907-ci düzəlişin ləğvinə hazırlıq gedir

ABŞ Konqresinin Nümayəndələr Palatasında H.R. 6534 nömrəli qanun layihəsi rəsmi olaraq qeydiyyata alınıb.
Sənədin məqsədi ABŞ qanunvericiliyində Azərbaycana göstərilən yardımlara qoyulan məhdudiyyətlərin aradan qaldırılmasıdır.
Qanun layihəsi “Azərbaycana yardımla bağlı məhdudiyyətlərin ləğvi haqqında” adlanır və Azadlığı Müdafiə Aktı çərçivəsində tətbiq edilən, məşhur 907-ci düzəlişin (Section 907) ləğvini nəzərdə tutur. Məhz bu maddə uzun illər ərzində ABŞ hökumətinin Azərbaycana birbaşa dövlət yardımı göstərməsini məhdudlaşdırıb.
Sənəddə Konqresin mövqeyi belə əsaslandırılır ki, Azərbaycan müstəqillik əldə etdikdən sonra ABŞ və onun müttəfiqləri üçün etibarlı tərəfdaş kimi çıxış edib, həm sülh, həm də müharibə dövrlərində kritik əməkdaşlıq göstərib. Layihədə həmçinin vurğulanır ki, Azərbaycan Cənubi Qafqazda sülhün prioritet elan olunmasına sadiqlik nümayiş etdirib və regionda sülh razılaşmasına nail olunub, tərəflərin sərhədləri və ərazi bütövlüyü razılaşdırılıb.
Qanun layihəsinə əsasən, Azadlığı Müdafiə Aktının 907-ci maddəsinin tam şəkildə ləğvi təklif olunur və bununla bağlı qanunun məzmununda texniki dəyişikliklər də nəzərdə tutulur. Sənəd hazırda Nümayəndələr Palatasının Xarici Əlaqələr Komitəsinə göndərilib və müzakirə mərhələsindədir.
Qeyd edək ki, 907-ci düzəliş 1990-cı illərin əvvəllərindən etibarən ABŞ–Azərbaycan münasibətlərində ən mübahisəli mövzulardan biri olub və müxtəlif administrasiyalar dövründə yalnız müvəqqəti istisnalarla tətbiqi dayandırılıb. Yeni qanun layihəsi qəbul olunacağı təqdirdə, bu məhdudiyyətlərin hüquqi əsasının tam aradan qalxması ilə nəticələnə bilər.
Müşahidəçilər hesab edirlər ki, sənədin Konqres gündəminə çıxarılması ABŞ–Azərbaycan münasibətlərində yeni siyasi mərhələnin və Vaşinqtonun regiondakı geosiyasi yanaşmasının dəyişdiyinə dair mühüm siqnal kimi qiymətləndirilə bilər.