Yutub platforması gərgin siyasi vəziyyətlə (Rusiyanın Ukraynaya qarşı keçirdiyi hərbi əməliyyatla) əlaqədar Rusiyadan olan istifadəçilər üçün monetizasiyanı (gəlir əldə etmək funksiyasını) dayandırıb.

Butov.az Axşam.az-a istinadən xəbər verir ki, bu barədə şirkətdən məzmun istehsalçılarına göndərilən məktubda deyilir. Bu məhdudiyyətlər "YouTube premium" və "Music premium" abunəlikləri, həmçinin sponsorluq, "Super stickers" və "Super chat" funksiyalarına şamil edilir.

"Daha əvvəl Rusiyada "Google" və "Youtube" reklamlarını tamamilə dayandırmışdıq. İndi isə bu tədbiri monetizasiya ilə bağlı bütün funksiyalara şamil etmək qərarına gəldik. Bu o deməkdir ki, Rusiyada yutubdakı məzmun istehsalçılarının bu funksiyalardan müvəqqəti olaraq gəlir əldə etməsi dayandırılacaq. Bu dəyişikliklər Rusiyada olmayan istifadəçilərə şamil edilməyəcək" deyə, göndərilən mesajda yazılıb.

Tətbiq olunan məhdudiyyətlərin vaxtı dəqiqləşdirilməyib, şirkət vəziyyətin gedişatına görə qərarlar qəbul edəcək.

Qeyd edək ki, bundan əvvəl analoji qərar "TikTok" sosial şəbəkəsi tərəfindən verilib və Rusiyadan olan istifadəçilərə müvəqqəti olaraq yeni videolar dərc etməyi qadağan edib. Həmçinin "Amazon" Rusiya vətəndaşları üçün "Prime video" xidmətinə girişi müvəqqəti bağlayıb.