[/center]


Vəfalı dost ünvanımdı, adımdı,
Şirin-şəkərimdi, ağız dadımdı.
Ürəyimdə atəşimdi, odumdu,
Əsl dosta canı qurban verərlər.
İdris Hacızadə

Əlizadə Nuriyev (Əlizadə Nuri) 1962-ci ildə Cəlilabad rayonunun Adnalı kəndində anadan olub. Orta məktəbi doğma Adnalı kəndində oxuyub qurtarandan sonra hərbi xidmətə getmişdir. Sovet ordusu sıralarında hərbi xidmətini başa vurandan sonra 1983-cü ilin iyun ayında Bakıya qayıtmışdı. Bütün sənədlərini ali məktəbə vermək üçün qulluq etdiyi hərbi hissədən gətirmişdi.
1983-cü ilin isti iyun ayı idi. V.İ.Lenin adına APİ-nin (indiki ADPU-nun) filologiya fakültəsinə qəbul imtahanları üçün sənədlərin qəbulu idi. Hər bir şəxs növbəyə dayanıb gözləyirdi. Bizimlə növbədə dayanan uşaqlardan biri hamının diqqətini özünə cəlb etmişdi. Həmin gənc əsgər paltarında idi. Filologiya fakültəsinin dekanı Bilal Muradov sənədləri yoxlayıb gözucu bu gənci süzdü və sənədlərini qəbul edib, imtahanlarda müvəffəqiyyətlər arzuladı.
İyul ayının bazar günləri imtahanlar başladı. Mən o əsgər paltarında olan gənci hər imtahanda axtardım, ancaq tanıya bilmirdim. İmtahanlardan sonra qəbul olunan tələbələr qruplara bölündük, dərslər başladı, elə gözüm axtarırdı ki, əsgər paltarında olan oğlan kimdi. Görəsən o oğlan qəbul olub.
Birinci kursun ilk semestr imtahanları başlamışdı. Sinif nümayəndəsi imtahan kitabçalarını yığırdı. Fürsətdən istifadə edib imtahan kitabçalarına baxıb həmin gənci, əsgər paltarında olan şəkilindən tanıdım. Bəli, həmin gənc tələbə bizlə bir qrupda oxuyan Əlizadə Nuriyev (Əlizadə Nuri) idi. Həmin vaxtdan bizim dostluğumuz başladı.
Əlizadə gözəl şeirlər yazırdı. Belə demək olar ki, ilk oxucuları da biz, tələbə yoldaşları olurdu. Əlizadə Nurinin imzasına “Ədəbiyyat və incəsənət”, “Azərbaycan gəncləri”, “Bakı”, “Sovet kəndi” və Cəlilabadda çıxan “Yeni gün” qəzetlərində və eyni zamanda “Azərbaycan” və “Ulduz” jurnallarında tez-tez rastlaşırdım. İnstitutda keçirilən bütün tədbirlərdə fəal iştirak edirdi.
1985-ci ilin yay semestr imtahanları idi. Türk dünyasının böyük şairi Xəlil Rza Ulutürklə APİ-nin filologiya fakültəsinin professor, müəllim və tələbələri ilə görüşü keçirilirdi. Filologiya fakültəsinin dekanı Bilal Muradov şair tələbələrə də yer ayırdı. Bir neçə tələbə şairlər çıxış etdilər. Onlardan biri də Əlizadə Nuri idi. Əlizadə Nurinin söylədiyi “Durna köçü, apar məni özünlə” şeiri Xəlil Rza Ulutürk tərəfindən çox yüksək səviyyədə qarşılandı.


Durna köçü, apar məni özünlə

Durna köçü, apar məni özünlə,
Qismətimə bu daşürək qız çıxıb.
Durna köçü, apar məni özünlə,
O qız niyə belə insafsız çıxıb?

Durna köçü, apar məni özünlə,
Suç yiyəsi məni günahkar bilər.
Bu sevgini özü üçün ar bilir,
Sevən könül yer üzünü dar bilir.

Durna köçü, apar məni özünlə,
Qoyma dönə sinəm üstə selə qəm,
Sən apar ki, ölə kədər, ölə qəm.
Durna köçü, aparmasan ölərəm,
Durna köçü, apar məni özünlə.

Xəlil Rza Ulutürk şeirin yazılma vaxtını soruşanda Əlizadə Nuri dedi ki, şeiri 15 yaşımda yazmışam. Xəlil Rza Ulutürk Əlizadə Nuriyə yaxınlaşıb, onun alnından öpüb təbrik etdi və dedi: “Mətbuatda imzasına tez-tez rast gəldiyim, amma özünü görmədiyim Əlizadə Nuri ilə nə xoş təsadüf görüşdüm”.
Xəlil Rza Ulutürkun xahişi ilə bir neçə şeir parçaları söylədi. Bunlardan biri “Bir parça çörək” şeiri idi.

Bir parça çörək

Bu nədir, çörəyi yerə atıblar,
Qarışıb torpağa, qarışıb toza.
Qollarım yorulub yanıma düşdü,
Bilmədim, nə deyim bu insafsıza?!

Yerin də, göyün də göynəyir qəlbi,
Durnalar səmada qanad saxlayır,
Zəmilər dəniztək dalğalandıqca
Sanki yaxasını cırıb ağlayır.

Çətin günümüzdə, dar günümüzdə
Qızılı çovdara dəyişmişik biz.
Bəs niyə, bu xoşbəxt, var günümüzdə
Çörəyi atmağa gəlir əlimiz?!

Və sonra “Torpaq” şeirini söylədi:

Torpaq


Torpaq dövlətimiz, torpaq varımız,
O bizdən gizlətməz qəlbindəkini.
Torpaqdan göyərib ayaqlarımız,
Torpaqdan göyərib qoşa şiv kimi.

Torpağa bağlıdır bütün yer üzü,
Torpaqsız bir şeyə dəyərmi bəşər?
Torpaq çörək olub yaşadar bizi,
Torpaq vətən olub müqəddəsləşər…

Ömrünü torpağa bağlayanların
Şöhrət özü gəlib yoluna çıxdı.
Torpağı ovcunda saxlayanların
Üzünə torpağın əli açıqdı…
[center]