Azərbaycanlı millət vəkili: Xudabəndə kəndlərinin 50 faizində içməli su şəbəkəsi yoxdur
“Xudabəndə kəndlərinin 50 faizində içməli su şəbəkəsi yoxdur, bu kəndlər içməli su ilə təmin olunmalıdır.”
Bu sözləri Zəncan Vilayətinin Xudabəndə şəhərinin İran parlamentindəki millət vəkili “Mehr” xəbər agentliyinin müxbiri ilə danışıqda bildirib.
“Xudabəndə kəndlərinin yarısında içməli su şəbəkəsi yoxdur. Səlahiyyətli orqanlar bu problemi aradan qaldırmaq üçün lazımi tədbirləri almalıdır. Xudabəndə kənlərinin 52 faizi təbii qaz və 50 faizi içməli su şəbəkəsindən məhrumdur. Bu məntəqənin yolları da pis vəziyyətdədir”- deyə Əhməd Beyqdeli bildirib.
Millət vəkili Xudabəndə məntəqəsindəki məktəblərin bərbad vəziyyətdə olduğunu və səhiyyə müəssisələri ilə bağlı yaşanan problemləri də diqqətə çatdırıb. “Xudabəndə şəhərində məktəblərin 43 faizi sökülüb yenidən tikilməlidir. Bu vəziyyət, şəhərin Təhsil Şöbəsi üçün heç də yaxşı hal deyil, ona görə ki, təhsilin inkişafı üçün lazımi imkanların mövcud olması vacib məsələdir. Xudabəndə şəhərində əsas problemlərdən biri də səhiyyə xidmətləri ilə bağlıdır. Şəhərdə mövcud olan yeganə xəstəxana əhalinin ehtiyaclarına cavab verə bilmir. Hesab edirəm ki, Tibbi Mərkəzlər inkişaf etdirilməlidir. Bu şəhərin xəstəxanasında tibbi avadanlıqlar çox aşağı səviyyədədir və xəstəxanada yataqların sayının az olması əsas problemlərdən biridir”- deyə o vurğulayıb