7-05-2024, 20:50
Küveyt əmiri Türkiyədə rəsmi səfərdədir
Küveyt Əmiri Şeyx Məşəl əl-Əhməd əl-Cabir əs-Sabah Türkiyədə rəsmi səfərdədir.
Səfər çərçivəsində tərəflər arasında iqtisadiyyat, ticarət, tikinti, səhiyyə, turizm, enerji və müdafiə sənayesi sahələrində mövcud əməkdaşlığın daha da gücləndirilməsi məqsədilə yeni müqavilələr imzalanacaq.
İki ölkə arasında diplomatik əlaqələrin qurulmasının 60-cı ildönümündə həyata keçirilən səfər 2023-cü il dekabrın 16-da vəzifəsinin icrasına başlayan Küveyt Əmirinin qeyri-ərəb ölkəsinə ilk rəsmi xarici ziyarətidir. Bu, eyni zamanda yeddi illik fasilədən sonra Küveytdən Türkiyəyə əmir səviyyəsində ilk səfərdir.
Türkiyə və Küveyt rəsmiləri arasında keçiriləcək görüşlərdə ikitərəfli əlaqələr, o cümlədən ticarət, müdafiə sənayesi, turizm və investisiya kimi mühüm sahələr, eləcə də İsrail-Fələstin qarşıdurması başda olmaqla regional məsələlər müzakirə olunacaq.
Ötən il Küveytlə Türkiyə arasındakı ticarət həcmi təxminən 700 milyon ABŞ dolları təşkil edib. Hazırda əməkdaşlığın diversifikasiyası, yeni əməkdaşlıq mexanizmləri vasitəsilə qarşılıqlı ticarət və investisiyaların artırılması qarşıya məqsəd qoyulub.
Küveyt Xəbər Agentliyinin (KUNA) məlumatına əsasən, hazırda Türkiyədə 400-dən çox Küveyt şirkəti, Küveytdə isə 50-yə yaxın türk şirkəti fəaliyyət göstərir. Bunların əksəriyyəti inşaat sektorunu əhatə edir. Bu günə qədər Türkiyənin Küveytdə bu sahə üzrə həyata keçirdiyi layihələrin dəyəri 9,2 milyard dollara, Küveytin Türkiyəyə yatırdığı birbaşa investisiyaların dəyəri isə 2 milyard dollara çatıb.
Türkiyə Küveyt vətəndaşlarının turizm, müalicə və daşınmaz əmlak investisiyaları üçün ən çox üstünlük verdiyi ölkələrdəndir. Küveyt vətəndaşları Türkiyədə daşınmaz əmlak alan əcnəbilər arasında ilk onluqdadır.
7-05-2024, 19:49
Şəhidimizin nəşi 30 ildən sonra doğma kəndində dəfn edildi - FOTO
Bir müddət əvvəl Dövlət Komissiyası tərəfindən nəşi tapılan şəhidlərdən biri də Qəbələnin Qəmərvan kənd sakini Asim Nadir oğlu Səfərovdur.
Bu gün saat 16:00 radələrində şəhidin nəşi 30 ildən sonra doğulduğu kəndə, ata yurduna gətirilib.
Şəhidlə ata yurdunda vida mərasimi keçirildikdən sonra nəşi kənd qəbiristanlığına gətirilib. Burada şəhid üçün cənazə namazı qılınıb və dəfn edilib. Dəfn mərasimində kənd sakinləri, şəhidin ailə üzvləri, qazilər, eləcə də Qəbələ Rayon İcra Hakimiyyətinin vəzifəli şəxsləri, rayon hüquq-mühafizə orqanlarının əməkdaşları, ictimaiyyət nümayəndələri iştirak ediblər.
Şəhidin böyük qardaşı Aqil Səfərov bildirib ki, ailədə beş qardaş, iki bacı olublar. Asim 18 yaşı tamam olan kimi hərbi xidmətə yola salınıb. O, cəmi dörd ay xidmət edəndən sonra Füzuli rayonunun Aşağı Əbdürrəhmanlı kəndində itkin düşüb. 30 il müddətində ailə üzvləri qardaşlarını axtarmaq, onun izinə düşmək üçün bildikləri bütün vasitələrdən istifadə etməyə çalışıblar.
Aqil Səfərov bütün ailə üzvləri adından Azərbaycan dövlətinə, Prezident İlham Əliyevə minnətdarlıq edib.
Yeri gəlmişkən xatırladaq ki, Qəmərvan kəndi Qəbələdə ən çox şəhidi olan yaşayış məntəqələrindən biri kimi tanınır. Belə ki, bu ucqar yaşayış məntəqəsinin 17 şəhidi var ki, onlardan da 6 nəfəri itkindir. Artıq bu gün onlardan birinin nəşi tapılaraq dəfn edilib. İndi digər ailələrin də övladlarının nəşinin tapılacağına ümidləri artıb.
Qeyd edək ki, Birinci Qarabağ müharibəsində itkin düşən Asim Səfərov Beyləqan rayonunun Şəfəq qəsəbəsində yerləşən “Peyğəmbər” qəbiristanlığında naməlum şəhid kimi basdırılmışdı.
7-05-2024, 17:51
Kapital Bank-ın Laçın filialı açıldı
Ölkənin birinci Bankı Kapital Bank-ın Laçın filialının açılışı baş tutub.
Laçın şəhəri, Heydər Əliyev küçəsi 87 ünvanında fəaliyyətə başlayan filialın açılışında prezidentin Laçın şəhərində xüsusi nümayəndəliyinin rəsmisi Hüseyn Quliyev, Dövlət Məşğulluq Agentliyinin Laçın rayonu üzrə nümayəndəsi İlqar Təhməzov, Bərpa, Tikinti və İdarəetmə Xidmətinin əməkdaşları, bankın nümayəndələri və Laçın sakinləri iştirak ediblər.
Yeni konsepsiya əsasında təqdim edilən Laçın filialı həftə içi 5 gün saat 9:00-dan 18:00-dək müştərilərə ən yüksək səviyyədə xidmət göstərəcək. Filial bunun üçün bütün zəruri şəraitə və imkanlara malikdir. Burada Laçın sakinlərinə əmanətlər, plastik kartlar, müxtəlif növ kreditlər və digər məhsullar, hesablaşma-kassa əməliyyatları, valyuta mübadiləsi kimi əməliyyatlar da daxil olmaqla bütün növ bank xidmətləri təklif olunur.
Yeni filalın açılışı ilə Kapital Bank həm də Laçında fəaliyyətə başlayan ilk bank kimi tarixə düşdü. Ölkədə ən böyük filial şəbəkəsinə malik bankın filiallarının sayı Laçın filialının açılışının ardından 119-a çatdı. Tezliklə bankın Xankəndi filialının da açılışı planlaşdırılır.
Ölkənin birinci bankı olan Kapital Bank PAŞA Holding-ə daxildir və Azərbaycanda ən böyük filial şəbəkəsi, 119 filialı və 53 şöbəsi ilə müştərilərin xidmətindədir. Bankın məhsul və xidmətləri barədə daha ətraflı məlumat almaq üçün //kapitalbank.az saytına, 196 Sorğu Mərkəzinə və ya Bankın müxtəlif sosial şəbəkələrdə olan səhifələrinə müraciət edə bilərsiniz. Nağd pul krediti sifarişi üçün— //kbl.az/prgtk, Birbank kartı sifarişi üçün — //kbl.az/prcrc.
7-05-2024, 17:49
Slovakiya Baş nazirinin Azərbaycana səfəri başa çatdı
Slovakiya Respublikasının Baş naziri Robert Fitsonun Azərbaycan Respublikasına rəsmi səfəri mayın 7-də başa çatıb.
Hər iki ölkənin Dövlət bayraqlarının dalğalandığı Heydər Əliyev Beynəlxalq Aeroportunda Baş nazirin şərəfinə fəxri qarovul dəstəsi düzülmüşdü.
Slovakiyanın Baş naziri Robert Fitsonu hava limanında Azərbaycan Respublikası Baş nazirinin müavini Əli Əhmədov, xarici işlər nazirinin müavini Fariz Rzayev və digər rəsmi şəxslər yola saldılar.
7-05-2024, 17:42
Etirazçılar İrəvana doğru irəliləyir - Paşinyandan xəbərdarlıq
Ermənistanın Azərbaycanla sərhəddəki Kirants kəndindən başlayan etiraz yürüşünün iştirakçıları Çarentsavan şəhərinə çatıblar.
Etirazçılar sabah saat 13:00-da Çarentsavandan Abovyan şəhərinə çatmağı planlaşdırırlar.
Mayın 4-də başlayan yürüşə Erməni Apostol Kilsəsinin Tavuş Yeparxiyasının Primatı, arxiyepiskop Baqrat Qalstanyanın rəhbərlik edir.
Etirazçılar mayın 9-da İrəvanın Azadlıq meydanına daxil olmağı planlaşdırırlar.
Ermənistanın baş naziri Nikol Paşinyan mayın 7-də keçirdiyi mətbuat konfransında bildirib ki, bütün ermənilərin katolikosu bu gün faktiki olaraq siyasi hərəkata başçılıq edir, onun son benefisiarı eks-prezident Robert Köçəryandır.
Bununla da Paşinyan Erməni Apostol Kilsəsinin Tavuş yeparxiyasının primatı Baqrat Qalstanyanın rəhbərlik etdiyi və Tavuşda delimitasiyaya qarşı yönəlmiş etiraz yürüşünə eyham vurub.
Onun fikrincə, bu hərəkatın məqsədi eks-prezident Robert Köçəryanın hakimiyyətə qayıtmasıdır.
Baş nazir bildirib ki, hələ 2021-ci ildə “Hayastan” blokunun lideri - ikinci prezident Robert Köçəryan kilsə vasitəsilə Ermənistanda hakimiyyət dəyişikliyi ssenarisini təqdim edib.
Paşinyan hesab edir ki, əgər katolikos II Qaregin hansısa hərəkata xeyir-dua verirsə, deməli, bu, hərəkatın liderliyindən başqa bir şey deyil. Onun sözlərinə görə, katolikosun icazəsi və hətta göstərişi olmadan keşiş siyasi mətnləri tələffüz edə bilməz.
Baş nazir İrəvana doğru yürüyən etirazçılara xəbərdarlıq da edib. Paşinyan mətbuat konfransında inkar etməyib ki, etirazçılar qanunsuz hərəkət edəcəkləri təqdirdə onlara qarşı güc tətbiq oluna bilər.
Xatırladaq ki, aprelin 19-da Ermənistan və Azərbaycan sərhədin Tavuş vilayəti istiqamətindən delimitasiyaya başlamaq və iyulun 1-nə kimi əsasnamə layihəsinin təsdiqini başa çatdırmaq barədə razılığa gəlib.
Daha sonra Tavuşun sərhəd kəndlərinin İrəvanla Bakı arasında razılaşmalardan narazı olan sakinləri etiraz aksiyalarına başlayıb.
7-05-2024, 17:30
Paşinyanın müavini Quterreşin köməkçisi ilə danışıqlar apardı
Ermənistan Respublikası baş nazirinin müavini Mher Qriqoryan BMT baş katibinin köməkçisi, BMT İnkişaf Proqramının Avropa və MDB üzrə regional direktoru İvana Zivkoviçlə görüşüb.
Bu barədə "Armenpress" məlumat yayıb.
"Enerjiyə qənaət, rəqəmsallaşma sahəsində birgə proqramlar və dövlət idarəçiliyi sahəsində aparılan islahatlar, əməkdaşlığın inkişafı üçün mümkün istiqamətlər müzakirə edilib", - deyə qeyd olunub.
Yeni milli proqram sənədinin hazırlanmasında hədəf sahələrin müəyyənləşdirilməsinin vacibliyi qeyd edilib.
7-05-2024, 17:27
[b]"ASAN TV"yə yeni baş redaktor təyin edildi[/b]
"ASAN TV" və "ASAN Radio"ya yeni baş redaktor təyin edilib.
Bu barədə Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin (“ASAN xidmət”) İctimaiyyətlə əlaqələr şöbəsinin müdiri Elnur Niftəliyev məlumat verib.
O bildirib ki, bu vəzifəyə Elvin Dəmirli gətirilib. Jurnalist bundan əvvəl ATV, "Space" kimi kanallarda, həmçinin İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətində çalışıb.
Qeyd edək ki, "ASAN Radio" 2015-ci ildə, "ASAN TV" isə bu il yaradılıb.
7-05-2024, 17:22
Əli Əsədov Anıtqəbiri ziyarət edib - FOTO
Türkiyədə rəsmi səfərdə olan Azərbaycan Respublikasının Baş naziri Əli Əsədovun rəhbərlik etdiyi nümayəndə heyəti mayın 7-də Ankarada Türkiyə Respublikasının banisi Mustafa Kamal Atatürkün dəfn olunduğu məqbərəni - Anıtqəbiri ziyarət edib.
Nazirlər Kabinetindən verilən xəbərə görə, Baş nazir Əli Əsədov Mustafa Kamal Atatürkün məzarı önünə əklil qoyub. Türk dünyasının böyük oğlunun əziz xatirəsi yad edilib. Baş nazir Anıtqəbirin Xatirə kitabına ürək sözlərini yazıb.
7-05-2024, 17:15
Qırğızıstan-Tacikistan sərhədində insident
Qırğızıstan və Tacikistan sərhədində atışma baş verib.
Bu barədə Qırğızıstan Sərhəd Xidməti məlumat yayıb.
İnsidentin detalları araşdırılır.
7-05-2024, 16:59
Azərbaycanlı güləşçinin oğlu ABŞ-da ilin ən yaxşısı seçildi
ABŞ-da 2023-cü ilin ən yaxşı sərbəst güləşçilərinin adları açıqlanıb.
ABŞ Güləş Federasiyasının tərtib etdiyi siyahıda ilk pilləni Azərbaycanın veteran güləşçisi Vüqar Orucovun oğlu Vitali Orucov (61 kiloqram) tutub. Həmyerlimiz ilk dəfə bu titula layiq görülüb.
O, daha əvvəl ABŞ-ın ikiqat olimpiya və dördqat dünya çempionu Con Smitin adına daşıyan mükafata sahib çıxıb.
Qeyd edək ki, ötən il dünya çempionatında debüt edən V. Orucov qızıl medal qazanıb. O, həmçinin Panamerika və ABŞ Açıq çempionatlarının qalibi olub. Azərbaycanlı güləşçi zədə səbəbindən “Paris-2024” Yay Olimpiya Oyunlarına lisenziya xarakteri daşıyan yarışlarda iştirak edə bilməyib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!