Aİ-dən Ermənistana dəstək: 270 milyon avro ayırır

Avropa İttifaqı (Aİ) 4 il ərzində Ermənistana 270 milyon avro məbləğində qrant ayıracaq.
Bu barədə Brüsseldə Aİ-ABŞ-Ermənistan formatında keçirilən görüşdə Avropa Komissiyasının Prezidenti Ursula fon der Lyayen məlumat verib.
O qeyd edib ki, Ermənistanın Rusiyaya qarşı sanksiyalardan yayınma ilə mübarizədə göstərdiyi səyləri alqışlayır. “Bu gün biz ötən ilin oktyabrında Ermənistana verdiyimiz sözü yerinə yetiririk. Biz Ermənistanın iqtisadiyyatını və cəmiyyətini inkişaf etdirmək və davamlı etmək üçün Ermənistana sərmayə qoyacağıq”.”, - Lyayen deyib.
Avropa rəsmisi Qarabağdan könüllü gedən ermənilər üçün də 30 milyon avro ayrılacağını vəd edib.
ABŞ dövlət katibi Antoni Blinken isə Ermənistana 65 milyon dollar sərmayə qoyacaqlarını açıqlayıb.
“Biz Ermənistan xalqının gələcəklə bağlı baxışlarını bölüşürük və bu ölkənin güclü, müstəqil və qonşuları ilə sülh şəraitində yaşamasını və region ilə əlaqələnməsini istəyirik. ABŞ və Aİ bu səylərinin həyata keçməsində tərəfdaşdır”, - Blinken deyib.
O, Ermənistan hökumətinin islahatlarını dəstəklədiklərini və bu istiqamətdə investisiya qoyduqlarını bəyan edib: “Belə ki, 2023-cü ilin büdcəsindən bunun üçün 65 milyon dollar ayrılıb ki, bu da iki il əvvəllə müqayisədə daha çoxdur”.
Blinken Ermənistanın iqtisadi və siyasi dayanıqlılığının güclənməsi üçün dəstəyi davam etdirdiklərini vurğulayıb.