“Doktoranturanı bitirən gənclərin əksəriyyəti ali məktəblərdə qalıb işləməyə üstünlük vermir. Təsəsüf ki, ali təhsil müəssisələri də bununla bağlı lazımı tədbir görmürlər”.

Butov.az AzVision.az-a istinadən xəbər verir ki, bunu təhsil nazirinin müavini Ceyhun Bayramov Doktorantların və gənc tədqiqatçıların XX Respublika elmi konfransında deyib. O, bildirib ki, Dövlət Statistika Komitəsinin məlumatına əsasən ölkədə fəlsəfə doktoru və elmlər doktoru proqramları üzrə 5320 nəfər təhsil alır.

Son illər doktorantura şəbəkəsi xeyli genişlənib. Nazir müavini qeyd edib ki, hazırda 116 elmi təşkilatlarda, ali təhsil müəssisələrində doktoranturalar fəaliyyət göstərir, onlardan 56%-i ali məktəblərdə işini davam etdirir.

“Lakin doktoranturanı bitirənlər vaxtında müdafiə etmirlər. Belə ki, son illər Təhsil Nazirliyi sisteminə daxil olan ali təhsil müəssisələrində fəlsəfə doktorantura proqramı üzrə 577 nəfərdən yalnız 125 nəfəri universitetlərdə işlə təmin olunub. Buna baxmayaraq, ölkənin elmi kadr potensialı orta yaş həddi ildən ilə artır. Başqa sözlə, bu sahədə qocalma prosesi gedir. Belə ki, Təhsil Nazirliyi sistemində çalışan doktorlarımızın yaş həddi göstərir ki, dövlət ali təhsil müəssisələrində 30 yaşa qədər elmlər doktoru yoxdur. 61 yaşdan yuxarı olanların sayı isə 68,7%- təşkil edir. Fəlsəfə doktorlarının göstəricilərinə gəldikdə isə onların yaş nisbəti 30%-ə qədərdir. Bu sahədə ali təhsil müəssisələrində çalışan elmi-pedaqoji kadrların orta yaş göstəricilərinin yüksək olması gənc elmi kadrların hazırlanmasını qarşıda duran əsas vəzifələrdən biri kimi aktuallaşdırır”?-deyə Ceyhun Bayramov bildirib.