Butov.az xəbər verir ki, Ağdam rayonunun Quzanlı qəsəbəsində Azərbaycan Respublikası Qaçqın və Məcburi Köçkünlərin İşləri üzrə Dövlət Komitəsinin dəstəyilə Almaniya Federal İqtisadi Əməkdaşlıq və İnkişaf Nazirliyinin (BMZ) maliyələşdirdiyi və Almaniya Beynəlxalq Əməkdaşlıq Cəmiyyətinin (GIZ) GmbH və Məcburi Köçkünlərin Sosial İnkişaf Fondu (MKSİF) ilə birlikdə həyata keçirdiyi "Cənubi Qafqazda aztəminatlı məcburi köçkün və yerli əhalinin iqtisadi və sosial inkişafı” regional layihəsi həyata keçirilir.
Layihədə Azərbaycanda məskunlaşmış məcburi köçkünlərin məşğulluq və yeni bizneslərin qurulması, həmçinin mövcud bizneslərin genişlənməsi və məcburi köçkün qəsəbələrində xüsusilə qadınların və gənclərin sosial inkişafının dəstəkləməsi nəzərdə tutulur. Pilot mərhələ kimi Ağdam, Bərdə regionları və Mingəçevir şəhərində məskunlaşmış aztəminatlı məcburi köçkünlərin və onlarla birgə yaşayan yerli əhalinin həyat şəraitlərini yaxşılaşdırmaq və bölgənin iqtisadiyyatına töhfə verməsi məqsədilə ümumi inkişafı, onların texniki-peşə və peşəkar bilik və bacarıqlara yiyələnməsi nəzərdə tutulur. Bunun üçün 6 ay davam edəcək praktik təlimlər və mentorluq yanaşmasından istifadə olunacaq.

Layihə çərçivəsində 25 May tarixində Heydər Əliyev Mərkəzində Almaniya Beynəlxalq Əməkdaşlıq Cəmiyyətinin (GIZ) əməkdaşları İlkin Əliyev və Məhbubə Musayevanın təşəbbüsü ilə xalq yazıçısı, nasir, publisist, Azərbaycan Yazıçılar Birliyinin katibi, hüquq elmləri doktoru Çingiz Abdullayevlə görüş həyata keçirilib. Görüşdə Ağdam rayon İcra Hakimiyyətinin başçısı Vaqif Həsənov, Ağdam, Mingəçevir və Bərdə rayon sakinləri, layihə iştirakçıları, tələbələr və yazıçının daimi oxucuları iştirak ediblər. Xalq yazıçısı yaradıcılığının əsas istiqamətləri barədə danışıb, tədbir iştirakçılarına klassik və müasir yazıçılarımızın əsərlərini, dünya ədəbiyyatını oxumağı tövsiyə edib, onların şəxsiyyət kimi formalaşmasında təhsilin əhəmiyyətinin vacibliyini vurğulayıb. Həm fərd, həm də dövlət olaraq güclü olmanın tək yolunun keyfiyyətli təhsil olduğunu bildirib.

Çingiz Abdullayev oxucuların suallarını ətraflı cavablandırıb, müəllifi olduğu kitabları imzalayaraq onu sevənlərlə xatirə şəkilləri çəkdirib.
Xatırladaq ki, GIZ Almaniya Beynəlxalq Əməkdaşlıq Cəmiyyətinin həyata keçirdiyi layihənin məqsədi Bərdə, Ağdam regionları və Mingəçevir şəhərində məskunlaşmış aztəminatlı məcburi köçkün və aztəminatlı yerli əhalinin məşğulluq və sahibkarlıq imkanlarının artırılmasıdır və bu layihənin 2021`ci ilə qədər davam etdirilməsi nəzərdə tutulub.