28-08-2025, 18:32
Rusiyanın atdığı raket səfirliyimizin YANINA DÜŞDÜ
Dünən Rusiyanın Ukrayna paytaxtı Kiyevə atdığı raketlərdən biri Azərbaycanın Kiyevdəki səfirliyinin 100 metrliyinə düşüb.
Bu barədə ukraynalı jurnalist Denis Kazanski öz "X" hesabında paylaşım edib.
O, zərbənin nəticələrini əks etdirən foto paylaşıb.
"Gecə Rusiya Azərbaycanın Kiyevdəki səfirliyini vurub, lakin bir az yan keçib. Raket binadan təxminən 100 metr aralıya düşüb. Daha əvvəllər ruslar Azərbaycanın bir neçə neft anbarını bombalamışdılar. İndi açıq şəkildə səfirliyə terror hücumlarına keçiblər", - deyə o yazıb.
Düşən raketin yanğına və güclü partlamaya səbəb olduğu məlum olub.
Məlumatı Azərbaycanın Xarici İşlər Nazirliyi də təsdiq edib.
Qeyd edilib ki, raketlərdən biri ölkəmizin Ukraynadakı səfirliyinin binasının yaxınlığında partlaması nəticəsində yaranan zərbədən binaya zərər dəyib.
"Bəzi pəncərələr qırılıb, konsulluq bölməsinin damında çatlar əmələ gəlib. Səfirliyin əməkdaşları arasında xəsarət alan olmayıb. Səfirliyimiz fəaliyyətini davam etdirir", - məlumatda deyilir.
28-08-2025, 17:47
Rusiya Kiyevi raketlə vurdu - Azərbaycanlı həlak oldu
Rusiya ordusunun avqustun 28-də Kiyevə endirdiyi raket zərbələri nəticəsində həlak olanlar arasında bir azərbaycanlı da var.
Ukrayna paytaxtının Xarkovsk rayonunda, beşmərtəbəli binanın dağıntılarının altından azərbaycanlının meyiti çıxarılıb.
Raket zərbələri nəticəsində ölən əslən Bakıdan 60 yaşlı Zəkiyev Ramiz olduğunu müəyyən edilib.
28-08-2025, 17:36
87 yaşlı anasını yaraladı, özünü öldürdü
Sabirabad sakini anasını güllələyərək yaralayıb, özünü isə öldürüb.
Hadisə Sabirabad rayonunun Nizami kəndində baş verib.
Həmin kəndin 1970-ci il təvəllüdlü sakini İsayev Malik Xanlar oğlu 1938-ci il təvəlüdlü anası, Nizami kənd sakini Hüseynova Səbiyyə Astan qızına arxadan ov tüfəngi ilə atəş açaraq yaralayıb. Daha sonra özünü güllələyərək öldürüb.
S.Hüseynova Şirvan xəstəxanasına çatdırılaraq əməliyyata götürülüb.
Faktla bağlı araşdırma aparılır.
28-08-2025, 17:14
Ərdoğan Azərbaycan millisinin futbolçuları ilə görüşdü - FOTO
Türkiyə Prezidenti Rəcəb Tayyib Ərdoğan qadınlardan ibarət “Yüksekovaspor” komandasını qəbul edib.
Görüşdə bu komandada çıxış edən Azərbaycan millisinin futbolçuları Vüsalə Seyfəddinova, Vüsalə Hacıyeva, Jalə Məhsimova və Aytac Şərifova da iştirak ediblər. Kluba yeni transfer olunan Sevinc Cəfərzadə isə heyətə gec qoşulduğu üçün görüşə qatıla bilməyib.
Qeyd edək ki, “Yüksekovaspor” ötən mövsüm 1-ci liqanın qalibi kimi Superliqaya yüksəlib.
28-08-2025, 17:03
ABŞ 10 mindən çox azərbaycanlıya viza verib - RƏSMİ
ABŞ oktyabrın 1-dən etibarən viza rüsumlarını əhəmiyyətli dərəcədə artırmağı planlaşdırır. Turist vizası üçün müraciət haqqı 135 faiz artaraq 185 dollardan 435 dollara qaldırılıb.
Konqresin Büdcə Ofisi yeni ödənişlərlə illik 2,7 milyard dollar əlavə gəlir əldə etməyi hədəfləsə də, turizm sektorunun nümayəndələri 29 milyard dollara qədər itki gözləyir.
Tələbə və mübadilə proqramı vizaları (F, J, M) və iş vizaları (H-1B, L-1, O-1) daxil olmaqla bir çox kateqoriyalarda viza ödənişləri bahalaşacaq.
ABŞ-yə bütün dünya ölkələrindən olduğu kimi Azərbaycandan da getmək istəyənlərin sayı kifayət qədərdir.
ABŞ-nin Azərbaycandakı səfirliyindən bildirilib ki, ötən il 10 867 nəfər azərbaycanlıya qeyri-immiqrasiya vizası verilib.
“2024-cü maliyyə ilində (1 oktyabr 2023-cü il -30 sentyabr 2024-cü il) Azərbaycan vətəndaşlarına 10 867 qeyri-immiqrasiya vizası verilib”, - Səfirlikdən qeyd edilib.
28-08-2025, 16:19
Prezidentin bu sözləri rus təbliğatçılarını “dəli” etdi
Prezident İlham Əliyevin "Əl-Ərəbiyyə" kanalına müsahibəsi Rusiya mediasında geniş rezonans doğurub. Dövlət başçısının 1920-ci ildə Azərbaycan Xalq Cümhuriyyətinin rus ordusu tərəfindən “işğal edildiyini” deməsi Rusiyanın bəzi dairələrinin diqqətini çəkib.
İlham Əliyev bildirib ki, 1918-ci ildə qurulan Azərbaycan Xalq Cümhuriyyəti cəmi iki il yaşayıb və 1920-ci ilin aprelində rus ordusu ölkəyə daxil olaraq işğal edib:
“1917-ci ildə inqilab edən bolşeviklər xalqa yalan vədlər verirdilər. Şüarlar var idi: “zavodlar fəhlələrə, torpaq kəndlilərə, xalqlara azadlıq”. Biz öz dövlətimizi qurduq, amma bolşeviklər bu dövləti əlimizdən aldılar. 1920-ci ilin aprelində rus ordusu Azərbaycana daxil olub onu işğal etdi”.
İlham Əliyev, həmçinin qeyd edib ki, bu gün Azərbaycanda bir nəfər də rus hərbçisi yoxdur və münasibətlərin gərginləşməsi Bakının günahı deyil.
Rusiyanın aparıcı KİV-ləri açıqlamaya emosional yanaşıb. RBC, Vzglyad, Life.ru və Pravda.ru müsahibənin bu hissəsini xüsusilə dərc edib. Qəzet və saytların şərhlərində Bakının “işğal” ifadəsini işlətməsi “isterika” ilə qarşılanıb. Həmçinin, Rusiyanın propoqandası ilə məşğul olan ekspertlər narazılıq ifadə ediblər.
Sabiq xarici işlər naziri Tofiq Zülfüqarov bildirib ki, rusların bu ifadəyə təəccüblənməsi özü təəccüblüdür: “İşğala işğal deməyə təəccüblənmələri təəccübləndirir”.
Siyasi şərhçi Fuad Çıraqov isə vurğulayıb ki, Həmin dairələr nədənsə ölkə başçısının FOX TV-yə müsahibədə "Rusiya təyyarəni qəsdən vurmadı" deməsini münasibətləri düzəltmək üçün xoş niyyət və addım kimi görmədilər. Bəli, bilərəkdən olmadı, amma ehtiyazlıqdan olan cinayətin belə öz məsuliyyəti var. Bu cür pis münasibətlər milli maraqlarımıza uyğun deyil, amma hər şeyin öz yeri, mizanı, adı var. Hər şeyi də öz adı ilə çağırmaq lazımdır. İki ölkə arasında münasibətlər yaxşı, qarşılıqlı faydaya, hörmətə əsaslanan və sağlam olmalıdı. Görünür ki, bizim yaxşı münasibətlərin tərifi ilə post-imperiya travmalı qafaların yaxşı münasibətlərə verdiyi tərif başqadı. İşğala işğal deyilməyən və travmalı qafaların istədiyi "yaxşı" münasibətlər iki suveren müstəqil dövlətin münasibəti olmur, bu olur SSRİ-2. Hər şeyin öz adı var, necə deyərlər sazan ayrı, fazan ayrı, işğal faktı tarix kimi ayrı, münasibətlərin yaxşı olması ayrı. O qədər keçmiş koloniyaların bu gün öz metropoliyaları ilə gözəl münasibətləri var ki, baxın, öyrənin nümunə götürün. Ermənilər kimi "Azərbaycan olmayıb, Lenin yaradıb" ifadəsini tutuquşu kimi təkrarlanması isə ümumiyyətlə heç cür kömək etmir, insanları daha da bu münasibətlərin yaxşı ola bilməsi ilə bağlı skeptisizmə aparır",
28-08-2025, 16:09
Zorakılıq edilən azyaşlılar körpələr evinə yerləşdiriləcək
Ağdamda valideynlərinin zorakılığa məruz qoyduğu azyaşlının kiçik qardaşı da körpələr evinə yerləşdiriləcək.
Bu barədə Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyindən (SXA) bildirilib.
Məlumata görə, SXA-nın əməkdaşları hər iki uşağın vəziyyəti ilə yaxından maraqlanır və azyaşlıların mənafeyinə uyğun addımların atılması məqsədilə aidiyyəti qurumlarla koordinasiyalı şəkildə iş aparırlar.
"Hazırda Respublika Neyrocərrahiyyə Xəstəxanasında müvafiq tibbi xidmətlər göstərilən azyaşlının müalicə və müayinələri bitdikdən sonra onun körpələr evinə yerləşdirilməsi nəzərdə tutulub.
Həmçinin onun qardaşı, 2024-cü il təvəllüdlü və hazırda Ağdam Rayon Mərkəzi Xəstəxanasında həkimlərin müşahidəsi altında saxlanılan digər azyaşlı da Bakı şəhərinə gətirilərək Sosial Xidmətlər Agentliyi tərəfindən müvafiq körpələr evinə yerləşdiriləcək", - deyə əlavə edilib.
28-08-2025, 16:00
Azərbaycanda xüsusi təhsil ləğv edilir? - RƏSMİ
Azərbaycanda sağlamlıq imkanları məhdud olan uşaqlar üçün nəzərdə tutulan xüsusi təhsilin ləğv edilməsi ilə bağlı iddialar əsassızdır.
Bu bardədə Məktəbəqədər və Ümumi Təhsil üzrə Dövlət Agentliyindən (MÜTDA) "report"a məlumat verilib.
Məlumat verilib ki, xüsusi təhsildə təhsilalanların sayı cari vəziyyətdə 11 881 nəfər şagirdir. Həmin şagirdlər dövlət tərəfindən təlim vasitələri ilə (yemək, geyim, ayaqqabı, zəruri avadanlıq və fərdi texniki vasitələrlə və s.) təmin edilir.
Sağlamlıq imkanları məhdud şagirdlər üçün bir sıra ümumi təhsil müəssisələrində xüsusi siniflər də fəaliyyət göstərir. İnklüziv təhsilə cəlb edilən şagirdlərin sayı cari vəziyyətdə 333 nəfər təşkil edir. 2025-ci ildə artıq Bakı şəhərində və bölgələrdə 67 məktəbdə inklüziv təhsil həyata keçirilir.
2025-2026-cı il tədris ilində daha 24 müəssisəsədə (Bakı şəhəri üzrə-11, regionlar üzrə-13) inklüziv təhsil həyata keçiriləcək.
28-08-2025, 15:55
Rusiya Azərbaycandan sonra Türkiyənin şirkətini də hədəfə aldı
Rusiya ordusunun ötən gecə Ukraynanın paytaxtı Kiyevə endirdiyi zərbələr nəticəsində ölənlərin sayı 15-ə çatıb.
Həyatını itirənlərdən 4-ü azyaşlıdır, 40-dan çox adam yaralanıb.
Ukrayna hakimiyyətinin verdiyi məlumata görə, şəhərin Darnitski rayonunda beşmərtəbəli yaşayış binasının bütöv bir hissəsi birbaşa zərbə nəticəsində dağılıb.
Səlahiyyətlilər dağıntılar altında insanların qaldığını bildirir. Daxili İşlər Nazirliyinin məlumatına görə, bir neçə nəfər hələ də itkin düşmüş hesab edilir.
Kiyev şəhər hərbi administrasiyasının rəhbəri Timur Tkaçenkonun sözlərinə görə, gecə hücumu zamanı bir neçə növ silahdan istifadə edilib: “Şahid” pilotsuz uçuş aparatları, ballistik raketlər, qanadlı raketlər və “Kinjal” raketləri.
“Türkiye Gazetesi”nin məlumatına görə, Kiyevdə inşa edilən və fəaliyyətə başlamaq üzrə olan Türkiyənin “Bayraktar” zavodu da raket atəşinə məruz qalıb.
Bildirilib ki, zavoda iki raket zərbəsi dəyib, milyonlarla dollarlıq investisiyaya ciddi zərər vurulub.
Avropa İttifaqının Kiyevdəki nümayəndəliyinin binasına da ziyan dəyib. “Mən bu qəddar hücumları qətiyyətlə pisləyirəm və bu, Rusiyanın sülhü rədd etdiyini və terroru seçdiyinin əyani sübutudur”, - Aİ-nin genişlənmə üzrə Avropa komissarı Marta Kos bildirib. "British Council" şirkətinin ofisinin yerləşdiyi binaya da ziyan dəyib.
"Rusiyanın bu raketləri və dronları bu gün dünyada həftələr və aylar boyu atəşkəs və real diplomatiya çağıran hər kəsə açıq cavabdır. Rusiya danışıqlar masasını deyil, ballistikanı seçir", - Ukrayna prezidenti Vladimir Zelenski bildirib. O, Rusiyaya qarşı yeni sanksiyalar tətbiq etməklə hücuma cavab verməyə çağırıb.
Qeyd edək ki, bundan əvvəl Rusiya Ukraynada Azərbaycanın SOCAR şirkətinin obyektlərinə də zərbə endirib.
28-08-2025, 15:46
Netanyahu “erməni soyqırımı” ilə Ərdoğandan qisas alır
Netanyahu Ərdoğandan qisas almaq üçün “erməni soyqırımı”nı tanıyıb.
Bunu Almaniyanın “Bild” nəşri yazıb.
İsrailin baş naziri Benyamin Netanyahu ilk dəfə gözlənilmədən guya 110 il əvvəl baş verdiyi iddia olunan qondarma “erməni soyqırımı”nı tanıyıb.
“Bild” yazır ki, bununla Netanyahu “erməni soyqırımı” mövzusunu gündəmə gətirməklə Türkiyə prezidenti Rəcəb Tayyib Ərdoğana meydan oxuyur.
İsrail indiyədək “erməni soyqırımı”nı rəsmən tanımaqda tərəddüd edirdi: ölkə Türkiyə ilə yaxşı münasibətlərini riskə atmaq istəmirdi. 1949-cu ildə Türkiyə İsraili dövlət kimi tanıyan ilk müsəlman ölkəsi olub. 2000-ci illərə qədər iki ölkə sıx əməkdaşlıq edirdi, hətta birgə hərbi təlimlər keçirir və yüksək texnologiyalı silahlar (məsələn, qırıcı təyyarələr) mübadiləsi aparırdı.
İsrail baş nazirinin indi bu bəyanatı verməyə cəsarət etməsi o deməkdir ki, Ərdoğanla münasibətlər çox güman ki, düzəlməz dərəcədə zədələnib. Türkiyə prezidenti mütəmadi olaraq İsrail əleyhinə bəyanatlar verir, HƏMAS-la açıq dostluq edir, onların liderlərini qonaq edir. O, həmçinin yəhudi dövlətini fələstinlilərə qarşı “soyqırımı”ında ittiham edir.
Netanyahunun qondarma “erməni soyqırımı”na istinad etməsi əks-hücum kimi qiymətləndirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!