“ATƏT ərazisində Azərbaycan, Gürcüstan və Moldovanın ərazi bütövlüyü pozulub və bununla da Helsinki Yekun Aktının bütün prinsipləri pozulub”. Bunu  Azərbaycanın ATƏT PA-dakı nümayəndə heyətinin üzvü, təşkilatın Siyasi məsələlər və təhlükəsizlik komitəsinin iclasında komitənin sədr müavini Azay Quliyev deyib. O, bildirib ki, burada Helsinki prinsiplərinin pozulması müzakirə gedir və onun gələcəkdə pozulmaması ilə bağlı çağırışlar edilir. Təəssüf ki, ATƏT regionunda ərazi bütövlüyünün pozulması halları mövcuddur və belə hallar ciddi narahatçılıq doğurur:

"Gələn il Helsinki Yekun Aktının qəbul olunmasının 40 illik yubileyi qeyd olunacaq. Biz bu yubileyə hansı uğurlarla və müsbət nəticələrlə gedirik? Bu 40 il müddətində Helsinki Yekun Aktı bizə nə verdi? Təəssüflər olsun ki, bu barədə müsbət heç nə deyə bilməyəcəyik. Bu gün artıq konkret addımlar atmaq üçün vaxt yetişib. Gəlin bunu edək. Bu məqsədlə biz Helsinki Yekun Aktının 40 illiyi ilə əlaqədar Azərbaycan, Gürcüstan və Moldovanın ərazi bütövlüyünün pozulması ilə bağlı tutarlı bir hesabat hazırlayaq və bura təcrübəli, peşəkar insanları cəlb edək". A.Quliyev deyib ki, əgər belə bir sənədi hazırlanmış olsa, Helsinki Yekun Aktının 40 illik yubleyinə əli dolu getmək və bu işə bir töhfə vermək olar.