13-01-2025, 17:23
Cəbrayıla köçənlərə evlərin açarları təqdim olundu
Bu gün növbəti köç karvanı ilə yola salınan 39 ailə olmaqla 165 nəfər Cəbrayıl şəhərinə çatıb. Ailələrə evlərinin açarları təqdim olunub.
Cəbrayıla qədəm qoyan ailələr qarşılandıqdan sonra onlara ANAMA əməkdaşları tərəfindən mina və partlamamış silah sursatların təhlükəsi barədə ətraflı məlumat verilib. Tanımadıqları naməlum əşyalar və cisimlərdən uzaq durmaları və belə hallarla qarşılaşdıqları zaman aidiyyəti qurumlara xəbər vermələri tövsiyə olunub.
Açarların təqdim edilməsi mərasimində, Cəbrayıl, Qubadlı və Zəngilan rayonlarında Azərbaycan Respublikası Prezidentinin Xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin rəsmiləri və digər şəxslər iştirak ediblər. Ailələr sevinc hissi ilə açarları təhvil alıb və öz evlərində məskublaşıblar. Köçürülən ailələrin Cəbrayıl şəhərində dövlətimizin başçısının göstərişi əsasında yenidən tikilən evlərdə məskunlaşması üçün bütün şərait yaradılıb.
Qeyd edək ki, hazırda Qarabağda və Şərqi Zəngəzurda, ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən ümumilikdə 30 minə yaxın insan yaşayır.
13-01-2025, 17:10
Yaponiyada güclü zəlzələ - Sunami xəbərdarlığı
Yaponiyanın cənub-qərbində 6,9 maqnitudalı zəlzələ baş verib.
Bu barədə Yaponiya Meteorologiya Agentliyi məlumat yayıb.
Zəlzələdən sonra sunami ilə bağlı xəbərdarlıq edilib.
Yeraltı təkanların dərinliyi 30 km olaraq qeydə alınıb.
13-01-2025, 17:02
Bakıda 3 nəfərin 23 min manatı dələduzluqla ələ keçirilib
Nəsimi rayonunda dələduzluq edən 2 şəxs saxlanılıb. Bu barədə DİN-dən bildirilib.
Nəsimi rayonu ərazisində 3 nəfərin ümumilikdə 23 min manatdan çox pul vəsaitinin dələduzluq yolu ilə ələ keçirilməsi barədə polisə məlumatlar daxil olub.
Keçirilən tədbirlərlə dələduzluq əməllərini törətməkdə şübhəli bilinən - əvvəllər eyni əmələ görə məhkum olunmuş 44 yaşlı T.Yunisov və 42 yaşlı S.Səmədov polis əməkdaşları tərəfindən müəyyən olunaraq saxlanılıblar.
Araşdırmalar aparılır.
13-01-2025, 17:00
Suriyada qadağalar ləğv edildi: mağazalarda "Pepsi", "Snickers" satılır
Suriyada Bəşər Əsəd rejiminin süqutundan sonra yeni hakimiyyət ölkəyə xarici məhsulların idxalına qoyulan məhdudiyyətləri aradan qaldırıb.
Bu barədə "Financial Times" nəşri yazıb.
Bildirilir ki, Suriya mağazalarının piştaxtalarına xaricdən gətirilən "Pepsi" içkisi, "Pringles" çipsləri, "Twix" və "Snickers" şokaladları, "Heinz" ketçupu, Livanda yetişdirilən banan və s. görmək mümkündür.
Bəşər Əsədin hakimiyyəti dövründə Suriyaya qarşı tətbiq edilən beynəlxalq sanksiyalar səbəbindən xarici malların idxalı çətin idi, hətta hakimiyyət bu məhsulların gətirilməsini qadağan etmişdi. Suriyada qonşu Livan şirkətləri ilə və ya başqa adlar altında müştərək müəssisələr vasitəsilə çoxlu xarici məhsullar istehsal olunurdu.
Bundan başqa, Bəşər Əsədin dövründə büdcə gəlirlərini artırmaq üçün bəzi idxal mallarına rüsumlar artırılıb. Məsələn, keçən il "iPhone"lar üçün rüsum 900 dollara qədər idi.
13-01-2025, 16:53
Paşinyan Avropa Şurasının yeni sədri ilə Azərbaycan haqda danışdı
Ermənistanın Baş naziri Nikol Paşinyan Avropa İttifaqı Şurasının sədri Antonio Kosta ilə telefon danışığı aparıb.
Bu barədə Ermənistan mediası məlumat yayıb.
Paşinyan Avropa İttifaqı Şurasının sədrini yüksək vəzifəyə seçilməsi münasibətilə təbrik edib, ona uğurlar arzulayıb, Ermənistan-Avropa İttifaqı əməkdaşlığının hazırkı durumundan məmnunluğunu bildirib.
Kostanın sualına cavab olaraq baş nazir Paşinyan Ermənistan-Azərbaycan sülh prosesinin hazırkı vəziyyəti barədə ona məlumat verib və İrəvanın sülh gündəliyindən kənara çıxmayacağını vurğulayıb.
Həmsöhbətlər gələcəkdə müvafiq vaxtlarda dialoqun davam etdirilməsi barədə razılığa gəliblər.
13-01-2025, 16:27
Buraxılış imtahanlarında hansı yenilik olacaq? - DİM-dən AÇIQLAMA
2025-ci ildə keçiriləcək bəzi imtahanların qrafiki və qeydiyyat tarixləri elan olunub. Belə ki, bu il tam (11 illik) orta təhsil səviyyəsi üzrə buraxılış imtahanı iki zona olmaqla 2 və 9 mart tarixlərində keçiriləcək. İmtahandan 1 ay öncə zonalara aid olan şəhər və rayonlar haqqında məlumat paylaşılacaq.
Dövlət İmtahan Mərkəzini (DİM) mətbuat katibi Xanlar Xanlarzadə imtahanlarla bağlı bir sıra detalları açıqlayıb.
Onun sözlərinə görə, 9-cu və 11-ci sinif üzrə buraxılış imtahanında fənnlər olduğu kimi qalacaq:
“Ancaq 9-cu sinifdə xarici dil fənnləri üzrə şagirdlərin biliklərinin qiymətləndirilməsində yeni bir tapşırıqdan istifadə olunacaq. Tapşırıqda 3 şəkil təqdim olunur, həmin şəkillər arasında əlaqə var. İmtahan iştirakçısı da şəkillər arasındakı əlaqəni müəyyən etməlidir”.
13-01-2025, 16:22
Mars və Yer bir-birinə maksimal yaxınlaşacaq
Bu günlərdə Marsı gecə səmasında adi gözlə asanlıqla izləmək mümkündür.
Bu barədə Şamaxı Astrofizika Rəsədxanasından məlumat verilib.
Qeyd edilib ki, hesablamalara əsasən, Mars və Yer arasında maksimal yaxınlaşma 15 yanvar tarixində baş verəcək və bu tarixdən sonra da qırmızı planet uzaqlaşana qədər bir müddət gecə səmasında parlamağa davam edəcək.
Çünki planet Yerə maksimum yaxınlaşıb və Mars gecə səmasında qırmıztıl parlaq “ulduz” kimi görünür.
Planetlər qarşıdırmada Yerə yaxın konfiqurasiyada olsalar da, hər iki planet öz orbitinin perihelisində olduqda Mars Yerə maksimum yaxınlaşa bilir. Növbəti belə yaxınlaşma isə 27 iyun 2033-cü ildə baş verəcək.
Əlavə olaraq isə bu axşam ilin ilk bədrlənmiş Ayını görəcəyik. Ayın diski 99.5% işıqlanmış olacaq.
13-01-2025, 15:56
Təbii qaz uğrunda qlobal mübarizə başlayır
2025-ci ildə təbii qaz uğrunda qlobal mübarizə başlaya bilər.
Qlobal mübarizə Asiyadan Cənubi Amerikaya qədər inkişaf etməkdə olan yoxsul ölkələri bazardan kənarlaşdıra bilər. Avropada yaşanan enerji çatışmazlığı sözügedən senarini tətikləyə bilər.
“Şübhəsiz ki, bu il Avropada enerji qıtlığı olacaq. Bu o deməkdir ki, bu il bazarlara çıxacaq may qazın bütün əlavə həcmi Rusiyanın qaz defisitini doldurmaq üçün istifadə olunacaq”, – "Bank of America"nın analitiki Fransisko Blanş deyir.
Havaların soyuması səbəbindən qaz ehtiyatlarının tükənməsi Avropanı dünyanın ən böyük istehlakçılarının yerləşdiyi Asiya bazarına üz tutmağa məcbur edə bilər. Bu səbəbdən də qiymətlər o qədər arta bilər ki, Hindistan, Banqladeş və Misir kimi ölkələrdən idxalçılar qaz almağa pulları çatmasın.
2025-ci ilin əvvəlində Asiya Avropaya əsas qaz tədarükünü itirə bilər, çünki Çin idxalçıları yenidən enerji satmağa başlayıb. Almaniyada qaza alternativ tapmaq çətindir, çünki 2022-ci ilə qədər o, daxili tələbatının 50%-dən çoxunu Rusiya enerjisi hesabına ödəyirdi. Bəzi enerji istehsalçıları istehsal gücünü artırsa, vəziyyət 2026-cı ilə qədər yaxşılaşa bilər. Analitiklər ABŞ-dan qaz ixracının artacağını proqnozlaşdırır, lakin temp hələ də yavaş olacaq.
Yanvarın əvvəlinə Aİ-yə üzv ölkələrin anbarlarındakı qaz ehtiyatları 70% təşkil edib. "Bloomberg"in məlumatına görə, 2025-ci ilin əvvəlində Avropada hərracda qazın qiyməti 2023-cü ilin oktyabrından bəri ən yüksək həddə çatıb.
13-01-2025, 15:27
BDU-nun sabiq prorektoru vəfat etdi
Bakı Dövlət Universitetinin sabiq prorektoru polkovnik Rövşən Abdullayev 55 yaşında vəfat edib.
Bu barədə APA-ya BDU-nun dosenti Fikrət Şiriyev məlumat verib.
O bildirib ki, mərhumun cənazəsi sabah 14:00-da Qələbə dairəsinin yaxınlığında yerləşən evindən götürüləcək.
Qeyd edək ki, Rövşən Müslüm oğlu Abdullayev 1969-cu il sentyabrın 18-də Bakıda anadan olub. O, 2005–2014-ci illərə BDU-nun Ümumi işlər üzrə rektor köməkçisi vəzifəsində çalışıb.
13-01-2025, 15:10
Ərdoğan komandasını yeniləyir - Yeni seçkilər istisna edilmir
Türkiyə Prezidenti Rəcəb Tayyib Ərdoğan rəhbəri etdiyi hakim Ədalət və İnkişaf Partiyasının (AK Partiya) rəhbərliyində dəyişikliklər etməyi planlaşdırır. Bu barədə “Türkiye” qəzeti yazıb.
Qəzetin məlumatına görə, partiya İdarə Heyətinin 60 faizinin yenilənməsi nəzərdə tutulub. Mənbələr dəyişikliklərin növbəti seçkilərlə əlaqəli olduğunu bildirib.
Nəşr qeyd edib ki, Ərdoğan artıq 2028-ci ilə planlaşdırılan prezident və parlament seçkiləri üçün partiyası üçün yeni komanda toplamağa başlayıb. Ötən il keçirilən bələdiyyə seçkilərində hakim partiyanın yüksək nəticə göstərməməsi də Ərdoğanın qərarına təsir edib.
AK Partiyanın yalnız mərkəzi aparatında deyil, yerli təşkilatlarında, ən kiçik sturukturlarında da dəyişikliklər olacağı qeyd olunur.
Fevral ayında hakim partiyanın qurultayının keçiriləcəyi gözlənilir. Qurultayda partiya İdarə Heyətində ciddi dəyişikliklər açıqlanacaq. Məqalədə deyilir ki, partiyanın ali rəhbərliyində yeni simalarla bağlı məsləhətləşmələr aparılır. Aralarında qadınların da olduğu çoxlu sayda gənc siyasətçinin AKP-yə keçəcəyi gözlənilir.
Qeyd edək ki, bəzi türk ekspertlər dəyişikliyin yalnız növbəti - 2028-ci ildə keçiriləcək parlament seçkiləri ilə əlaqəli olmadığını düşünür. Belə ki, Türkiyədə qarşıdakı aylarda referendum keçiriləcəyi, konstitusiya dəyişikliklərinin müzakirəyə çıxarılacağı gözlənilir. Ərdoğan və komandası bu barədə dəfələrlə açıqlama verib və yeni konstitusiyaya ehtiyac olduğunu bildiriblər.
Türkiyədə növbədənkənar seçkilərin keçirilməsi də istisna edilmir. Qeyd edək ki, son günlər Ərdoğanın üçüncü dəfə namizəd olub-olmaması barədə müzakirələr aparılır. Türkiyə liderinin baş müşaviri Mehmet Uçum bildirib ki, Ərdoğan müvafiq Konstitusiya müddəasından istifadə edərək, üçüncü müddətə dövlət başçısı kimi namizəd ola biləcək.
“Konstitusiyanın 116/3-cü maddəsinə görə, prezident Ərdoğanın namizədliyini irəli sürmək üçün müstəsna imkan var. Onun namizədliyinin müzakirəsi 2027-ci ilin ikinci yarısında gündəmə gələ bilər", - deyə baş müşavir X-də yazıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!