Rusiyada dörd günlük iş həftəsinə keçid üçün əsas şərtlər əhalinin gəlirləri və əmək məhsuldarlığının artmasıdır.
Butov.az-ın AzNews.az-a istinadən məlumatına əsasən, bu barədə “Şərq İqtisadi Forumu”nun kluarlarında iqtisadi inkişaf naziri Maksim Oreşkin bildirib.
“Əmək qanunvericiliyində dəyişikliyin əsas şərti, ilk növbədə, birinci mərhələdə əhalinin daha yüksək gəlirə və əmək məhsuldarlığına nail olmağıdır. Məhz bu həm dörd günlük iş həftəsinin, həm də ölkəmizdə əmək münasibətlərinin tənzimlənməsində ola biləcək digər əmək innovasiyalarının praktiki diskussiyasına imkan yaradır”, - deyə nazir qeyd edib.
Bununla yanaşı, o, iş həftəsinin qısaldılmasının mümkün müddəti barədə danışmayıb.
“Burada məhz bu mərhələdə əhalinin gəlirlərinin artırılması məsələsinə diqqət yetirmək və məsələləri mərhələli həll etmək vacibdir”, - Oreşkin vurğulayıb.
Avqust ayında Rusiya Müstəqil Həmkarlar İttifaqları Federasiyası maaşların saxlanılması şərti daxilində iş həftəsini dörd günə qədər azaltmaq təklifini əmək Nazirliyinə göndərib. Ölkənin Baş naziri Dmitri Medvedev nazirliyə sentyabrın 30-dək qısaldılmış iş həftəsinə keçidin perspektivləri barədə mövqeyini hazırlamağı tapşırıb. Bununla yanaşı, hökumət başçısı vurğulayıb ki, keçid yalnız əməkhaqqının səviyyəsinin saxlanması ilə deyil, həm də əmək məhsuldarlığının artması ilə müşayiət olunmalıdır.