Yeni Zelandiyada ötən gün ərzində koronavirusa daha 14 yeni yoluxma halı qeydə alınıb.

Butov.az bu ölkənin Səhiyyə Nazirliyinə istinadla xəbər verir ki, beləliklə son 24 saat ərzində yoluxanların ümumi sayı 21 nəfərə çatıb.

Yeni Zelandiyanın Baş naziri Casinda Ardern bildirib ki, virusun öyrənilməsi onun Sidneydən gələn şəxsdə aşkar edilən ştamm tərəfindən yayıldığını göstərir. Həmin şəxs Yeni Zelandiyaya avqustun 7-də təyyarə vasitəsilə gəlib və sonradan Middlmor xəstəxanasına yerləşdirilib. Baş nazir həmçinin, həmin virusun hərəkət zəncirinin hələlik tam müəyyən edilmədiyini də bildirib.

C.Ardern qeyd edib ki, ölkədə virusun “delta” ştammının yayılmasının qarşısını almaq üçün hökumət vaksinasiya proqramının genişləndirilməsi və sentyabrın 1-dən prosesə 12-15 yaşlı yeniyetmələrin cəlb olunması barədə qərar qəbul edib.

Xəbər verdiyimiz kimi, Yeni Zelandiya avqustun 17-dən milli təhlükəsizliyin maksimum dördüncü dərəcəsini elan edib. Həmin gün altı aylıq fasilədən ölkə üzrə sonra ilk virusa yoluxma halı qeydə alınıb. Dördüncü dərəcəli məhdudiyyətlər bütün müəssisə, idarə və təşkilatların bağlanmasınə, kütləvi tədbirlərin qadağan edilməsini, məktəb və universitetelərin isə məsafədən təhsilə keçməsini nəzərdə tutur. Vətəndaşlara əsasən evdə qalmaq, ictimai yerlərdə sosial məsafəni gözləmək və tibbi maska geymək tövsiyə olunur. Karantin qaydalarının şərtlərinə və müddətinə avqustun 20-də yenidən baxılacaq.

Əlavə olaraq qeyd edək ki, Yeni Zelandiyada koronavirus pandemiyasının əvvəllərindən ümumilikdə 2947 yoluxma halı qeydə alınıb, 26 nəfər həyatını itirib. Hazırda 50 nəfərin karantində olduğu, 2 nəfərin isə xəstəxanaya yerləşdirildiyi bildirilir.