Rusiyadan “Zəngəzur dəhlizi" məsələsinə növbəti REAKSİYA

Rusiya və İranın regionda nəqliyyat kommunikasiyalarının açılmasına oxşar yanaşmaları var.
Bunu Rusiya Xarici İşlər Nazirliyinin rəsmi nümayəndəsi Mariya Zaxarova İranın Ermənistandakı səfiri Mehdi Sobhaninin bəyanatını şərh edərkən deyib.
Bundan əvvəl İran səfiri fevralın 6-da keçirdiyi mətbuat konfransında bildirmişdi ki, region ölkələrindən “Zəngəzur dəhlizi" məsələsində Ermənistanın mövqeyini yalnız İran dəstəkləyir.
“Bu, 2025-ci il yanvarın 17-də Moskvada imzalanmış Rusiya və İran arasında hərtərəfli strateji tərəfdaşlıq haqqında sazişdə təsdiqlənir. Tərəflər qonşu regionlarda, o cümlədən Cənubi Qafqazda sülhün və təhlükəsizliyin qorunmasına töhfə verirlər", - Zaxarova bildirib.
Onun sözlərinə görə, yeganə fərq odur ki, Rusiya Cənubi Qafqazda nəqliyyat və iqtisadi əlaqələrin qarşısının alınması üçün Rusiya, Azərbaycan və Ermənistan baş nazirlərinin müavinlərinin iştirakı ilə üçtərəfli işçi qrupunun üzvüdür.
Zaxarova xatırladıb ki, adıçəkilən qrup çərçivəsində artıq həm hüquqi bazanın, həm də texniki parametrlərin əlaqələndirilməsi, Ermənistanla Azərbaycan arasında nəqliyyat marşrutlarının bərpası istiqamətində böyük işlər görülüb.
"Kommunikasiyaların blokadadan çıxarılmasının əsas prinsipi dövlətlərin öz ərazisindən keçən marşrutlar üzərində suverenliyini və yurisdiksiyasını qorumaqdır. Bu şərt həm Bakı, həm də İrəvan tərəfindən bəyənilib. Təəssüf ki, erməni tərəfinin mövqeyinə görə qrupun işi dondurulub", - Zaxarova bildirib.
O, Rusiyanın tam əməkdaşlığı bərpa etməyə hazır olduğunu vurğulayıb.
Bundan əvvəl Rusiya baş nazirinin müavini Aleksey Overçuk bəyan etmişdi ki, regionda münaqişənin həlli üçün 2021-ci ilin yanvarında yaradılmış Rusiya, Ermənistan və Azərbaycandan ibarət üçtərəfli qrupun fəaliyyətinə xitam verilməsi ilə bağlı rəsmi qərar qəbul edilməyib.