21-07-2022, 00:22
Şüvəlan qəsəbə Mədəniyyət evində Xurşidbanu Natəvanın 190 illik yubileyinə həsr olunmuş tədbir keçirilib.
İyulun 20-də Bakı Şəhər Mədəniyyət Baş İdarəsinin Şüvəlan qəsəbə Mədəniyyət evində Qarabağın sonuncu hakimi Mehdiqulu xan Cavanşirin qızı, Qarabağ xanlığının banisi İbrahimxəlil xanın nəvəsi, Azərbaycan bədii fikrinin görkəmli siması Xan qızı Xurşidbanu Natəvanın 190 illik yubileyinə həsr olunmuş tədbir keçirilib.
Tədbiri açıq elan edən aparıcı Aytən Nağıyeva tədbir iştirakçılarını salamlayıb, sonra Xurşidbanu Natəvan haqqında geniş məruzə ilə çıxış edib. Tədbirdə Azərbaycan Yazıçılar Birliyinin üzvü, Azərbaycan Aşıqlar Birliyinin üzvü, Azərbaycan Jurnalistlər Birliyinin üzvü, "Mirvarid Dilbazi Poeziya Məclisi" İctimai Birliyinin sədri, publisist Güllü Eldar Tomarlı, eyni zamanda şair, Azərbaycan Yazıçılar Birliyinin və Azərbaycan Aşıqlar Birliyinin üzvü, Hacıxanım Səadət Buta iştirak edərək Xan qızı Natəvanın həyat və yaradıcılığı haqqında tədbir iştirakçılarına ətraflı məlumat verərək şairənin ədəbi yaradıcılığı, gördüyü xeyriyyə işləri ilə yadda qaldığını qeyd ediblər. Güllü Eldar Tomarlı və Hacıxanım Səadət Buta Xurşidbanunun ilhamla qələmə aldığı şeirləri səsləndiriblər.
“Səma” rəqs ansamblının qızlardan ibarət “Məşəl” rəqs kollektivinin çıxışı tədbir iştirakçıları tərəfindən böyük maraqla qarşılanıb.
20-07-2022, 17:11
"Nur Ocağı" Hənifə Şəbnəmin şeirlərini təqdim edir:
Gözlərim
Nə zaman keçmişi seyrə çıxıram,
Qəhərdən kövrəlib dolur gözlərim.
Kirpiklərim şimşək kimi çaxnaşır,
Leysan yağan bulud olur gözlərim.
-----
Yaş yandıran yanağımda iz qalıb,
Baxışımda nə işvə, nə naz qalıb,
Odu sönüb kül altında köz qalıb,
Nuru azaldıqca solur gözlərim.
.........
Dürna qatarına bənzəyir illər,
Şəbnəmi külək tək qovur fəsillər,
Xəzan gəlib yasa batıbdı tellər,
Heyfini özündən alır gözlərim.
Bilmirəm
Deyirsən ki daha gileyli yazma,
Sevginin rəngini tuta bilmirəm.
Sinəmdə yurd salıb həsrət açısı,
Neyləyirəm söküb ata bilmirəm.
.......
Gileylənmək sanma mənə asandı,
Göynərtisi yeddi başlı çibandı,
İçmək olmur sanki açı dərmandı,
Arasına şərbət qata bilmirəm.
........
Yumaq kimi şözələnir yaddaşım,
Dərya olub boğur məni göz yaşım,
Yar vəfasız oldu, ölüb qardaşım,
Yorğanım od alıb yata bilmirəm.
.........
Sən hardan biləsən mən nələr çəkdim?
Əllərim qoynumda boynumu bükdüm.
Neçə məzar üstə göz yaşı tökdüm,
Axıb dərya oldu bata bilmirəm.
......
Kənardan baxana döyüş asandı,
Hökm amansız olub Şəbnəm qurbandı,
Ağlayanda, ağladanda insandı,
Zalımın felindən ötə bilmirəm.
Sənəm Səbayelin xatirəsinə
........
Bir görüşlə ay Sənəm,
Yazıldın yaddaşıma.
O qədər doğmalaşdıq,
Döndün qız qardaşıma.
.......
Toy bayrama bənzədi,
Sizi gördüyüm günüm.
Sığal çəkdi başıma,
Gülümsər təbəsümün.
........
Əcəl zamansız aldı,
Ayrıldın cərgəmizdən.
Şəbnəm sizdən doymamış,
Sən nə tez doydun bizdən.
.........
Yazıram
Bir kövrək qanadlı Pərvanə olub,
Oduna yandığım şamdan yazıram.
Əriyən Şam, mənim bənizim solub,
Ah nalə çəkirəm qəmdən yazıram.
.........
Ömür yaşamamış yaşına dolan,
Arzusu muradı gözündə qalan,
Sevgiyə aldanıb qurbanlıq olan,
Ağlı dərya bəxti kəmdən yazıram
.........
Qəzaya uğradı sultanlıq taxdım
Dərya tək bulanıb lil olub axdım
Ruhumu apardı dalınca baxdım
Mənə qalan dərdi qəmdən yazıram
.........
Qəlbimdəki ağrı boyumu aşır
Yaş yandırıb yanaqlarım alışır
Göz yaşlarım mürəkkəbə qarışır
Qəlbimə süzülən andan yazıram
.........
Dönüb dağda Şəbnəm adlı səyyada
Sevgi gəzib tora düşdüm qayada
Bəxdim atlı özüm oldum piyada
Çatmadığım arzu kamdan yazıram
.......
Getdi
Oduma yanmağa pərvanə olan
Duman tək başıma dolandı getdi
Çal çarpaz dağ çəkib sinəmin üstə
Özü atəşimə qalandı getdi
.......
Öz evini yıxdı yad əlləriylə
Məni ağlatdı bəd əməlləriylə
Sevgimin yıxılan təməlləriylə
Ağlı dərya kimi bulandı getdi
........
Qayıt dedim doğru yola gəlmədi
Çox can dedim dəyərini bilmədi
Nə zaman ki peşkəş verdim almadı
Axırda sevgimi diləndi getdi
.........
Xəyanəti oldu başına töhmət
Əməlindən özü çəkdi xəcalət
O qaldı məndəki sevgiyə həsrət
Mənimsə varlığım talandı getdi
......
Rəvadımı Şəmnəm nələr yaşadı
İllərin yükünü tənha daşıdı
Köksümün altında sevgim üşüdü
Yaş olub gözümdən ələndi getdi
Yuxuda kəndi gördüm
Xatirəm çözələnib al əlvan yumaq kimi,
Məni məndən apardı dəcəl bir uşaq kimi,
Sevincimdən qaynayıb daşanda bulaq kimi,
Xəyalların içində yatıb yuxuya qaldım.
Gözlərimi yumanda hər yan çəməndi gördüm,
Yuxuda kəndi gördüm…
........
Xınalı kəklik kimi daşdan daşa səkirdim,
Xallı kəpənək olub güldən şirə çəkirdim
Ziyarətə bənzədib hər nə görsəm öpürdüm
(Sarı bulağa)endim (Bala təpə)yə cıxdım
(Bayrambulağı)ndakı qurulan bəndi gördüm
Yuxuda kəndi gördüm
..........
Qoca palıd yağışda başıma çətir oldu
Hörüyümə ilişən kollar saçımı ¹yoldu
Səmada çaxan şimşək yerdə vahimə saldıö
Qorxumdan diksinəndə kolluqdan düzə çıxdım
Cilovunu qoparan hürkək səməndi gördüm
Yuxuda kəndi gördüm
.......
Kölların arasında Bənövşələr boylanır
Yağış çəməni yuyub Lalə alışıb yanır
Meh əsib, şeh tökülür çəmənlər qurulanır
Sərçələr civildəşib, arılar şirə çəkir
Təbiyətin qoynunda nə varsa şəndi gördüm
Yuxuda kəndi gördüm
........
Bir yanda (Şindi) dağı əzəmətlə ucalır
Yamac gül çiçək açıb zirvəsində qar qalıra
Yayda (Keçəl təpə)də nənələr binə salır
Əyləşib süfrəsində nənəmə qonaq oldu
Əlvan boğçasındakı noğulu qəndi grdüm
Yuxuda kəndi gördüm
......
.
Gözümdə canlandırıb yenilməz Sultan kimi
Gəlişini gözlədim ağ atlı oğlan kimi
Bir nurani bəxdimi röyamda sənə yazdı
Həyatda can yoldaşı sevgimə bağban kimi
.......
Mürgülü çiçək idim cəh cəhindən ayıldım
Dən tutan sünbül oldum bar verdikcə əyuldum
Dərib səfamı gördün qiymətini bilmədin
Üzərimdən yol saldın ovuldum köşən kimi
.........
Gülümsər təbəssümüm dondu dodaqlarımda
Göz yaşım cığır saldı lalə yanaqlarımda
Şimşək çaxdı gürültu qopdu qulaqlarımdan
Yağış olub buluddan süzüldüm leysan kimi
.......
Ay vəfasız ömrümü sənə vermişdim hədər
Etibar eyləmişdim inanıb özüm qədər
Özüm sevginə əsir ruhum oldu dərbədər
Yaşamadan günlərim ötüşdü zaman kimi
........
Gözlədiyim ağ atlı oğlan döndü kabusa
İki günüm toy bayram üçüncü döndü yasa
Ölmək istədim bəlkə iztirablarım susa.
Məni güclə yaşatdı özünə qurban kimi
.......
Gündə neçə yol düşüb çıxdım qaynar qazandan
Bilmədim ondan küsüm ya bəxdimi yazandan
Nə Şəbnəmə yar oldu nə sevgisinə bağban
Dönüb şaxtalı qışa gəldi qar boran kimi
.....
Yar yolunda canımı çox eyləsəmdə fəda
Doğmalaşa bilmədim hər an bənzədim yada
Axan göz yaşım ümman, oldu mən özüm ada
Qəvvas olub dəryada üzməyidə bacardım
........
Vəfasıza uçmağa həran qol qanad oldum
Yenə qəlbində uzaq gözlərində yad oldum
Verdiyi əzablardan nə qədər bərbad oldum
O qədər tab gətirib dözməyidə bacardım
......
Bu zalım zamaniyə oldum günahsız qurban
İnsan bir dəfə ölər mən yüz yolla verdim can
Yalvarıb mətləbimi arzuladım tanrıdan
Düyün düşən bəxdimi çözməyidə bacardım
......
Keşməkeşli həyatın sınağından dərs aldım
İmtahanda meylimi kağız qələmə saldım
Qabarlı əlllərimin zəhmətiylə ucaldım
Alnım açıq üzüm ağ gəzməyidə bacardım
.......
Mənə çətin dərs verdi həyt adlı bu məktəb
Kipiyim qələm oldu göz yaşlarım mürəkkəb
Sonradan ozan oldum mən Hənifə Şəbnəm tək
Dərdimi ağ kağıza yazmağıda bacardım
20-07-2022, 13:57
"Nur Ocağı" Zəkəriyyə Qurbanovun şeirlərini təqdim edir:
Ümidlər sonuncu ölürlər
Silib əzabları, silib dərd-səri,
Qəlbimdə bir ümid gülü bitirdin.
Unutdum kədərli xatirələri,
Sən mənim ömrümə işıq gətirdin.
İndisə tərk edib gedirsən məni,
Tək qalan cismdir, ayrılansa can.
Unutma, əzizim, unutma, səni
Her yağan yağışla xatırlayacam.
Gedirsən, mən isə tək qalacağam,
Yağışlar könlümə həmdəm olacaq.
Səni gözləyəcəm ümidlə hər an,
Ümidlər sonuncu ölürlər ancaq.
Məktəb
Qayğısızdım bir zamanlar,
İndi bitir həmin anlar,
Həyəcandan qız-oğlanlar,
Girib başqa dona, məktəb.
*
Həyat albom, biz şəkillər,
Dolandı aylar, fəsillər,
Səndə keçirdiyim illər,
Heyif çatır sona, məktəb.
*
Çalan son zəngdirmi yəni,
Demək tərk edirəm səni,
Oğluntək yola sal məni,
Dua elə, ana məktəb.
Heyif
Unutdun sən məni ötən gün kimi,
İçdiyin o anda-amana heyif...
Sənə bəslədiyim təmiz sevgini,
Döndərdin böyük bir yalana heyif...
*
Səni düşünürdüm, bilsəydin, necə?
Nə gündüz bilirdim, nə də ki gecə.
Mənli günlərini döndərdin heçə,
Sənə sərf etdiyim zamana heyif...
*
Nə deyim, ay fələk, daha nə deyim?
Vəfasız yardandır sənə gileyim.
Onsuz yetim qalmış qəmli taleyim,
Düşübdür çiskinə, dumana heyif...
*
Necə gözəl idi, necə o çağlar,
Qəmli könlüm o illəri soraqlar,
Sevgiylə yaranan bağçalar, bağlar,
Nədənsə dönübdür xəzana heyif...
Gələcəyəm mən
Səni düşünürəm, olsam da harda,
Dondurmaz sevgimi boran da, qar da,
Laləli, nərgizli bir ilk baharda
Sənin görüşünə gələcəyəm mən.
*
Ömür parçalanib olsa da yarı,
Ürəyim can atır sevginə sarı,
Keçib dənizləri, kecib çayları,
Sənin görüşünə gələcəyəm mən.
*
Qurut gözlərində qalan nəmini,
Yandır məhəbbətin sönən şəmini,
Unudub dünyanın dərdi-qəmini,
Sənin görüşünə gələcəyəm mən.
Kaş
Silinib gedəydi duman, bulud, çən,
İnsan saçlarına düşməyəydi dən.
Zülümdən, əzabdan, qəmdən, qüssədən,
Gözlər kədərlənib dolmayaydı kaş.
*
Sevgiylə vuraydı bütün ürəklər,
Qol- qanad açaydı arzu - diləklər,
Könüllər oxşayan güllər, çiçəklər,
Təzə- tər qalaydı, solmayaydı kaş.
*
Ömrü uzanaydı səadətlərin,
Zamanı bitəydi şikayətlərin,
Vüsala yol gedən məhəbbətlərin,
Sonunda ayrılıq olmayaydı kaş.
Bağışla məni
Sevgimi dəyişməz duman da, sis də,
Verərəm canımı, təki sən istə.
Hər yağış yağanda, başının üstə
Tutduğun çətrinə bağışla məni!
Hər acı sözünə söyləyərəm can,
Qəlbim səninlədir, səninlə hər an.
Gözəl vücuduna gözəl yaraşan,
Saçının ətrinə bağışla məni!
17-07-2022, 23:48
“Bomba şousu”: Polis Petrosyanın evində axtarış aparıb
Ermənistanın birinci prezidenti Ter-Petrosyanın evinə bomba qoyulduğu barədə məlumat daxil olub.
Bu barədə eks-prezidentin mətbuat katibi Aram Musinyan “Sputnik Ermənistan”a deyib.
Bildirib ki, Petrosyanın malikanəsində polis əməkdaşları axtarış aparıblar, həmçinin əraziyə Patrul Xidmətinin alayı cəlb edilib.
Axtarışların nəticə vermədiyi, məlumatın yalan olduğu qeyd edilir.
17-07-2022, 14:35
Havva Nazim
"Nur Ocağı" təqdim edir
Kəndim
Həsrətəm yaz vaxtı “Öküzdağı”nın,
Döşündə lalələr saymağa, kəndim.
Utancaq güllərə bir tumar çəkib,
Bənovşə ətrini duymağa, kəndim.
*
Dümanın dərələr boyu sürünər,
Dümağ yapıncıya hərdən bürünər,
Bax yalın başından, füsun görünər,
Heç səndən olarmı doymaq, a kəndim?!
*
Şirin xəyallara səndə dalam kaş,
“Kələmdərəsi”ndə qələm alam kaş,
Pürrəngi çay ilə qonaq olam kaş,
Səhərlər bal dadan qaymağa, kəndim.
*
Yellənəm dumanın çənli saçından,
Nələr yada düşməz binə köçündən?
Toplayam yenə də otlar içindən,
Quzqulaq, gicitkən oymağa, kəndim.
*
Qəlbindən həsrəti bir gün siləcək,
Səni görcək bil ki, üzü güləcək,
Havva qucaq açıb yenə gələcək,
Yolunda bu canı qoymağa, kəndim.
10.04.2022
Həsrət
Dəyişməyin bir tozunu Vətənin,
Qucaq-qucaq almazına qürbətin.
Yavan çörək orda baldır, inan ki,
Unutmazsan damağında ləzzətin.
*
Yada düşsə qəlbin oda qalanar,
Hər telindən nisgil yükü sallanar,
Xəyallarda el-obaya yollanar,
İçin-için hey çəkərsən həsrətin.
*
Nə toyunda, nə yasında olursan,
Nə ağlayır, nə ürəkdən gülürsən,
Sən elinin qürbətlərdə bilirsən,
Hər tozunun, zərrəsinin qiymətin.
*
Hardan düşdün bu yabançı ellərə?
Dön yurduna, min qanadlı yellərə.
Ya dərviştək düş piyada yollara,
Çəkmə daha qürbət elin minnətin.
*
Bax, Havvanın könlü qubar eləyir,
Vücudunu həsrətlərə bələyir,
Axşam-axşam oturanda diləyir,
Qohumların dadlı-duzlu söhbətin.
29.04.2022
Gedirəm
Hərəyə bir ömür verib Yaradan,
Yolunun rəngləri ağdan, qaradan,
Çəkib göy qurşağı mən də aradan,
Rənglərin selində üzüb gedirəm.
*
Yerdən ta göylərə cığır salıram,
Küsən buludların könlün alıram,
Açıb qanadımı laçın oluram,
Əngin səmalarda süzüb gedirəm.
*
Dəryanın damlası bilib özümü,
Havvayam, deyirəm hərdən sözümü.
Hər kiçik damlada qoyub izimi,
Sonsuz ümmanlara sızıb gedirəm.
07.07.2022
Söylə
Söylə, göyərçinim, söylə qəribə,
Mənə yaxınımdan, yadımdan söylə.
Külünün hisləri ovcumda qalan,
İsti ocağımdan, odumdan söylə.
*
Söylə, darıxırmı ata ürəyi?
Anam bişiribmi sacda çörəyi?
Yanında vardımı təzə dürməyi?
Yavan çörəyimdən, cadımdan söylə.
*
Azadsan uçuşda, vüsətə dal sən,
Sərhədsiz səmada qanadlar çal sən,
Havvanın elindən yolunu sal sən,
Vətənə salamlar adımdan söylə.
25.12.2021
16-07-2022, 21:46
ABŞ Rusiyanı İrəvandan çıxarır
ABŞ Rusiyanı Cənubi Qafqazdan çıxarmaq üzərində işləyir.
Bu sözləri erməni ekspert Suren Sərkisyan FTX rəhbəri Uilyam Bernsin İrəvana səfərini şərh edərkən qeyd edib.
O bildirib ki, ABŞ-ın regionda siyasəti dəyişməyib. Ermənistan-Türkiyə və Ermənistan-Azərbaycan münasibətlərinin tam bərpasına yönəlib.
Sərkisyanın fikrincə, məhz buna görə Berns baş nazirdən əlavə Ermənistan MTX-nin deyil, Təhlükəsizlik Şurasının katibi ilə görüşdü, çünki Ermənistan-Azərbaycan münasibətlərinin tənzimlənməsi istiqamətində prosesə İrəvan tərəfdən Armen Qriqoryan rəhbərlik edir, Azərbaycan Prezidentinin köməkçisi Hikmət Hacıyevlə görüşən də odur.
“FTX-nin regionda hədəfi Rusiya və İran olaraq qalır. Ancaq hazırda əsas diqqət Rusiyanın Cənubi Qafqazdan çıxarılmasıdır, buna görə də Tehran hələlik sakitliyini qoruyur.
ABŞ Rusiyanın Ermənistanda hərbi bazasının və Qarabağda sülhməramlılarının olmasını Ermənistan-Türkiyə və Ermənistan-Azərbaycan münasibətlərinin normallaşması prosesinə ən ciddi maneə sayır. Buna görə də anlamaq lazımdır ki, Berns İrəvana hardan gəlib və buradan hara gedəcək”, - Sərkisyan vurğulayıb.
Qeyd edək ki, FTX rəhbərinin İrəvana səfəri ciddi reaksiyalara səbəb olub. Belə ki, bu, son 28 ildə ilk dəfədir.
Bernsin İrəvana səfəri haqda məlumatlar qapalı saxlanılırdı, yalnız ötən gün axşam saatlarında onun Paşinyan və Qriqoryanla görüşü təsdiqləndi.
12-07-2022, 16:03
Ermənistanda təlimə çağırış birmənalı qarşılanmadı
Avqustun 1-dən oktyabrın 30-dək Ermənistanda hərbi vəzifəlilərin təlimi keçiriləcək. Hökumətin ehtiyatda olan hərbçiləri üç aylıq təlimlərə çağırması ölkədə birmənalı qarşılanmayıb. Ehtiyatda olan polkovnik Artaşes Mxitaryan deyib ki, 2017-ci ilin noyabrında qəbul edilmiş “Hərbi xidmət haqqında” qanuna əsasən, təlim-məşq toplanışları qısa müddətə keçirilməlidir. Amma indi 3 aylıq müddətdən söhbət gedir:
“Adətən 7-10 günlük müddətlərdə bacarıqların təkmilləşdirilmə məşqləri, yeni silahlarla tanışlıq təlimləri keçirilirdi. Artıq rüblük təlimlər nəzərdə tutulub. Əvvəllər yeni batalyonların formalaşdırılması əməliyyatlarının hazırlanması üçün üç aylıq toplantılar keçirilirdi”.
Polkovnik belə qənaətə gəlib ki, üç aylıq hərbi təlimlər ehtiyatda olanları döyüş növbətçiliyinə cəlb etmək üçün keçirilir.
“Kadr problemi var, Ermənistan Respublikasının cəbhə xətti artıq bir neçə dəfə uzundur. Mövcud qüvvələrlə döyüş növbətçiliyi apara bilmirik, ona görə də bu üç aylıq təlim-məşq toplanışları keçirilir. Avqustun 1-dən etibarən 1400-ə yaxın adam təlimə cəlb ediləcək ki, onların əksəriyyəti motoatıcı bölmələrdə xidmət keçəcək”.
Hökumətin 23 iyun qərarında toplanışa ehtiyatda olan 1444 nəfərin çağırılması nəzərdə tutulur. Onların 1249-u əsgər və praporşik, 65-i böyük praporşik, 130-u zabitdir. Hərbi toplanış Motoatıcı Qoşunları, Mühəndis Qoşunları, Raket-Artilleriya Qoşunları, Kəşfiyyat Qoşunları və Rabitə Qoşunlarını əhatə edəcək.
9-07-2022, 07:42
Hekayə
Əsgər Ordubadlı yazır: "Dörd ildən sonra"
Adım Samiddir. Dörd il idi ki, ailəmdən ayrılmışdım. Daha o evdən əlaqəni kəsmiş, hətta yeddi yaşlı qızım Nurayı görmək üçün də getmirdim.
Qızımın mənim yolumu gözləməsini, ata nəfəsinə, ata qayğısına nə qədər çox ehtiyacı olduğunu da unutmuşdum.
Şəhərin mərkəzində ailəmdən uzaq bir yerdə ev kiralamış, tək-tənha orada yaşayırdım.
Evin də bütün işlərini özüm görürdüm. İkinci bir ailə də qurmamışdım, çünki evli olduğumu bilirdim, sadəcə gedib sahib çıxmaq istəmirdim.
Bəlkə də dörd ildən sonra yenidən qayıdıb getməyə utanırdım, yaxud da məni qəbul etməzlər deyə çəkinirdim.
Bir gün əsl möcüzə baş verdi.
Axşam düşürdü. Evə qayıdırdım. Yolun sağ kənarında daşın üstündə balaca bir qız uşağı oturub hönkür-hönkür ağlayırdı. Olardı yeddi - səkkiz yaşı. Balaca əllərini üzünə sıxmışdı. Ona yaxınlaşıb yanında əyləşdim. O sanki bunu hiss etmir, ağlamağına davam edirdi.
Bir az nəvazişlə və bir az da təəccüblə soruşdum,
-- Qızım nə olub, niyə ağlayırsan?
O əllərini üzündən çəkdi. Ağlamağını kəssə də dinmədi, sadəcə dərindən bir ah çəkdi.
Uşağın kədərli olduğu çöhrəsindən duyulurdu. Sanki kimsə onun qəlbini qırmışdı.
Hava olduqca soyuq idi. Külək uğuldayırdı. Uşağın əynində tək sadəcə bir qolsuz köynək və çox nazik bir şalvar olduğunu görüb təəccüblü soruşdum
--Qızım üşümürsən? Hava çox soyuqdu axı...
Qız titrək səslə dedi
-- Üşüyürəm..
dedim bəs niyə qalın geyməyibsən? Xəstələnərsən axı....
Qızcığaz sanki utandı və çəkinə-çəkinə astadan dedi:--- Qalın geyimlərim yoxdu ki....
Əynimdəki pencəyi çıxarıb uşağın çiyninə saldım.
O başını aşağı salıb, əllərini bir-birinə sıxıb durmuşdu.
Adını soruşdum dedi Aytacdır. Onunla bir xeyli söhbət etdikdən sonra məlum oldu ki, Aytac burada əyləşib həmişəki kimi anasını gözləyir.
Anası Səmayə xanım çörək sexində işləyir və birazdan gələcək, onlar evlərinə gedəcəklər.
Aytac asta səslə onu da əlavə etdi ki, həmişə anam evə tez gələrdi, bu gün nəsə bir az yubanıb.
Atasını isə heç tanımır, deyir atam bizi atıb gedib. Hara getdiyini isə bilmirəm.
-- Qızım, atan yenidən qayıdıb gəlsə nə edərsən, yenə də onu qəbul edib ata deyərsən, ya yox?
-- O qayıdıb gəlməz:- dedi
-- İndi onun başqa arvadı, uşaqları var. O bizi istəməz.. yox qayıtmaz... birdə gəlməz...
O bu sözləri deyərək yenidən ağlamağa başladı.
Ona çox qəlbim yandı, bağrıma basıb gözlərini sildim, pörtülmüş lalə yanaqlarından öpdüm. Dedim ağlama qızım gör nə deyirəm.
-- Atan səni çox sevir və haçansa qayıdıb gələcək, amma o elə bilir ki yenidən qayıdıb gəlsə sən onu çox istəməyəcək, ona ata deməyəcəksən. Bəlkə də ona görə gəlmir...
Bu sözü deyərkən uşağın üzünə soyuq bir təbəssüm qondu.
O dedi :- Çox istərəm ki, atam qayıdıb gəlsin, mənə təzə paltarlar, oyuncaqlar alsın.
Hamı kimi mənim də atam olsun.
Atam olsun ki, heç kim atan səni atıb gedib deməsin və mən də ağlamayım.
Ağlayanda bağrına basıb, gözümü silsin, qızım deyib saçlarımı sığallasın...
Çox istərəm...çox...çox....
Bu zaman Aytacın anası da işdən qayıtdı və qızını da götürüb evlərinə getdilər...
Mənsə o daşın üstündə bir xeyli oturub xəyala daldım.
Axı mən də bir atayam, mənim də yeddi yaşında bir balam var.
İndi mənim də qızım Aytac kimi ata yolu gözləyir bəlkə də...
O da istəyir k,i mən onu bağrıma basım, üz gözündən öpüb, saçlarına sığal çəkim. O da istəyir ki, ata nəfəsini hiss etsin. Daima arxasında duracaq, onun qayğısına qalacaq, hər nazını çəkəcək bir atasının olduğuna inansın.
Bu düşüncələrlə birbaşa evə yollandım.
Həmin o evə.
Dörd ildir tək - tənha qoyub getdiyim ailəmin yanına.
Qapını döydüm. Həyat yoldaşımın çöhrəsindəki gülüşlər, qızımın boynuma sarılıb məni bərk-bərk qucaqlaması...
- Atam, daha səni heç yerə buraxmayacam, sən həmişəlik mənim atam olacaqsan deməsi...
Sanki o evə zülmətdən bir işıq doğdu, elə bil dörd illik həsrətlərinə son qoyuldu o gün.
Mən onlardan üzürxahlıq etdim, onlar da məni bağışladılar və çox şad oldular.
Əllərimi göyə açdım. Rəbbimə şükr etdim
-- Ey ucalardan uca olan Aləmlərin Rəbbi, nə olaydı ki, kaş bir gün yolda gördüyüm o balaca qızın da atası əməlindən peşman olub öz ailəsinin yanına qayıdardı.
Əsgər Ordubadlı yazır: "Dörd ildən sonra"
Adım Samiddir. Dörd il idi ki, ailəmdən ayrılmışdım. Daha o evdən əlaqəni kəsmiş, hətta yeddi yaşlı qızım Nurayı görmək üçün də getmirdim.
Qızımın mənim yolumu gözləməsini, ata nəfəsinə, ata qayğısına nə qədər çox ehtiyacı olduğunu da unutmuşdum.
Şəhərin mərkəzində ailəmdən uzaq bir yerdə ev kiralamış, tək-tənha orada yaşayırdım.
Evin də bütün işlərini özüm görürdüm. İkinci bir ailə də qurmamışdım, çünki evli olduğumu bilirdim, sadəcə gedib sahib çıxmaq istəmirdim.
Bəlkə də dörd ildən sonra yenidən qayıdıb getməyə utanırdım, yaxud da məni qəbul etməzlər deyə çəkinirdim.
Bir gün əsl möcüzə baş verdi.
Axşam düşürdü. Evə qayıdırdım. Yolun sağ kənarında daşın üstündə balaca bir qız uşağı oturub hönkür-hönkür ağlayırdı. Olardı yeddi - səkkiz yaşı. Balaca əllərini üzünə sıxmışdı. Ona yaxınlaşıb yanında əyləşdim. O sanki bunu hiss etmir, ağlamağına davam edirdi.
Bir az nəvazişlə və bir az da təəccüblə soruşdum,
-- Qızım nə olub, niyə ağlayırsan?
O əllərini üzündən çəkdi. Ağlamağını kəssə də dinmədi, sadəcə dərindən bir ah çəkdi.
Uşağın kədərli olduğu çöhrəsindən duyulurdu. Sanki kimsə onun qəlbini qırmışdı.
Hava olduqca soyuq idi. Külək uğuldayırdı. Uşağın əynində tək sadəcə bir qolsuz köynək və çox nazik bir şalvar olduğunu görüb təəccüblü soruşdum
--Qızım üşümürsən? Hava çox soyuqdu axı...
Qız titrək səslə dedi
-- Üşüyürəm..
dedim bəs niyə qalın geyməyibsən? Xəstələnərsən axı....
Qızcığaz sanki utandı və çəkinə-çəkinə astadan dedi:--- Qalın geyimlərim yoxdu ki....
Əynimdəki pencəyi çıxarıb uşağın çiyninə saldım.
O başını aşağı salıb, əllərini bir-birinə sıxıb durmuşdu.
Adını soruşdum dedi Aytacdır. Onunla bir xeyli söhbət etdikdən sonra məlum oldu ki, Aytac burada əyləşib həmişəki kimi anasını gözləyir.
Anası Səmayə xanım çörək sexində işləyir və birazdan gələcək, onlar evlərinə gedəcəklər.
Aytac asta səslə onu da əlavə etdi ki, həmişə anam evə tez gələrdi, bu gün nəsə bir az yubanıb.
Atasını isə heç tanımır, deyir atam bizi atıb gedib. Hara getdiyini isə bilmirəm.
-- Qızım, atan yenidən qayıdıb gəlsə nə edərsən, yenə də onu qəbul edib ata deyərsən, ya yox?
-- O qayıdıb gəlməz:- dedi
-- İndi onun başqa arvadı, uşaqları var. O bizi istəməz.. yox qayıtmaz... birdə gəlməz...
O bu sözləri deyərək yenidən ağlamağa başladı.
Ona çox qəlbim yandı, bağrıma basıb gözlərini sildim, pörtülmüş lalə yanaqlarından öpdüm. Dedim ağlama qızım gör nə deyirəm.
-- Atan səni çox sevir və haçansa qayıdıb gələcək, amma o elə bilir ki yenidən qayıdıb gəlsə sən onu çox istəməyəcək, ona ata deməyəcəksən. Bəlkə də ona görə gəlmir...
Bu sözü deyərkən uşağın üzünə soyuq bir təbəssüm qondu.
O dedi :- Çox istərəm ki, atam qayıdıb gəlsin, mənə təzə paltarlar, oyuncaqlar alsın.
Hamı kimi mənim də atam olsun.
Atam olsun ki, heç kim atan səni atıb gedib deməsin və mən də ağlamayım.
Ağlayanda bağrına basıb, gözümü silsin, qızım deyib saçlarımı sığallasın...
Çox istərəm...çox...çox....
Bu zaman Aytacın anası da işdən qayıtdı və qızını da götürüb evlərinə getdilər...
Mənsə o daşın üstündə bir xeyli oturub xəyala daldım.
Axı mən də bir atayam, mənim də yeddi yaşında bir balam var.
İndi mənim də qızım Aytac kimi ata yolu gözləyir bəlkə də...
O da istəyir k,i mən onu bağrıma basım, üz gözündən öpüb, saçlarına sığal çəkim. O da istəyir ki, ata nəfəsini hiss etsin. Daima arxasında duracaq, onun qayğısına qalacaq, hər nazını çəkəcək bir atasının olduğuna inansın.
Bu düşüncələrlə birbaşa evə yollandım.
Həmin o evə.
Dörd ildir tək - tənha qoyub getdiyim ailəmin yanına.
Qapını döydüm. Həyat yoldaşımın çöhrəsindəki gülüşlər, qızımın boynuma sarılıb məni bərk-bərk qucaqlaması...
- Atam, daha səni heç yerə buraxmayacam, sən həmişəlik mənim atam olacaqsan deməsi...
Sanki o evə zülmətdən bir işıq doğdu, elə bil dörd illik həsrətlərinə son qoyuldu o gün.
Mən onlardan üzürxahlıq etdim, onlar da məni bağışladılar və çox şad oldular.
Əllərimi göyə açdım. Rəbbimə şükr etdim
-- Ey ucalardan uca olan Aləmlərin Rəbbi, nə olaydı ki, kaş bir gün yolda gördüyüm o balaca qızın da atası əməlindən peşman olub öz ailəsinin yanına qayıdardı.
8-07-2022, 18:53
Cümşüd Əlinin şeirlərini təqdim edirik
Təcnis
İlk baxışdan sənə sevgim yarandı,
Sən unutdun düz ilqarı, yar andı,
Bağrım başı vurduqların yarandı,
Dərd çəkməkdən qalmayıbdı sər indi.
Eşq odunun avandı nə, tərsi nə?
Üzür məni mərmər buxaq, tər sinə,
İstəyirsən yar düzünə,tərsinə,
Xalı təki yollarına sər indi.
Kaş heç məni doğmayaydın oy, ana,
Nəzir payla yatmış bəxtim oyana,
Cümşüd kimi eşq oduna o, yana,
Deməyə ki ,eşqin odu sərindi.
************
Sənə şeir yazıram,
Duyğularım tər-təmiz.
Sənə olan hisslərim,
Mavi, sahilsiz dəniz.
Bir mahir qəvvas kimi,
Baş vururam dənizə.
Bir inci çıxarıram,
Sənintək Ay bənizə.
Yosunlardan alıram,
Sənin gültək ətrini.
Xəyalına dalıram,
Uca tutum xətrini.
Gözəldir.
Təcnisləri elə yazaq dostlarım,
Tuş gəlməsin söz, söhbətə bir qala.
Çələng təki, misra-misra toxuyaq,
Deməsinlər sən kənarda bir qal,a.
İlhama gətirsin çəmən, düz yazaq,
Sözləri muncuqtək ipə düz,yazaq,
Hər nə yazsaq,dəqiq yazaq, düz yazaq,
Gəlin təcnislərdən quraq bir qala.
İstəmərəm bir sözümdən inci,tək,
Cahil olaq,birgə qəlbi incidək,
Şeir yazaq mirvaritək,incitək,
Elə yazaq yaddaşlarda bir qala.
Açıqdır hər zaman qəlb dərim sizə,
Qurbandır ruhum da,can,dərim sizə,
Sənət dünyasından söz dərim sizə,
Cümşüd şeriyyatdan ocaq bir qala.
Qayıt geri
Sən gedəli yaşamıram elə bil,
Ay anam hardasan bir qayıt geri?!
Adını çəkməkdən qabar olub dil,
Ay anam hardasan bir qayıt geri?!
Nə vaxtdır həsrətəm laylan, sözünçün,
O isti qucağın, mələk üzünçün,
Darıxır başımda,yumşaq dizinçün,
Ay anam hardasan bir qayıt geri?!
Son qoyaq həsrətə..,buraxmadılar,
Yanına xidmətə..,buraxmadılar,
Sağikən cənnətə..,buraxmadılar,
Ay anam hardasan bir qayıt geri?!
Bu qəmdən, kədərdən azad etməyə,
Könül sarayımı abad etməyə,
Bu sınıq qəlbimi sən şad etməyə,
Ay anam hardasan bir qayıt geri?!
İndi zəmanəmiz dəyişibdi çox,
Kasıba, aclara zülüm edir tox,
Cümşüdü sən qədər başa düşən yox,
Ay anam hardasan bir qayıt geri?!
Ağdam rayonu Mirəşşəlli kəndi.
Arasında
Qüssə gördüm, kədər gördüm,
Qırışların arasında.
Bu dünyada çox azmışam,
Qarışların arasında ...
Zaman ümman, ömür gəmi,
Qurumayır gözün nəmi,
Çox axtardım öz ilməmi,
Naxışların arasında .
Ömür boyu düz gəzmişəm,
Deyilməmiş söz gəzmişəm,
Bir alagöz göz gəzmişəm,
Baxışların arasında .
Bir qocalmış aslanmışam,
Dəmirtəki paslanmışam,
Ömür keçib islanmışam,
Yağışların arasında .
Yaxşı-yaman ömür sürdüm ,
Şeriyyatdan daxma hördüm ,
Öz imzamı bəlkə gördüm ,
Alqışların arasında .
Ola bilməz
Yığıb qalaq-qalaq, çatsanda ocaq,
Ələfdən, samandan köz ola bilməz.
Bürüsən qumaşa, zərə-zibaya,
Ağbirçək qarıdan,qız ola bilməz.
Sevicdən gül aça,ömür bağçası,
Çəkə bu tablonu rəssam fırçası,
Hər odun qırığı, ağac parçası,
Toxmaq ola bilər, saz ola bilməz.
Rəftarın olmasın zalım fələklə,
Dağıdar dünyanı tufan, küləklə,
Vədəsiz, açılan bircə çiçəklə,
Bahar ola bilməz, yaz ola bilməz.
Nə xeyir görmüşük qazı, darğadan,
Səməni cücərməz bişmiş qorğadan,
Üç yüz il yaşayan ala qarğadan,
Sona ola bilməz, qaz ola bilməz.
Yaşı ötsə ömür keçsə yarıdan,
Bir kömək gözləmə qadir Tarıdan,
Naz istəmə yaşı ötmüş qarıdan,
İşvə ola bilməz, naz ola bilməz.
Səndən küsüb getsə, Allah qonağı,
Olarsan obanın, elin qınağı,
A Cümşüd, yazılan hər söz yığnağı,
Şeir ola bilməz, söz ola bilməz.
Qeyrət olsa...
Ağac yerdən götürməsə qidanı,
Meyvələri sulanarmı? Sulanmaz!
Çörü-çöpü qalaq-qalaq yığsalar,
Odsuz ocaq qalanarmı?Qalanmaz!
Yoldaş olsan bir ağıldan kəm ilə,
Günün keçsə ah-vay ilə ,qəm ilə,
Kipriklərin islaq olsa nəm ilə,
Ömrə-ömür calanarmı?Calanmaz!
Qasırğalar yel atını çaparsa,
Dağı-daşı süpürləyib aparsa,
Yer kürəsin məhvərindən qoparsa,
Öz oxunda dolanarmı?Dolanmaz!
Əsil kökdən nübar olsa, bar olsa,
Allah bizə kömək dursa, yar olsa,
Qanımızda qeyrət olsa,ar olsa,
Elim-obam talanarmı?Talanmaz!
8-07-2022, 18:34
Briliyant Qurbanova (Atəş)
Silməsin.
Mən vermərəm sevincimi əlimdən,
Ayaq açıb qəm üstümə gəlməsin.
Əskik etməm "var" sözünü dilimdən,
Heç kim məni sayıl, səfil bilməsin.
*
Çörəyimin ətri vurur hər yanı,
Oxuduqca saflaşırsan "Quran" ı,
İstəyirəm yolun azan insanı,
Haqqa gəlsin, şeytan bizə gülməsin.
*
Mən Atəşəm, sözüm düzdü qılınc tək,
Saflığından, düzlüyündən bağ sal, ək,
Bilirəm ki, düz danışan qalır tək,
Allah məni nəzərindən silməyin.
Alıbdı.
Öz dərdimi özüm çəkə bilmirəm,
Kotan qoşub, dərdım əkə bilmirəm,
Kim uçurdu, təzdən tikə bilmirəm,
İsti yuvam yaman soyuq olubdu.
*
Günəş vaxtsız dağ dalında batar, heç?
Əl olmasa yay oxuna çatar, heç?
Ürək canı, can ürəyi atar, heç?
Bəxtsiz könlüm göz yaşımla dolubdu.
*
Gecə-gündüz gözlərimə duz tökmüş,
Taleyimdi, bostanıma dərd əkmiş,
Həsrətimdi, könlüm çarmıxa çəkmiş,
Qübar məndən ürəyimi alıbdı.
Alsan.
Axtarıram səni kiprik-qaşımda,
Sənsə gəzdin gözlərimin yaşında,
İzin qaldı ürəyimin başında,
Əl uzatdım, gördüm qəmli xəyalsan.
*
Nəfəsində xumar-xumar yatmadım,
Tellərinin arasında batmadım,
Saf eşqinin sorağına çatmadım,
Dilim üstə nə zəhərsən, nə balsan.
*
Yoxluğundan artıq giley etmirəm,
Kölgöyünün arxasınca getmirəm,
Vüsalının həsrətiylə yatmıram,
Mənə bəsdi, xəyalınla can alsan.
Olub mənə.
Hərdən qəlb ortağım, hərdən sirr yerim,
Taleyim, qismətim yar olub mənə.
Təntiyib, darıxıb,dara düşəndə,
Daş da lələ dönüb, var olub mənə.
*
Sıldırım qayanın köksündə gəzdim,
Cıxartdım gözünü, bağrını əzdim,
Taptanmış yollardan, cığır dan bezdim,
Ormanlar, oylaqlar dar olub mənə.
*
Alçaqla oturmaq, nadanla durmaq,
Qanmazın sözünə şapalaq vurmaq,
Arxada tor qurub, üzdə hal sormaq,
Əzəl gündən, Atəş, ar olub mənə.
Ha yara, yara
Ətri-bənövşəni, sarı nərgizi,
Dərib peşkəş eylə, ha yara, yara.
Ağzı bayatılı qarı Nərgizi,
Uca tut, işinə ha yara, yara.
*
İgidlik örnəkdir ata-babadan,
Öyrən, xəzinədir, yaşlı babadan,
Zülməti boğmuşuq, doğur baba, dan,
Gəlir üzümüzə ha yara-yara.
*
İşləsə qaralmaz, əldə, sağ almaz,
Canına dərmanı, Vallah, sağ, almaz,
Atəş, qövr eləyər, qəlbdə, sağalmaz,
Söz ilə vurulan ha yara, yara.
Görək.
Dünyanın ləzzəti yaşamaqdadır,
Onun hər yükünü daşımaqdadır.
İnsanın tərzidir heyvandan fərqli.
Özünə gümanlı, özünə ərkli.
Çox mürəkkəb olur insan xisləti,
Dürr kimi sözlərdi onun zinəti.
Ləldi, cəvahirdi dənizdə yatır,
Üstünü qum ortür, yoxluğa batır.
Könül də bənzəyir həmin dəryaya,
O, dərya olsa da möhtacdır çaya.
Ürək bir dünyadır, dünyaya sığmaz,
Onu gözsüz kimsə oxuya bilməz.
Dəryanın qapısı açıqdır, əlbət,
Ürəyin qapısı gözlərdir, xəlvət.
Ürəkdən bir yol da beyinə gedir,
Birləşib görün ki, nələr həll edir.
Biri bu dünyanı əldə oynadır,
O biri gah sevinc, kədər qaynaqdır.
Hər bir əzamız da quldur onlara,
Dünya ağ bürünür, gah da kı qara.
Əlində hər hökmü, ixtiyarı var,
İstəsə odlayar, istəsə yuyar.
Bir balaca başla, bir xırda ürək,
Atəş, neyləyəcək axırda görək.
Saxla ürəyində, məni unutma.
Dumandı, çisgindi mənim bələyim,
Gözümün didəsi olub ələyim,
Məndən üz döndərmə, mənim mələyim,
Saxla ürəyində, məni unutma.
...
İstərəm kipriynin qırovu olum,
Könlünün Qoşqarı, Murovu olum,
Mən sənin eşqinin girovu olum,
Saxla ürəyində, məni unutma.
...
Bir sevgi qoynundan doğuldum, çıxdım,
Məhəbbət selitək qəlbinə axdım,
Mərhəmət gözlədim, ümidlə baxdım,
Saxla ürəyində, məni unutma.
...
Atəşin güzarı düşüb bagçana,
Sevgidən tutduğun güllü boğçana,
Qoyub, boyumu söy könül taxçana,
Saxla ürəyində, məni unutma.
A dünya.
Çeynəmişəm sən dünyanın qəmini,
Yalamışam sevincini dəmini,
Mən udmuşam ağrısının cəmini,
Heç qorxmuram İndi səndən, a dünya.
*
Bax, almışam əlindən yerin, göyün,
Mənim olub, mənimdi dörd ünsürün,
Vaxt gələcək, açılacaq hər sirrin,
Baxacaqsan onda gendən, a dünya.
*
Brilyantı sən heç nəynən qorxutma,
Qılıqlayıb gəl başını oyutma,
Zamanını uzatmaq ün yoyutma,
Qorxacaqsan sən də məndən, a dünya.
Dəydin.
Elə qəribsədim sənsiz bu axşam,
Ürəyinə damıb nola gələydin.
Gözlərimə qonmuş qüssə-kədəri,
O xoş gəlişinlə bircə, siləydin.
*
Tavanda çil-çıraq, telim də daraq,
Dünən ot biçdiyin o aylı oraq,
Sənə ünvanlanmış həsrətli soraq,
Necə darıxıblar sənsiz, biləydin.
*
Güllər də boynunu əyib yollara,
Bülbül lal dayanır baxıb onlara,
Naməmi yazmışam axar sulara,
Suyun da səmtini özünə əydin.
*
Sənsizik, qol-boyun sarılmışıq biz,
Sənsizlik içində darılmışıq biz,
Atəş, buna möhtac qalırmışıq biz?
Ötəri meh təki üzümə dəydin.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!