Rusiya Faşizm üzərində qələbədə həlledici rol oynadığında israr edir. Qərb liderləri Qələbə gününün bayram edilməsində iştirak etməyəcəklər, Kreml isə qələbədə onun rolunun kiçildilməsinin yolverilməz olduğunu bəyan edir.
Məlum olduğu kimi, mayın 9-da Moskvada keçiriləcək Alman faşizmi üzərindəki qələbənin yubileyi-70 illiyi möhtəşəm parad, hərbi texnika və qoşunların keçidi ilə bu vaxtadək ən təmtəraqlı bayram tədbiri olacağı gözlənilr.
Lakin ispan mətbuatının yazdığına görə Krımın Rusiyaya birləşdirilməsindən və Ukraynanın şimalındakı qiyamçıları Kremlin dəstəkləməsindən sonra Rusiyanın keçirdiyi heç bir təntənəli mərasimdə Qərb dövlət rəhbərləri iştirak etmirlər.
“Bu il Moskvada 10 il bundan əvvəlkindən az qonaq iştirak edəcək. Hazırkı şəraitdə bizim Qərbi Avropa dövlətləri və Şimali Amerika ölkələri ilə münasibətlərimiz o qədər də isti deyil,”- deyə Rusiyanın keçmiş müdafiə naziri, prezident administrasiyasının rəhbəri və Qələbənin 70 illiyinin bayram edilməsi tədbirlərinə hazırlıq üzrə Təşkilat Komitəsinin sədri Sergey İvanov etiraf edib. Onun sözlərinə görə, “ilk növbədə bizim üçün maraqlıdır ki, bayram vətəndaşlarımıza layiq şəkildə keçsin”. İvanov bu məqama diqqət çəkib ki, “Qələbə günü Rusya xalqları üçün xüsusi əhəmiyyətə malikdir”. “Biz bununla fəxr edir və uca səslə bəyan edirik ki, alman faşizminin darmadağın edilməsində Sovet İttaifaqı həlledici rol oynayıb”,- deyə o, bəyan edib.
Bu yaxınlarda MÜRSM-in apardığı rəy sorğusunun nəticələrinə əsasən, rəyi soruşulanların 64 %-i, yəni təxminən 9 min nəfər tarixi faktların təhrif edilməsi və SSRİ-inin faşist Almaniyası üzərindəki qələbədə rolunun kiçildilməsinin yolverilməzliyinə diqqət çəkib. Bir il bundan öncə keçirilmiş eyni rəy sorğusunda Rusiya vətəndaşlarnın əksəriyyəti belə fikir irəli sürmüşdü ki, faşizm üzərində qələbə sırf SSRİ-nin xidmətləridir və hətta əgər ABŞ və digər müttəfiqlərin köməyi olmasaydı belə, yenə də həmin qələbə qazanılacaqdı. Məhz elə buna görə də, Rusiya Qərb rəhbərlərinin həmin Qələbənin əhəmiyyətini azaltmaq cəhdlərindən təəssüfləndiyini ifadə edir.
İspan mətbuatının məlumatına əsasən, Rusiya prezidenti Vladimir Putin bu barədə ilk dəfə ötən ilin müvafiq dövründə Qızıl meydandan paradla keçməyə hazırlaşan qoşunlara müraciətlə demişdi: “Bu tarixdə misli görünməmiş igidlik nümunəsinin əhəmiyyətini kiçiltməyə və müharibə qəhrəmanlarına ucaldılmış abidələri üzərinə ləkə yaxmaqğa cəhd edənlər bununla da, öz xalqlarını təhqir edir, dövlətlər və xalqlar arasında nifaq və düşmənçilik toxumu səpirlər”,- deyə Rusiya dövlət başçısı bəyan etmişdi.
İspaniyada nəşr olunan Larioja. com saytının iddiasına görə, burada rus dövlət başçısı daha çox Estoniyanın paytaxtında Böyük Vətən müharibəsində həlak olmuş sovet əsgərlərinin cənazələrinin şəhərin mərkəzi hissəsindən yığışdırılmasını və Polşada hakimiyyətin ölkəni kommunist dövrünün abidələrindən təmizləmək niyyətini nəzərdə tuturdu.
Bu ilin yanvarında Osventsim əsir düşərgəsinin azad edilməsinin 70 illiyi qeyd olunanda Vladimir Putin bu məsələni yenidən gündəmə gətirmişdi və bir daha vurğulamışdı ki, “tarixi yenidən yazmaq və böyük qələbənin qazanılmasında ölkəmizin rolunun yenidən nəzərdən keçirilməsi nasizmin cinayətlərinə bəraət qazandırılması anlamına gəlir və onun insananifrət ideologiyasının dirçəlməsinə münbit şərait yaradır”.
Kremlin rəhbərinin qənaətincə, “bütün bu vəhşiliklərə və varavarlıqlara nəinki təkcə yəhudiləri, eləcə də digər Avropa və dünya xalqlarını məhv olmaqdan xilas edən Sovet İttifaqı son qoydu”.
İspan mətbuatının iddiasına görə, bununla belə, Şərqi Avropa ölkələri belə hesab edirlər ki, sovet qoşunları stalin zülmünü təhmil etmək üçün Hitler zülmünə son qoydular. Bundan sayayı, onlar Ukraynanın hazırkı hakimiyət nümayəndələrini façistlərlə bir sıraya qoyan Kremlin hazırkı təbliğatını da kəskin tənqid edirlər.
Osventsimdə təntənəli tədbirlər keçirilməsi ərəfəsində Polşanın xarici işlər naziri Qrzeqorj Shetına bəyan etmişdi ki, həmin əsir düşərəsini ukraynalılar azad ediblər ki, bu da iki ölkə arasındakı münasibətlərdə böyük gərginliyə səbəb olmuşdu. V. Putin təntənəli mərasimə gəlməmişdi


İspan müxbirinin iddiasına görə, Rusiya prezidenti daim Stalinin müharibədəki rolundan bəhs edir və burada SRRİ-nin köməyi ilə hakimiyyətə gətirilmiş kommunist rejimləri dövründəki xalqların çəkdikləri zülüm və işgəncələri nədənsə unudur. Eyni zamanda daim Ukraynanı ləkələməyə çalışır və onun rəhbərlərini az qala faşist adlandırır. İspan müxbiri yazır: “Nəticədə o, (Putin) buna nail olub ki, Qələbə günü bir çox qonşu ölkələr və Qərbin əksəriyyəti tərəfindən daha çox vahimə yaradan və silahlanmaya çağırış kimi qarşılanır”.
İspan mətbuatı daha sonra bu məqama diqqət çəkir ki, mayın 9-da keçiriləcək paradda 30-dək dövlət başçısı iştirak edəcək. Onların arasında Barak Obama, Fransua Holland, Devid Kemeron olmayacaq. Bunu əvəzində diqər yüksək səviyyəli qonaqlar arasında Çin lideri Si Tszinpin və Kuba prezidenti Raul Kastro da olacaq.
Maraqlıdır ki, Almaniya kansleri Angela Merkel təntənəli tədbirlərdə iştirak etməyəcək, lakin ertəsi günü Vladimir Putinlə birlikdə naməlum əsgər məzarının önünə əklil qoyacaq.
Ötən şənbə günü Almaniya kansleri bəyan etmişdi ki, Rusiya ilə aralarındə xeyli baxış fərqlərinin mövcudluğuna baxmayaraq, “ən əsası həlak olmuş milyonlarla insanı xatırlamaqdır və bu cinayətlərə görə məsuliyyət də Almaniyanın üzərinə düşür”.
Elxan QASIMOV