25-03-2025, 20:19
Ramazanın 26-cı günü - İmsak və iftar vaxtları
Sabah - martın 26-da Ramazan ayının 26-cı günüdür.
Sabah imsak vaxtı saat 05:07, iftar isə 19:13-dədir.
İmsak duası:
“Allahumməc-əl sə-yi fihi məşkura. Və zənbi fihi məğfura. Və əməli fihi məqbula. Və eybi fihi məstura. Ya əsməəs-samiin”.
Tərcüməsi:
“İlahi, bu gün mənim səylərimi qiymətləndir, günahlarımı bağışla, əməlimi qəbul et, eyblərimi ört! Ey bəndələrini hamıdan yaxşı eşidən Allah!"”
İftar duası:
“Allahummə ləkə sumtu və əla rizqikə əftərtu və əleykə təvəkkəltu. Bismillahir-Rəhmanir-Rəhim. Ya vasiəl-məğfirəti iğfirli!”
Tərcüməsi:
“İlahi, səndən ötrü oruc tutdum, sənin verdiyin ruzi ilə iftar açdım və sənə təvəkkül etdim. Bağışlayan və mehriban Allahın adı ilə. Ey hüdudsuz bağışlama sahibi, mənim günahlarımı bağışla!”
Allah orucunuzu qəbul etsin!
25-03-2025, 20:13
Ukraynada 30 günlük atəşkəs - Razılaşmanın DETALLARI
Kreml Ər-Riyadda ABŞ-Rusiya məsləhətləşmələrindən sonra bəyanat yayıb.
Bəyanat Kremlin saytında yerləşdirilib.
Rusiya və ABŞ prezidentləri arasında əldə olunmuş razılaşmaya əsasən, Rusiya və Amerika tərəfləri Qara dənizdə naviqasiya təhlükəsizliyinin təmin edilməsi, güc tətbiq edilməməsi və kommersiya gəmilərinin hərbi məqsədlər üçün istifadəsinin qarşısının alınmasını əhatə edən “Qara Dəniz Təşəbbüsü”nün həyata keçirilməsini təmin etmək barədə razılığa gəliblər.
ABŞ Rusiyanın kənd təsərrüfatı və gübrə ixracı üçün dünya bazarına çıxışın bərpasına və dəniz sığortası xərclərinin azaldılmasına, habelə bu cür əməliyyatların aparılması üçün limanlara və ödəniş sistemlərinə çıxışın genişləndirilməsinə kömək edəcək.
Rusiya və ABŞ iki ölkə prezidentləri arasında 18 mart 2025-ci il tarixindən etibarən 30 gün müddətinə Rusiya və Ukraynada enerji obyektlərinə zərbələrin endirilməsinə qadağa qoyulmasına dair sazişlərin icrası üçün tədbirlər hazırlamaq barədə razılığa gəliblər.
Rusiya və ABŞ güclü və davamlı sülhə nail olmaq üçün fəaliyyətini davam etdirəcək.
25-03-2025, 19:50
ABŞ Rusiya və Ukrayna ilə razılığa gəldi
ABŞ Qara dənizdə gəmiçilik təhlükəsizliyini təmin etmək üçün Rusiya və Ukrayna ilə razılığa gəlib.
Bu barədə Rusiya və ABŞ arasında Ər-Riyadda keçirilən danışıqların yekunları üzrə Ağ Evin saytında dərc olunan bəyanatda deyilir.
Vaşinqton bəyan edib ki, ABŞ Rusiyanın ərzaq və gübrə ixracı üçün limanlara və ödəniş sistemlərinə geniş çıxışını asanlaşdırmaq niyyətindədir.
“ABŞ və Rusiya Qara dənizdə təhlükəsiz naviqasiyanı təmin etmək, güc tətbiqini istisna etmək və kommersiya gəmilərindən hərbi məqsədlər üçün istifadənin qarşısını almaq barədə razılığa gəliblər”, - deyə rəsmi açıqlamada bildirilir.
Bundan əvvəl Rusiyanın xarici işlər naziri Sergey Lavrov bazar ertəsi Ər-Riyadda Rusiya və ABŞ arasında keçirilən danışıqların ilk növbədə Qara dənizdə gəmiçilik təhlükəsizliyi məsələlərinə həsr olunduğunu təsdiqləyib Onun sözlərinə görə, Rusiya Qara dəniz təşəbbüsünün bərpasının tərəfdarıdır, lakin razılaşma hamı üçün daha məqbul formada olmalıdır.
25-03-2025, 19:34
AK Partiya rəsmisi həlak oldu
Türkiyənin hakim Ədalət və İnkişaf Partiyasının (AK Partiya) rəsmisi faciəvi şəkildə həyatını itirib.
AK Partiyanın Gerede bölgə təşkilatının rəhbəri Mehmet Çongar yol qəzasında ölüb
Onun avtomobili yük maşınının arxasına çırpılıb.
Çongar bu gün dəfn edilib.
25-03-2025, 19:05
Balıqçının meyiti sabah Azərbaycana veriləcək
Lənkəranda itkin düşən balıqçı, rayonun Siyavar kənd sakini Mahmud İbayevin meyitinin İranda balıqçılar tərəfindən aşkar olunması və sosial şəbəkələrdə fotosunun paylaşılması barədə məlumat vermişdik.
Mərhumun qardaşı meyiti ölkəyə gətirmək üçün artıq İran tərəfdədir.
Mahmud İbayevin qardaşı Rəşad İbayev həmin şəkildən qardaşının cəsədini tanıyıb.
Aidiyyəti qurumların dəstəyi ilə Rəşad İbayev İran tərəfdədir və qardaşının meyitini tapan şəxs Səid Hadiani ilə görüşüb. Səid Hadiani bildirib ki, meyiti Bəndər-Ənzəli şəhərində, Kəpurçay sahilində tapıb:
“Meyit suyun 25 metr dərinliyində idi. Başı aşağı suda qalmışdı. Üzü qaralmışdı, amma bədəni sağ-salamat idi. Qayığa qoyub çölə gətirdik və polisə məlumat verdik. Onu da deyim ki, bu ərazilər həmişə qayıqlarla nəzarət altındadır”.
Qeyd edək ki, sabah meyitin Azərbaycan tərəfə verilməsi nəzərdə tutulub.
25-03-2025, 18:46
Ermənistan sülh istəyirsə... - Bakı şərtləri bir daha təkrarladı
“25 mart 2025-ci il tarixində Ermənistanın xarici işlər naziri Ararat Mirzoyanın İran İslam Respublikasının xarici işlər naziri Seyid Abbas Ərağçi ilə birgə mətbuat konfransında guya Azərbaycanın sülh müqaviləsinin mətni üzrə razılaşma əldə edildikdən sonra yeni şərtlər irəli sürdüyü barədə iddiaları tamamilə əsassızdır”.
Bunu Azərbaycan Xarici İşlər Nazirliyinin mətbuat katibi Ayxan Hacızadə bildirib.
Onun sözlərinə görə, Ermənistan xarici işlər nazirinə yaxşı məlumdur ki, Ermənistan konstitusiyasında Azərbaycanın ərazi bütövlüyü və suverenliyinə qarşı müddəanın aradan qaldırılması, habelə Minsk Qrupunun rəsmən ləğvi tələbi son iki il yarım ərzində danışıqlar prosesinin vacib mövzuları sırasında olub.
“Ermənistanın Azərbaycana qarşı ərazi iddialarının əks olunduğu Konstitusiya, Ermənistan milli qanunvericiliyi, məhkəmə iddiaları və siyasi bəyanatlar barədə faktlar hələ 2023-cü ilin may ayında Vaşinqton görüşü zamanı Ermənistan tərəfinə təqdim olunub. Bu barədə üçüncü ölkələr də tam olaraq məlumatlıdırlar.
Qeyd edilənləri nəzərə alaraq, Ermənistan tərəfinin guya Azərbaycanın bu şərtləri yeni irəli sürdüyü barədə iddiaları beynəlxalq ictimaiyyəti çaşdırmaq məqsədi daşıyır və bu taktika heç bir nəticə verməyəcək. Ermənistan tərəfi sülh müqaviləsinin imzalanmasında maraqlıdırsa, vaxt itirmədən Konstitusiyasında dəyişiklik edərək Azərbaycana qarşı ərazi iddialarından əl çəkməli, Minsk Qrupunun rəsmən ləğvi istiqamətində əməkdaşlıqdan boyun qaçırmamalıdır”.
25-03-2025, 18:31
Ukraynaya qoşun göndəriləcək - Müzakirələr başlayır
Qərb hərbi rəsmiləri bu həftə Ukraynaya sülhməramlı missiya göndərilməsi üçün ətraflı planlar hazırlamağa başlayacaqlar.
Bu barədə kanadalı general Stiv Boyvinə istinadən "CBC News" kanalı məlumat yayıb.
Kanadanın xarici və daxili əməliyyatlara cavabdeh olan yüksək səviyyəli generalının dediyinə görə, Qərb hərbi komandirlərinin bu həftə Ukraynada "istəkli dövlətlər koalisiyası" sülhməramlı missiyası üçün ətraflı planlaşdırmaya başlayacağı gözlənilir
Telekanalın həmsöhbəti onu da bildirib ki, Kanada sülhməramlı missiyanın formalaşmasına töhfə verməyə hazırdır. Onun sözlərinə görə, Ukrayna hərbçilərinə təlim keçən Kanada qoşunları yenidən sülhməramlı fəaliyyətə istiqamətləndirilə bilər.
Qeyd edək ki, son həftələr Avropada Ukraynaya sülhməramlıların göndərilməsi ilə bağlı fəal müzakirələr gedir. Martın əvvəlində Avropa dövlətlərinin Londonda keçirilən sammitindən sonra Böyük Britaniyanın baş naziri Keir Starmer sülhməramlı kontingentin formalaşdırılmasında iştirak etmək üçün koalisiya yaradıldığını elan edib. Britaniya baş nazirinin sözlərinə görə, koalisiya sammiti martın 27-nə planlaşdırılıb.
25-03-2025, 18:26
Türkiyədəki aksiyalarda 1400 nəfər saxlanılıb
Türkiyədə martın 19-dan 25-dək keçirilən etiraz aksiyalarında 1400-dən çox şəxs saxlanılıb.
Bu barədə ölkənin daxili işlər naziri Ali Yerlikaya “X”də yazıb.
Qeyd olunub ki, indiyədək saxlanılan 979 şübhəli şəxsin 478-i məhkəmə qarşısına çıxarılacaq.
O bildirib ki, küçələrdə terrorun törədilməsinə, milli-mənəvi dəyərlərə zərbə vurulmasına, polislərə hücum edilməsinə imkan verilməyəcək.
25-03-2025, 17:53
Vətəndaşın bank kartından 27283 manat oğurlandı
Daha bir vətəndaşın bank kartından kiber üsulla 27283 AZN oğurlanıb. Necə oğurlanıb? +94….. (+994… AZE oxşarlığı) kodlu xarici nömrədən zəng edilib ki, sizə sığorta ödənişi var, onlayn formatı təsdiqləməlisiniz.
Bu barədə Daxili İşlər Nazirliyinin Mətbuat Xidmətinin rəisi polis polkovnik-leytenantı Elşad Hacıyev bildirib.
O qeyd edib ki, seçilən qurbanın onlayn görüntüləri çəkilməklə adına bankdan 21000 manat kredit çəkilib.
"Əlavə vəsait isə kartında olub. Naməlum şəxs Hacıqabulda olan qurbana nə deyibsə, o bunu yerinə yetirib, bütün sorğuları və kodları təsdiqləyib…
Bir daha vətəndaşları naməlum zənglərdən, cəlbedici qazanc, sığorta, bank hesablarının möhkəmləndirilməsi, mədaxil üzrə ödənişlərlə əlaqəli təkliflərə diqqətlə yanaşmağı tövsiyə edirik. Naməlum zənglərlə, mesajlarla danışıq aparılmamalıdır, dərhal bloklanmalıdır.Əks halda aldadıb şəxsi məlumatlarınızı əldə etdikdən sonra pullarınızı talayacaqlar, adınıza kredit götürüləcəklər.
Təhlükə var, sən də tələyə düşə bilərsən…Diqqətli ol…", - E.Hacıyev vurğulayıb.
25-03-2025, 17:43
Sabahdan bu məktəblərdə dərslər başlayır
Sabah ölkənin bəzi orta məktəblərində bayram tətilindən sonra ilk dərs günü olacaq.
Nazirlər Kabinetinin müvafiq qərarına əsasən, altıgünlük tədris həftəsi ilə işləyən ümumi təhsil müəssisələrində 26, 27 və 29 mart tarixləri iş günləridir.
Beşgünlük tədris həftəsi ilə işləyən ümumi təhsil müəssisələrində isə bayramdan sonra ilk dərs günü 1 aprel tarixinə təsadüf edəcək.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!