istefası tələbilə etiraz aksiyaları davam edir.
İrəvanda bu gün keçirilən itaətsizlik aksiyasının 50 iştirakçısı saxlanılaraq Polis bölmələrinə aparılıb.
Bu barədə Milli Cəbhə Telegram kanalı məlumat yayıb.
Saxlanılanlara hüquqi yardım göstərilməsi üçün müxalifət deputatları polis idarələrinə gediblər.
Ermənistandakı etiraz aksiyalarına Erməni Apostol Kilsəsinin arxiyepiskopi Baqrat Srbazan rəhbərlik edir. Onun arxasında bütün ermənilərin katalikosu II Qaregin və eks-prezident Robert Köçəryanın dayandığı bildirilir.
Aksiya keçirənlər Azərbaycanla sərhədlərin demarkasiyasına etiraz edirlər.
11-05-2024, 12:15
Prezident və birinci xanım Şuşadakı “Xarıbülbül” Festivalının açılışında
Azərbaycan Respublikasının Prezidenti İlham Əliyev və birinci xanım Mehriban Əliyeva Şuşa şəhərində “Xarıbülbül” VII Beynəlxalq Musiqi Festivalının açılışında iştirak edirlər.
Dövlətimizin başçısı tədbirdə çıxış edib.
Sonra ICESCO-nun Baş direktoru Salim bin Məhəmməd əl-Malik çıxış edib.
11-05-2024, 12:00
Göldə boğulan tələbələr dəfn olundu
Ötən gün Naxçıvanda göldə boğularaq ölən tələbələr dəfn olunub.
2005-ci il təvəllüdlü Fəttah Zəkəriyəyev və 2006-cı il təvəllüdlü Əli Mehrəliyevin nəşləri dəfn olunmaq üçün doğulduqları Astara rayonunun Pensər kəndinə gətirilib.
Onlar Pensər kənd qəbiristanlığında torpağa tapşırılıb.
Astara rayonu Pensər kənd sakinləri olan 2005-ci il təvəllüdlü Fəttah Zəkəriyəyev və 2006-cı il təvəllüdlü Əli Mehrəliyev gecə saatlarında Naxçıvan şəhərində yerləşən “Bazar gölü”nə düşüb və boğulublar.
Naxçıvan Muxtar Respublikası Fövqəladə Hallar Nazirliyinin əməkdaşları meyitləri sudan çıxarıblar.
Hər iki gəncin Naxçıvan Dövlət Universitetinin tələbələri olduğu bildirilir.
Fakt üzrə Naxçıvan şəhər prokurorluğunda araşdırma aparılır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!