Ersin Tatar Qəbələ zirvəsindən danışdı

Türk Dövlətləri Təşkilatına (TDT) üzv ölkələrin Dövlət Başçıları Şurasının Qəbələdə keçirilən 12-ci Zirvə Görüşü türk dövlətləri arasında əməkdaşlığın genişlənməsinə öz töhfəsini verib.
Bu barədə Şimali Kipr Türk Cümhuriyyətinin (ŞKTC) Prezidenti Ersin Tatar Azərbaycana səfərinin yekunlarına dair Lefkoşada keçirdiyi mətbuat konfransında bildirib. Şimali Kipr lideri xatırladıb ki, ŞKTC nümayəndələri son üç ildə dəfələrlə Azərbaycanda keçirilən müxtəlif tədbirlərdə iştirak ediblər.
E.Tatar Azərbaycan Prezidenti İlham Əliyevin mövqeyini yüksək qiymətləndirib. “Azərbaycan lideri ilə şəxsi görüşdə ŞKTC ilə yaxınlıq bir daha vurğulanıb”, - deyə dövlət başçısı bildirib.
ŞKTC Prezidenti Türk Dövlətləri Təşkilatını “birlik və həmrəyliyin təmin edilməsi yolunda güc amili” adlandırıb. “Kipr türklərinin ədalətli mübarizəsinin türk dövlətləri tərəfindən dəstəklənməsi bizim üçün dəyərlidir”, - deyə E.Tatar əminliklə ŞKTC-ni “Şərqi Aralıq dənizində Türk dünyasının qalası” adlandırıb.
Türk dövlətləri ilə iqtisadi əməkdaşlığın genişləndirilməsinin vacibliyini qeyd edən Prezident E.Tatar bildirib: “ŞKTC-nin limanları və logistika imkanları türk ölkələri üçün faydalı ola bilər. Türkiyənin dəstəyi ilə biz TDT bazarlarına məhsullarımızın ixracı həcmini artırmağa hazırıq”. O, həmçinin Şimali Kipr universitetlərində TDT ölkələrindən, xüsusən də Azərbaycandan olan tələbələrin sayının iki dəfə artaraq 10 minə çatacağına ümid etdiyini ifadə edib.