4-10-2025, 14:31
İsrail ordusuna “dayan” əmri verildi
İsrail ordusu Qəzza zolağında həyata keçirdiyi hücum əməliyyatlarını dayandırıb.
Bu barədə “The Times of Israel” qəzeti məlumat yayıb.
Məlumata görə, bu qərar ABŞ Prezidenti Donald Trampın çağırışından sonra qəbul edilib.
İsrail Müdafiə Qüvvələrinin (IDF) qərargah rəisi Eyal Zamir bildirib ki, ordu “siyasi rəhbərliyin göstərişinə əsasən” hazırda yalnız müdafiə xarakterli əməliyyatlar aparır və məqsəd “mövcud təhlükələri aradan qaldırmaqdır”.
Tramp cümə axşamı axşam saatlarında “Truth Social” sosial platformasında paylaşım edərək İsraildən Qəzzaya hava zərbələrini dərhal dayandırmağı tələb edib. ABŞ prezidenti bildirib ki, HƏMAS onun sülh planının bəzi bəndlərini qəbul etməyə hazır olduğunu açıqlayıb və bu çərçivədə əsirlərin azad olunması məsələsinin müzakirə edildiyini vurğulayıb.
“İsrail dərhal bombardmanları dayandırmalıdır ki, biz əsirlərin təhlükəsiz və sürətli azad olunmasını təmin edə bilək”, - deyə Tramp qeyd edib. O, hazırda “Yaxın Şərqdə çoxdan gözlənilən sülhün təmin olunması” istiqamətində danışıqların aparıldığını əlavə edib.
Bundan sonra İsrail Baş naziri Binyamin Netanyahunun ofisi bəyan edib ki, Tel-Əviv Trampın Qəzzaya dair planının birinci mərhələsinin dərhal icrasına hazırlaşır. Planın ilk mərhələsi HƏMAS tərəfindən saxlanılan israilli girovların azad olunmasını nəzərdə tutur.
4-10-2025, 14:20
Türkiyədə fabrikdə partlayış - Ölənlər var
Türkiyənin Kocaeli vilayətinin Dilovası rayonunda yerləşən sənaye bölgəsindəki fabriklərin birində partlayış baş verib.
İlkin məlumata görə, partlayış nəticəsində 2 fəhlə həyatını itirib. Hadisə yerinə çox sayda xilasedici və təcili tibbi yardım qrupları cəlb olunub.
Hadisənin başvermə səbəbi hələlik məlum deyil.
Kocaeli Valiliyindən bununla bağlı verilən açıqlamada qəza ilə bağlı istintaqın başlanıldığı bildirilib.
4-10-2025, 14:10
Türkiyə Ermənistanla quru sərhədlərini açır?
"Türk Hava Yolları" (THY) aviaşirkəti Ermənistanın paytaxtı İrəvana müntəzəm uçuşlara başlayır. Şirkətin İctimaiyyəti Məlumatlandırma Platforması (KAP) üzərindən bildirilib ki, qərar şirkətin mövcud imkanlarından və bazar şərtlərindən asılı olaraq qəbul edilib.
Xatırlatmaq lazımdır ki, Azərbaycan, ABŞ və Ermənistan liderlərinin 8 avqust Vaşinqton görüşündən sonra Türkiyə ilə Ermənistan arasında da dialoqun sürətləndiyi nəzərə çarpmaqdadır.
Vaşinqton görüşündən bir neçə gün sonra Türkiyənin Ermənistanla normallaşma prosesi üzrə xüsusi nümayəndəsi Serdar Kılıç Ermənistana səfər edib. Türkiyə ilə münasibətlərin normallaşdırılması üzrə xüsusi nümayəndə Ruben Rubinyan Ermənistan-Türkiyə sərhədindəki "Marqara" nəzarət-buraxılış məntəqəsində Serdar Kılıçla görüşüb. Söhbətin əsas müzakirə mövzusu Türkiyə-Ermənistan sərhədlərinin açılması olub. Tərəflərin hər hansı razılığa gəlməsi barədə heç bir məlumat yayılmayıb.
Türk Hava Yollarının yuxarıda qeyd etdiyimiz qərarı verməsi yenidən iki ölkə arasında quru sərhədlərin fəaliyyətinin bərpası məsələsini gündəmə gətirir. Növbəti addımın məhz bu istiqamətdə atılması gözlənilir.
Politoloq Elxan Şahinoğlu bildirib ki, Türk Hava Yollarının Ermənistanın paytaxtı İrəvana müntəzəm uçuşlara başlamaq barədə qərarını normal qarşılamaq lazımdır:
"Biz işğala son qoyub, ərazi bütövlüyümüzü təmin etmişik. Azərbaycanla Ermənistan arasında dialoq mövcuddur. Üstəgəl, Azərbaycanla Ermənistan bir-birlərinin hava məkanından da istifadə edirlər. Elə bu yaxınlarda Ermənistan Dövlət Təhlükəsizlik Xidmətinin rəisi Andranik Simonyan da beynəlxalq tədbirdə iştirak etmək üçün təyyarə ilə gəlmiş, onun təyyarəsi Heydər Əliyev adına Beynəlxalq Aeroporta eniş etmişdi. Bu baxımdan da Türkiyənin Ermənistanla dialoqu genişlənir".
E.Şahinoğlu hesab edir ki, hava xətlərinin açılmasına baxmayaraq, hələ quru sərhədlərinin açılması mümkün deyil:
"Türkiyə Azərbaycanla Ermənistan arasında sülh sazişinin imzalanmasını gözləyir. Sülh sazişi imzalanan kimi,bəli, Türkiyə quru sərhədlərini də açacaq, diplomatik münasibətləri də bərpa edəcək. Onsuz da Azərbaycanın özü də sülhdən sonra Ermənistanla sərhədlərini açacaq. Və bundan sonra yəqin ki, üç ölkə arasında ticarət əlaqələri başlayacaq".
4-10-2025, 14:06
Ukrayna Rusiyanın hərbi gəmisinə zərbə endirdi
Oktyabrın 4-nə keçən gecə Ukrayna Müdafiə Qüvvələri Rusiyanın bir sıra mühüm obyektlərinə zərbələr endirib.
Bu barədə Ukrayna Silahlı Qüvvələrinin Baş Qərargahı məlumat yayıb.
Ötən gecə Ukrayna qüvvələri “Kirişinefteorqsintez” müəssisəsinə zərbələr endirib. Bu obyekt Leninqrad vilayətinin Kirişi şəhərində yerləşir. Obyektdə partlayışlar və yanğın qeydə alınıb.
Bu, Rusiyanın ən böyük neft emalı zavodlarından biridir. İllik gücü 18,4 milyon ton neft emalı təşkil edir.
Bundan əlavə, Kareliya Respublikasında yerləşən Oneqa gölü yaxınlığında kiçik raket gəmisi olan “Buyan-M” zədələnib. Hazırda dəymiş ziyanın həcmi müəyyənləşdirilir.
Bu, yerüstü hədəfləri vurmaq, sahil əməliyyatlarını dəstəkləmək və sahil zonalarını müdafiə etmək üçün nəzərdə tutulmuş çoxfunksiyalı sahil əsaslı Rusiya hərbi gəmisidir. Onun silahlanmasına həm dəniz, həm də quru hədəfləri vurmağa imkan verən “Kalibr” qanadlı raketləri, zenit sistemləri və artilleriya daxildir.
Ötən gecə Müdafiə Qüvvələri Kursk vilayətində “İskəndər” taktiki raket kompleksindən “Qarmon” radar sistemini və daşıyıcı-yükləyici maşını məhv edib.
Eyni zamanda, Donetsk vilayətinin müvəqqəti işğal olunmuş ərazisində yerləşən Rusiya Silahlı Qüvvələrinin 8-ci Ordusunun komando məntəqəsinə də zərbə endirilib. Hədəf vurulub. Nəticələr dəqiqləşdirilir.
4-10-2025, 13:42
Çox yaxın bir dostumuzu itirdik - Əbülfəz Qarayev
"Mən onunla şəxsən dostluq edirdim. O, çox gözəl insan və dəyərli bir həmkar idi”.
Bunu sabiq səhiyyə naziri, Oqtay Şirəliyevlə vida mərasimində sabiq mədəniyyət naziri Əbülfəz Qarayev jurnalistlərə açıqlamasında deyib.
O, Oqtay Şirəliyevin heç vaxt insanların çətinliklərinə biganə qalmadığını bildirib.
“Mədəniyyət işçilərinin və ya başqa sahələrdə çalışan insanların ən kiçik problemi belə olanda, Oqtay müəllim canla-başla yardım etməyə çalışırdı, nə lazımdırsa, edirdi”.
Ə.Qarayev həmçinin qeyd edib ki, onun yaradıb-qurduğu Respublika Diaqnostika Mərkəzi bu gün də Azərbaycanın səhiyyə sistemində mühüm yer tutur:
“Düşünürəm ki, onun haqqında yalnız müsbət xatirələr qalacaq. Biz çox yaxın bir dostumuzu itirdik. Allah ona rəhmət eləsin".
4-10-2025, 13:29
Oqtay Şirəliyev dəfn olundu - FOTO
Sabiq səhiyyə naziri Oqtay Şirəliyev dəfn olunub.
Mərhum nazir Yasamal qəbiristanlığında torpağa tapşırılıb.
***
10:54
Ötən gün vəfat edən sabiq səhiyyə naziri Oqtay Şirəliyevlə vida mərasimi keçirilir.
Mərasim Təzəpir məscidində baş tutur.
Vida mərasimində səhiyyə naziri Teymur Musayev, TƏBİB-in icraçı direktoru Vüqar Qurbanov, İcbari Tibbi Sığorta üzrə Dövlət Agentliyinin sədri Zaur Əliyev və digər vəzifəli şəxslər iştirak edir.
4-10-2025, 12:47
Xəzər dənizində əməliyyat: yarım ton narkotik - VİDEO
Xəzər dənizi vasitəsilə Azərbaycana 510 kq narkotik keçirilməsinin qarşısı alınıb.
Bu barədə Dövlət Sərhəd Xidmətindən məlumat verilib.
Bildirilib ki, Xəzər dənizində keçirilmiş tədbirlər nəticəsində xüsusilə külli miqdarda narkotik vasitənin İrandan Azərbaycana keçirməyə cəhd göstərən mütəşəkkil cinayətkar qrupun üzvləri saxlanılıb.
Sentyabr ayının 27-də Sahil Mühafizəsinin sahil nəzarəti bölmələri və texniki müşahidə məntəqələrinin qarşılıqlı fəaliyyəti nəticəsində Xəzər dənizində naməlum hədəf aşkar edilib.
Aşkarlanmış hədəfin saxlanılması məqsədilə dövlət sərhədinin mühafizəsində olan sərhəd gəmiləri tərəfindən təqibetmə əməliyyatına başlanılıb, sahil nəzarəti bölmələri sahil xəttinin qapadılması məqsədilə təxirəsalınmaz tədbirlər həyata keçirib.
Azərbaycan ərazi sularında və sahilboyu ərazidə həyata keçirilmiş əməliyyat-qoşun tədbirləri nəticəsində üzmə vasitəsinin saxlanılması məqsədilə "Dövlət sərhədi haqqında" Azərbaycan Respublikası Qanununun tələblərinə uyğun olaraq xəbərdarlıq atəşi açılıb, üzmə vasitəsi Xəzər dənizinin Xaçmaz rayonu ərazisində sahilə yan almağa məcbur edilib.
İlkin dindirmə zamanı saxlanılan şəxslərin İran İslam Respublikası vətəndaşları - 1979-cu il təvəllüdlü Atacani Tahir Xaləd, 1987-ci il təvəllüdlü Məxtumi Sadiq Ərazqurban və 1989-cu il təvəllüdlü Qangerme Omid Çalce olması müəyyən edilib.
Sərhəd pozucularının üzərindən aşkar edilmiş "Garmin" markalı GPS qurğusunun yaddaşına baxış keçirilərkən onların İran ərazisindən 1074 km məsafə qət edib Türkmənistan ərazi sularından keçməklə Azərbaycan ərazisinə daxil olması müəyyən edilib.
Saxlanılmış "Layner" tipli üzmə vasitəsinin hərəkət trayektoriyasında və hadisə yerində həyata keçirilmiş axtarış tədbirləri nəticəsində ümumi çəkisi 509 kq 800 qram narkotik vasitə aşkarlanaraq götürülüb.
Əməliyyat tədbirlərinin davamı nəticəsində hadisə yerində "Niva" markalı nəqliyyat vasitəsində 4 nəfər Azərbaycan vətəndaşı şübhəli şəxs qismində saxlanılıb.
Fаkt üzrə Baş Prokurorluqla birgə istintaq-əməliyyаt tədbirləri dаvаm еtdirilir.
4-10-2025, 12:42
Zəngəzur dəhlizi İran üçün yeni imkanlar yarada bilər - Cavad Zərif
"Naxçıvanı Azərbaycanın digər rayonları ilə birləşdirən yol (Zəngəzur dəhlizi - red.) İran üçün yeni imkanlar yarada bilər".
Bunu İranın keçmiş xarici işlər naziri və sabiq vitse-prezidenti Məhəmməd Cavad Zərif bildirib.
"Bu gün vəziyyət dəyişib. Məsələn, Naxçıvanı Azərbaycanın digər rayonları ilə birləşdirən yol bizim üçün bir fürsət ola bilər. Əgər keçmişdə ilişib qalsaydıq, bunu təhdid kimi görərdik. Halbuki biz təhdidləri fürsətə çevirməyi öyrənməliyik", - deyə Zərif vurğulayıb.
O bildirib ki, keçmişin əsiri olmamaq lazımdır və İranın bir çox problemləri məhz keçmişə yönəlmiş baxışdan qaynaqlanır.
Zərif keçmiş təcrübələrin təkrarlanmasının yeni uğursuzluqlara gətirib çıxara biləcəyi barədə də xəbərdarlıq edib.
4-10-2025, 12:10
Sabah 25 dərəcə isti olacaq
Sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Bu barədə Milli Hidrometeorologiya Xidməti məlumat yayıb.
Qeyd edilib ki, mülayim cənub-şərq küləyi əsəcək.
Havanın temperaturu gecə 15-17, gündüz 20-25 dərəcə isti olacaq. Atmosfer təzyiqi 767 mm civə sütunundan 761 mm civə sütununa enəcək. Nisbi rütubət gecə 70-80 %, gündüz 60-65 % təşkil edəcək.
Azərbaycanın rayonlarında havanın əsasən yağmursuz keçəcəyi, bəzi yerlərdə arabir duman olacağı ehtimalı var. Şərq küləyi bəzi dağlıq və dağətəyi rayonlarda arabir güclənəcək.
Havanın temperaturu gecə 11-16, gündüz 20-25, dağlarda gecə 4-8, gündüz 10-15 dərəcə isti olacaq.
4-10-2025, 11:46
Prezident onların maaşını artırdı - SƏRƏNCAM
Səhiyyə Nazirliyinin tabeliyində olan körpələr evinin işçilərinin əməkhaqlarının artırılıb.
Bu barədə Azərbaycan Prezidenti İlham Əliyev sərəncam imzalayıb.
Sərəncama əsasən Səhiyyə Nazirliyinin tabeliyində olan körpələr evinin işçilərinin Vahid Tarif Cədvəli ilə müəyyən olunmuş tarif (vəzifə) maaşlarına 1,5 – 3 dəfə artım əmsalları tətbiq edilib.
Sərəncan 2025-ci il avqustun 1-dən tətbiq edilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!