Tramp Ərdoğandan nə xahiş edib? - Türkiyə lideri açıqladı

Türkiyə prezidenti Rəcəb Tayyib Ərdoğan bildirib ki, ABŞ prezidenti Donald Tramp Ankaradan HƏMAS-ı Fələstin münaqişəsinin həlli prosesində iştirak etməyə razı salmasını istəyib.
Bu barədə Ərdoğan jurnalistlərə açıqlamasında bildirib:
"ABŞ-a səfərimiz və son telefon danışığımız zamanı prezident Trampa Fələstin məsələsinin mümkün həll yollarını müzakirə etdik. O, bizdən xüsusi olaraq HƏMAS ilə görüşməyi və onları danışıqlara razılıq verməyə inandırmağı xahiş etdi. Bu məsələ ilə bağlı dərhal tərəfdaşlarımızla əlaqə saxladıq".
O, Türkiyənin Trampın münaqişəni sülh yolu ilə həll etmək səylərini dəstəklədiyini və HƏMAS-ın mübahisəli ritorika olmadan danışıqlara hazır olduğunu bildirib.
“Hesab edirəm ki, bu, çox dəyərli addımdır”, - deyə prezident əlavə edib.
Ərdoğan həmçinin vurğulayıb ki, İsrail hələ də prosesə konstruktiv yanaşma nümayiş etdirməyib. "İsrail-Fələstin münaqişəsini iki dövlətli həll əsasında həll etməyə çalışacağıq. Bütün fələstinlilər bilir ki, Türkiyə Fələstinin maraqlarını müdafiə edir. Biz öz hüquqlarımızı müdafiə etdiyimiz kimi, Qəzzanın məzlum xalqının da hüquqlarını müdafiə edəcəyik".
Qeyd edək ki, bu gün Misirin Şarm əl-Şeyx şəhərində Qəzzada vəziyyətin nizamlanması üzrə danışıqlar keçirilir.
R.T.Ərdoğan deyib ki, Türkiyə Misirdə radikal HƏMAS qruplaşmasının nümayəndələri ilə İsrail arasında aparılan danışıqlarda müsbət nəticəyə ümid edir.
"HƏMAS Trampın sülh planına müsbət cavab verməklə sülhə sadiqliyini açıq şəkildə nümayiş etdirdi. Şarm əl-Şeyxdəki danışıqlar vacibdir. Biz yaxşı xəbər alacağımıza ümid edirik",- prezident deyib.
Türkiyə lideri vurğulayıb ki, Yaxın Şərqdə sülhün bərqərar olması üçün atəşkəs lazımdır.
Ərdoğan Donald Trampın təklif etdiyi sülh planına toxunaraq, "Sülh tək qanadlı quş deyil. Sülhün bütün yükünü fələstinlilərin və HƏMAS-ın üzərinə qoymaq ədalətsiz, yanlış və real deyil. Atəşkəs və ədalətli sülh ən ağlabatan variantlardır" deyib.
O, həmçinin qeyd edib ki, bu gün ən böyük problem İsrail Müdafiə Qüvvələrinin Qəzza zolağına endirdiyi zərbələrdir.