İyunun 9-da ABŞ Prezidenti Barak Obama ölkə prezidenti vəzifəsinə seçilmək uğrunda mübarizədə Hillari Klintonun namizədliyini dəstəkləyib. Prezident Obama seçicilərə videomüraciətində Hillari Klintonun təcrübəsini və peşəkarlığını şərh edərək vurğulayıb ki, Klinton Birləşmiş Ştatların prezidenti vəzifəsini qəbul etməyə qabil olan ən yüksək ixtisaslı namizəddir. Obama daha sonra qeyd edib ki, Hillari Klintonu dəstəkləmək üçün onun seçkiqabağı kampaniyasında iştirak etməyə başlamasını səbirsizliklə gözləyir.

Prezident Demokratlar Partiyasından ikinci namizəd Berni Sandersin “inanılmaz kampaniyasına” və iqtisadi sahədə mövcud qeyri-bərabərliyi, habelə ABŞ-ın siyasi sistemində pulun hədsiz böyük təsir qüvvəsinə malik olduğunu aşkar etməsinə görə onu tərifləyib.

Xatırladaq ki, çərşənbə axşamı, iyunun 7-də Şimali Dakota, Kaliforniya, Montana, Nyu-Cersi, Nyu-Meksiko və Cənubi Dakota ştatlarında Demokratlar Partiyasının praymerizlərinin yekunlarına görə Hillari Klinton ABŞ prezidenti vəzifəsinə ABŞ Demokratlar Partiyasından ilk qadın namizəd olmaq üçün partiya qurultayı nümayəndələrinin kifayət qədər səsini toplayıb. Hillari Klintonun rəqibi Berni Sanders isə bildirib ki, Demokratlar Partiyasının qurultayı başlayana qədər mübarizəni davam etdirəcək. Bu il iyulun 25-28-də keçiriləcək qurultayda Respublikaçılar Partiyasının namizədi ilə mübarizədə demokratların yeganə namizədinin kim olacağı elan ediləcək.

Demokratlar Partiyasından bu nominasiya uğrunda gərgin mübarizəyə baxmayaq hər iki demokrat – həm Hillari Klinton, həm də Berni Sanders öz bəyanatlarında vurğulayıblar ki, prezident seçkilərində Donald Trampın qələbəsinə yol verməmək üçün bir-birini dəstəkləməyə hazırdırlar.


AzərTac