11-11-2021, 17:31
Fövqəladə Hallar Nazirliyinin (FHN) “112” qaynar telefon xəttinə Bakı şəhəri, Nəsimi rayonu ərazisində yerləşən “Qış parkı”nda bir nəfərin şaxtaya yıxılması və köməyə ehtiyacı olması barədə məlumat daxil olub.
Butov.az FHN-in saytına istinadən verdiyi xəbərə görə, məlumat əsasında hadisə yerinə operativ olaraq Nazirliyin Xüsusi Riskli Xilasetmə Xidmətinin xilasediciləri cəlb olunub.
Hadisə yerində əməliyyat şəraiti qiymətləndirilərkən müəyyən olunub ki, 1977-ci il təvəllüdlü Nuriyev Sahib Vasif oğlu ehtiyatsızlıqdan “Qış parkı”nın zirzəmisinin havalandırma sisteminin dərinliyi təqribən 10 metr olan şaxtasına yıxılaraq köməksiz vəziyyətdə qalıb.
Xilasedicilər xüsusi xilasetmə alət və avadanlıqlarından istifadə etməklə vətəndaşı şaxtadan çıxararaq xilas ediblər. Vətəndaş təcili tibbi yardım briqadasına təhvil verilib.
11-11-2021, 17:18
Azərbaycan Dillər Universitetində (ADU) Alman Akademik Mübadilə Xidməti (DAAD) ofisinin açılışı olub.
Universitetin İctimaiyyətlə əlaqələr şöbəsindən Axar.az-a verilən məlumata görə, açılış mərasimindən əvvəl ADU-nun rektoru, akademik Kamal Abdulla ilə Almaniyanın Azərbaycandakı fövqəladə və səlahiyyətli səfiri Volfqanq Maniq arasında görüş keçirilib.
Rektor Kamal Abdulla Alman Akademik Mübadilə Xidmətinin rəhbərlik etdiyi ali təhsil ocağında fəaliyyətə başlamasını əlamətdar hadisə kimi qiymətləndirib. Qeyd olunub ki, DAAD ofisinin açılması iki ölkə arasında təhsil sahəsində, tələbə mübadiləsi istiqamətində əməkdaşlığa ciddi töhfə verəcək: “Azərbaycan Dillər Universitetini Almaniya ilə müsbət əlaqələr birləşdirir. Bizim müştərək və faydalı proqramlarımız olub. Gələcəkdə də bu əməkdaşlığı davam etdirməkdə maraqlıyıq”.
Görüşdə Azərbaycandakı multikultural mühit, ölkənin dostluğa və sülhsevər siyasətə əsaslanan beynəlxalq əlaqələri haqqında fikir mübadiləsi aparılıb. Rektor Kamal Abdulla səfiri ADU-da fəaliyyət göstərən “Səfir klubu”nda tələbələrə mühazirə oxumağa dəvət edib.
Volfqanq Maniq ADU-da olmaqdan məmnun olduğunu deyib və DAAD ofisinin universitetdə fəaliyyətə başlaması münasibəti ilə rektora təşəkkürünü bildirib:
“Bu proqram vasitəsi ilə tələbə mübadiləsi xalqlar arasında dostluq bağlarını möhkəmləndirmək üçün fəaliyyət göstərir. Proqramın əsas məqsədlərindən biri ötən əsrdən etibarən dünya üzrə olan digər universitetlər və Almaniya universitetləri arasında əməkdaşlığı yaratmaqdır. Elmə mübadilə lazımdır və bu mübadiləni təşkil edənlərdən biri də DAAD-dır. Almaniyanın Azərbaycana elm sahəsində böyük marağı var. Pandemiya ilə bağlı məhdudiyyətlər aradan qalxandan sonra iki ölkənin universitetləri arasında müxtəlif istiqamətli əlaqələr bərpa olunacaq”.
Akademik Kamal Abdulla səfirə Almaniyada çap olunan “Unutmağa kimsə yox” romanını hədiyyə edib.
Sonra DAAD Bürosunun açılışı və kitabxanasına baxış keçirilib. Metodist Mara-Lisa Gezer DAAD-ın dünya üzrə gördüyü ümumi iş haqqında və 2018-2021-ci illər ərzində Azərbaycanda, eyni zamanda Azərbaycan Dillər Universitetində işinə dair təqdimatla çıxış edib. Mara-Lisa Gezer deyib ki, o, ADU-da 2018-ci ilin sentyabrından fəaliyyət göstərir və Azərbaycanda məktəb və universitet müəllimləri üçün alman dili (DaF) sahəsində çoxsaylı təlim kursları keçirib.
2021-ci ilin sentyabr ayında “DAAD Go East” yay məktəbi 13 alman tələbəyə DAAD təqaüdü ilə iki həftəlik Azərbaycana gəlmək, ölkənin mədəniyyəti və dili tanış olmaq imkanı verib.
Butov.az
11-11-2021, 16:32
Azərbaycan Respublikasının Prezidenti İlham Əliyev noyabrın 11-də BP qrupunun baş icraçı direktoru Bernard Lunini qəbul edib.
AZƏRTAC xəbər verir ki, BP qrupunun baş icraçı direktoru Bernard Luni son görüşdən keçən dövr ərzində Azərbaycanın əldə etdiyi uğurlar münasibətilə dövlətimizin başçısının təbrik etdi. Təbriklərə görə minnətdarlığını bildirən Prezident İlham Əliyev Cənub Qaz Dəhlizi ilə bağlı əldə edilmiş birgə uğurlar münasibətilə Bernard Lunini təbrik etdi və bu layihənin Azərbaycanla BP şirkətinin birgə səyləri nəticəsində əldə oldunduğunu bir daha vurğuladı.
Bildirildi ki, BP şirkəti Azərbaycanla, o cümlədən SOCAR şirkəti ilə dünyada ən güclü tərəfdaşlıq əlaqələrinə malikdir. Öz növbəsində Azərbaycanın da ən möhkəm tərəfdaşlığı BP şirkəti ilədir. Qeyd edildi ki, ölkəmizin bu şirkətlə qarşılıqlı inama əsaslanan əməkdaşlığının zəngin tarixi və parlaq gələcəyi var.
Söhbət zamanı BP şirkətinin bərpa olunan enerjiyə göstərdiyi marağın Azərbaycanın enerji strategiyasına uyğun gəldiyi qeyd edildi, bu sahədə BP ilə əməkdaşlığın genişlənməsi məsələlərinin nəzərdən keçirildiyi bildirildi. BP şirkətinin işğaldan azad edilmiş ərazilərdə bərpa olunan enerji ilə bağlı planlarının əhəmiyyətinə toxunularaq bunun həmin ərazilərdə ölkəmizin bəyan etdiyi kimi, yaşıl enerji ərazisinə transformasiya etmək işinə xidmət edəcəyinə ümidvarlıq ifadə olundu. Qeyd edildi ki, bu işlər böyük potensiala malikdir, xüsusilə nəzərə alınsa ki, Azərbaycan qonşu ölkələrlə şaxələndirilmiş enerji bağlantılarına malikdir və ölkəmizdə tələbatdan artıq enerji istehsal olunur.
Bernard Luni xalqımızın ümummilli lideri Heydər Əliyevin Azərbaycanın faydası naminə korbohidrogen ehtiyatlarının inkişafı ilə bağlı təşəbbüslərini xatırladaraq, hazırda Prezident İlham Əliyevin enerji keçidi məsələsi ilə bağlı baxışlarına görə təbriklərini çatdırdı.
BP qrupunun baş icraçı direktoru Bernard Luni Azərbaycanın ətraf mühitin mühafizəsi sahəsində səylərini yüksək qiymətləndirərək ölkəmizin bu istiqamətdə dünyanın aparıcı dövlətləri sırasında olduğunu dedi və bildirdi ki, Azərbaycanda ətraf mühitin standart və qaydalarının qorunması bir çox inkişaf etmiş ölkələrdən daha güclüdür. Öz növbəsində, Prezident İlham Əliyev Azərbaycanda ətraf mühitin mühafizəsi istiqamətində həyata keçirilən genişmiqyaslı tədbirlərdən danışdı.
Söhbət zamanı əməkdaşlığın perspektivləri ilə bağlı məsələlər müzakirə edildi.
Butov.az
11-11-2021, 12:19
Heç yadımdan çıxmır, 2016-cı ilin Aprel döyüşlərindən bir neçə ay sonra bir şəhid zabitimiz haqqında məqalə hazırlamaq üçün onun ailə üzvləri ilə görüşə getmişdim. Şəhid kapitanın ibtidai sinif müəllimi olan ömür-gün yoldaşı xatirələrini bölüşəndə maraqlı bir epizod danışdı. Deməli, həmin zabit mühüm döyüş tapşırığını yerinə yetirmək üçün bir axşam növbəti səfərə hazırlaşanda “Xəzər” tv-də “Xəbərlər” proqramı gedirmiş. Həmin vaxt Bakı-Qazax yolunun Yevlax şəhərinə yaxın yerində baş vermiş ağır yol qəzası göstərilir. Bir ailənin faciəli ölümündən xəbər tutan zabit dərindən ah çəkib yoldaşına deyir: “Neçə illərdi ki, bu yollardayam, təsadüfi ölümün qurbanı olmaqdan elə qorxuram ki, kaş Allahım mənə Vətənimiz yolunda şəhidlik nəsib etsin”. Və 4 günlük Aprel savaşında qəhrəmancasına şəhid olan hərbçilərimizdən biri də həmin zabit olur.
Müəllimə bu söhbəti danışandan sonra üzünü azyaşlı övladlarına tutub dedi: “Yoldaşımın ruhu qarşısında söz vermişəm ki, övladlarımızı onun adına layiq dəyərli vətəndaşlar kimi böyüdəcəm”. Ürəyimdə şəhid yoldaşına “Afərin olsun, bacım” deyib düşünərək yazını hazırlamaq üçün redaksiyamıza yola düşdüm...
Əslində Aprel döyüşü zamanında düşmənə dərs olmalıydı, amma erməni faşistləri öz məkrli niyyətlərindən əl çəkmədi və cəbhə xəttində ordumuza qarşı yeni təxribatlar törətməkdə davam etdilər. Belə təxribatlardan biri ötən ilin iyul ayında Tovuz istiqamətində baş verir. Düşmənin hücumunu dəf edərkən bir neçə hərbçimiz, o cümlədən rəşadətli generalımız Polad Həşimov da şəhid olur. Gecənin bir aləmində şəhid generalın nəşi yaşadığı Sumqayıt şəhərinə gətiriləndə bütün paytaxt, ölkə əhalisi ayağa qalxmışdı. Hər kəsin səbri tükənmişdi, qocalı-cavanlı hamı düşmənlə döyüşməyi tələb edirdi.
Nəhayət, 2020-ci ilin 27 sentyabrında 44 günlük Vətən müharibəsi başlandı. Bu savaş şanlı ordumuzun yekdil qələbəsi ilə yekunlaşaraq Azərbaycan xalqının əyiıməz iradəsini nümayiş etdirdi. Noyabrın 8-də böyük, şanlı zəfərimiz müzəffər Ali Baş Komandanımız cənab İlham Əliyev tərəfindən bəyan olunanda sevincimiz yerə-göyə sığmadı. Ordumuzun, xalqımızın və dövlətimizin sarsılmaz birliyi hesabına Azərbaycan işğalçı Ermənistanı məğlub edərək illər boyu işğalda qalan torpaqlarımızı mənfur düşmənin caynağından xilas etdi.
Yaxşı deyirlər ki, qələbəni qurbansız qazanmaq olmur. Bu yolda 3 minə yaxın Vətən övladı şirin canını fəda etdi, minlərlə döyüşçümüz sağlamlığını qurban verib qazi adını qazandı.
Bu günlərdə 22 yaşı böyük bir izdihamla qeyd olunan nur üzlü şəhidimiz Qasımov Elman Yunis oğlunun əziz xatirəsinə bu yazını hazırlamağı özümə borc bildim.
Elman bir zəhmətkeş ailənin – Yunis qardaşımızın və Sevil bacımızın tək oğul övladı idi. Hacıqabul rayonunun Udulu kəndində doğulub boya-başa çatmışdı. 1-ci Qarabağ müharibəsində şəhid olan Sabir Gülmalıyevin adını daşıyan orta məktəbdə oxumuşdu. Yaxşı təlim-tərbiyəsi ilə qohum-qardaşı, müəllimlərinin dərin hörmətini qazanmışdı. Orta təhsilini başa vurandan sonra Gəncə şəhərindəki bir kollecə qəbul olub, orada da tələbə yoldaşlarının sevimlisi idi. Vaxtı-vədəsi yetişəndə yaşıdları kimi Vətənə övlad haqqını ödəmək üçün ordu sıralarına yola düşür və sentyabrın 27-də başlanan Vətən savaşına qatılır. Cəsarətlə döyüşürdü, qəhrəman silahdaşlarından geri qalmırdı. Amma Suqovuşan ətrafında şiddətli döyüş Elmanın timsalında daha bir gəncimizin arzularını yarımçıq qoyur. Elman Qasımov bu döyüşdə şəhadət zirvəsinə ucalır.
İkinci sinifdə oxuyan bir oğlan uşağından bir dəfə soruşanda ki, şəhidlik haqqında nə bilirsən, onda tərəddüd etmədən belə demişdi: “Əmi, şəhidlik Vətən uğrunda can fəda etməkdir!” Elə buna görə də şəhidə sadəcə ölüb demək qəbahətdir, çünki onlar ölmür, cənnətə qovuşaraq daim xatirələrdə yaşayırlar.
Noyabrın 8-i Zəfər Günü idi, hamı böyüklü-kiçikli o şanlı günümüzü bayram edirdi. Həmin gün şəhid Elman Qasımovun doğulduğu kənddə “Xatirə bulağı”nın da açılış mərasimi idi. Ad günündə keçirilən bu tədbirə bütün el-oba toplaşmışdı, kənardan da nə qədər qonaqlar gəlmişdi. Elmanın xatirəsini yaşadacaq bulağın seyrangahına deyərdim ki, minlərlə adam yığışmışdı. Şəhid valideynləri, qazilər, ziyalılar, tələbə yoladaşları, dostları, ağsaqqal-ağbirçək – hamı şəhidimizin cənnətdə keçən ilk mövludunu qeyd edirdi. Bir vaxt ona dərs demiş müəllimləri, döyüşçü yoldaşları Elmanın haqqında ən xoş xatirələrini bölüşürdülər.
lmanın böyük bir lövhədən boylanan nurlu baxışlarını seyr edirəm, belə vətənpərvər, dəyərli gəncimizin itkisi məni də için-için göynədir. Xəyalımdan ayrılıb göz yaşımı siləndə nə qədər adamın kövrəldiyinə şahid oluram. Elmanın yoxluğu tək bir ailəni, bir nəsli yox, bütün eli-obanı ağrıdır. Amma bircə təsəllimiz var ki, Elman da 3 minə yaxın şəhidimiz kimi cənnətdə uyuyur.
Rahat uyu, əziz şəhidim. Aylar, illər ötsə də səninlə bağlı xatirəmiz tükənməyəcək. Ali Baş Komandanımızın sərəncamı ilə layiq görüldüyün “Vətən uğrunda” və “Cəsur döyüşçü” medalların isə sənin qısa, lakin mənalı ömür yolunu əks etdirən gözəl nişanələrdir...
Arif PƏNAHLI
hərbi jurnalist
Butov.az
11-11-2021, 10:41
ABŞ Pekin Qış Olimpiadasına qatılmaq barədə məsələni öz müttəfiqlərilə müzakirə edir.
Bunu Dövlət Katibi Entoni Blinken bəyan edib.
Onun sözlərinə görə, məsələ ilə bağlı yekun qərar hələ qəbul olunmayıb.
Qeyd edək ki, may ayında ABŞ Konqresinin Nümayəndələr Palatasının sədri Nensi Pelosi dünya ictimaiyyətini Çində keçiriləcək Olimpiya Oyunlarını bykot etməyə çağırmışdı.
Xatırladaq ki, XXIV Qış Olimpiya Oyunları 4-20 fevral tarixlərində təşkil olunacaq.
Mənbə: TASS
Butov.az
10-11-2021, 20:14
Nərimanov rayonunda narkotik vasitələrin qanunsuz dövriyyəsinə qarşı son 1 həftə ərzində keçirilən əməliyyatlar zamanı 12 nəfər saxlanılıb.
Daxili İşlər Nazirliyindən Butov.az-a verilən məlumata görə, Nərimanov Rayon Polis İdarəsinin əməkdaşları tərəfindən narkotik vasitələrin qanunsuz dövriyyəsinə qarşı rayon ərazisində əməliyyat tədbirləri həyata keçirilib. Son 1 həftə ərzində keçirilən əməliyyatlar zamanı rayonun müxtəlif yerlərində, xüsusən də “Montin”, “Keşlə bazarı” kimi tanınan ərazilərdə qeyd olunan hüquqazidd əməlləri törədən 12 nəfər saxlanılıb.
Əməliyyat zamanı əvvəlcə Bakı şəhər sakini Yusif Əliyev tutulub. Onun üzərindən narkotik vasitə olan heroin aşkar edilib. Araşdırmalar zamanı həmin şəxs narkotik vasitələri Nərimanov rayonu Əliyar Əliyev küçəsində yaşayan Rəşad İsgəndərov və İntiqam Əliyevdən aldığını bildirib. Adları çəkilən həmin şəxslər də qısa zamanda saxlanılaraq Polis İdarəsinə gətiriliblər. Onların üzərində və yaşadıqları evlərdə axtarış aparılan zaman külli miqdarda müxtəlif növ narkotik vasitə və psixotrop maddə, elektron tərəzilər aşkar edilərək götürülüb. İntiqam Əliyev və Rəşad İsgəndərov ifadələrində narkotik vasitələrin satışı ilə məşğul olduqlarını bildiriblər.
Nərimanov Rayon Polis İdarəsinin əməkdaşları tərəfindən həyata keçirilən digər əməliyyatlar zamanı isə narkotik vasitələrin qanunsuz dövriyyəsi ilə məşğul olan daha 9 nəfər – Hikmət Musayev, Zaur Əzizov, Manaf Soltanov, Rəşad Qasımov, Ülvi Rəhimli, Orxan İbrahimov, Ruslan Qədimalıyev, Ruhiyyə Əzizova və Xəyal Seyidov tutulublar. Onların üzərində şəxsi axtarış aparılan və evlərinə baxış zamanı satış və şəxsi istifadə məqsədi üçün əldə etdikləri külli miqdarda heroin, marixuana, metamfetamin və elektron tərəzilər aşkar edilib. Bu şəxslər izahatlarında Nərimanov rayonu ərazisində narkotik vasitələrin qanunusuz dövriyyəsi ilə məşğul olduqlarını etiraf ediblər.
Təqdim edilən faktların hər biri ilə bağlı Nərimanov Rayon Polis İdarəsində araşdırmalara başlanılıb. Nərimanov rayonu ərazisində narkotik vasitələrin qanunsuz dövriyyəsi ilə məşğul olan şəxslərin ifşa edilməsi istiqamətində polis əməkdaşları tərəfindən əməliyyat tədbirləri davam etdirilir.
10-11-2021, 13:48
Azərbaycanla Ermənistan arasında müharibəni başa çatdıran 10 noyabr üçtərəfli bəyanatının (Azərbaycan, Rusiya, Ermənistan) imzalanmasından bir il ötür.
Bu bəyanat Ermənistanın biabırçı kapitulyasiyası idi, üç rayonun (Ağdam, Kəlbəcər, Laçın) döyüşsüz qaytarılması isə Azərbaycanın əlavə itki vermək risklərini aradan götürdü.
Sonrakı proseslər
Bu bəyanat Azərbaycan Ordusunun apardığı uğurlu hərbi əməliyyatların məntiqi davamı idi, bu sənəd postmünaqişə dövründə hərbi gücün yaratdığı diktənin diplomatiyaya keçidinə zəminlər yaradan strategiyanın başlanğıcı idi.
Türkiyə bəyanatın tərəflərindən olmasa da, həmin sənəddə keçən bir cümləni Bakı-Ankara hərbi əməkdaşlığının güclənməsini şərtləndirən amil kimi dəyərləndirə bilərik.
Söhbət həmin bəyanat əsasında Ağdamda yaradılan Atəşkəsə Nəzarət üzrə Rusiya-Türkiyə Birgə Monitorinq Mərkəzindən gedir,
Bununla Türkiyə:
1. Rəsmi qaydada mübahisəli məsələlərin gələcək həlli və atəşkəsə nəzarət etmək işində rol oynayır.
Ankaranın mövqeyində Qarabağ məsələsinin prioritet olmasının indikatorları isə göz önündədir:
- Ankaradan verilən bəyanatlar, Ermənistana sülh çağırışları prioritetlər sırasındadır;
- Türkiyə şirkətlərinin Qarabağda yenidənqurma işlərində iştirakı Ankaranın Qarabağın iqtisadi təhlükəsizliyinə də zamin durduğu anlamını verir;
- Türkiyə Prezidenti Rəcəb Tayyib Ərdoğan postmünaqişə dövründə Şuşaya səfər etdi, burada Prezident İlham Əliyevlə birgə Şuşa Bəyannaməsi imzalandı;
- Bir neçə ay sonra isə Türkiyə lideri Füzuli Beynəlxalq Hava Limanının açılışına qatıldı, həmin gün Zəngilana da səfər etdi.
2. Ankara-Moskva körpüsündə təmaslarda Türkiyə Azərbaycanla strateji müttəfiqlik xarakterinin ruhuna uyğun olaraq Bakının maraqlarını önə çıxarır. Bu isə Bakı-Ankara-Moskva xəttində müştərək maraqların yaranmasına səbəbiyyət verən tendensiyadır.
Üçtərəfli bəyanatın 9-cu bəndinin, bölgədəki bütün iqtisadi və nəqliyyat əlaqələrinin bərpasının icrası üçün əlavə bir sənədin hazırlanması zərurətini ortaya çıxarırdı. Buna görə də, Azərbaycan, Rusiya prezidentləri və Ermənistan baş naziri arasında 2021-ci ilin 11 yanvarında növbəti üçtərəfli bəyanata imza atıldı.
11 yanvar bəyanatı 10 noyabr bəyanatının iqtisadi aspektlərinin tam gücü ilə işləməsinə stimul verən sənəddir.
Ancaq, bu bəyanat da Azərbaycanın əlini gücləndirdi, belə ki, 2021-ci ilin başlanğıcından etibarən həmin sənədin müddəaları Bakıya hərbi-siyasi faydalar gətirən faktora çevrildi.
Bakı İrəvanın etirazlarına baxmayaraq, postmüharibə dövründə regionun yeni şəkilləndirilməsinin təməl daşı hesab olunan Zəngəzur dəhlizinin reallaşmasında tündləşdirici rənglər qarışdırılmaması üçün mühüm addımlar atdı. Söhbət Azərbaycanın Ermənistanla sərhədlərin müəyyənləşməsini hərbi prioritetlər sırasına daxil etməsindən gedir.
Azərbaycan Ordusunun Ermənistanla sərhəddə strateji yüksəkliklərdə mövqelənməsi, Gorus-Qafan yolunun 21 kilometrinin Azərbaycan ərazisindən keçməsi, bu ilin yayında Naxçıvanda böyük əhəmiyyət kəsb edən möhkəmlənmə koridorunun işləməsi üçün Bakının şərtlərinin həyata keçirilməsidir.
Bu koridorun açılması məsələsində Türkiyə ilə yanaşı, Rusiya da maraqlıdır, yəni Zəngəzur dəhlizi Bakı-Ankara-Moskva üçbucağında ortaq iqtisadi maraqlar yaradan platforma rolunu oynayır.
10 noyabr bəyanatına əsasən, Rusiya sülhməramlı qüvvələri Azərbaycanın bir sıra ərazisinə müvəqqəti (5 il müddətinə) yerləşdirildi.
Ancaq bu, heç də o mənaya gəlmir ki, Azərbaycan həmin ərazilərə öz yurisdiksiyası nəzarətindən çıxarır, Azərbaycan siyasi cəhətdən mövqelərini möhkəmləndirmək üçün bu ilin iyulun 7-də tarixi sayıla biləcək bir sənədə imza atdı.
İlham Əliyevin həmin tarixli fərmanına əsasən, Xankəndi şəhəri, Ağcabədi, Ağdam, Bərdə, Füzuli, Xocalı, Xocavənd, Şuşa və Tərtər rayonları Qarabağ İqtisadi Rayonun tərkibinə, Cəbrayıl, Kəlbəcər, Qubadlı, Laçın və Zəngilan rayonları isə Şərqi Zəngəzur iqtisadi rayonunun bölgüsünə daxil edildi.
Bununla da sülhməramlıların müvəqqəti yerləşdirildiyi ərazinin Azərbaycanın yurisdiksiyasında olduğu Prezidentin fərmanında əksini tapdı.
Açıq qalan məsələlər
10 noyabr bəyanatından sonrakı proseslər onu göstərdi ki, həmin üçtərəfli bəyanatın əksər bəndləri yerinə yetirildi, İrəvan buna mane olmağa çalışsa da, onun mövqeyindəki qeyri-konstruktivlik öz başında partladı.
Bəyanatın 6-cı maddəsində bildirilir ki, Laçın dəhlizi üzrə yeni hərəkət marşrutunun inşası planı müəyyən ediləcək. Bununla da həmin marşrutun mühafizəsi üçün Rusiya sülhməramlı kontingentinin gələcək yerdəyişməsi nəzərdə tutulur.
Bu, nə deməkdir?
İzahını verməyə çalışaq. Laçın dəhlizi Laçın şəhərinin içindən keçir. Laçın şəhəri o dəhlizin ortasında qalır. Azərbaycan isə təklif edir ki, yeni bir dəhliz inşa edilsin. Bunun üçün üç il müddət nəzərdə tutulub.
Yeni dəhlizin parametrləri müəyyən olunandan sonra Laçın dəhlizi Laçın şəhərini əhatə etməyəcək.
Hələlik bu məsələ ətrafında açıq suallar qalmaqdadır, ancaq Bakının əli gücləndikcə bunu da reallaşdıracağına əminlik çoxdur. Açıq sualların qalması isə Ermənistanın nümayiş etdirdiyi qeyri-müəyyən davranışlarla əlaqədardır.
Digər açıq qalan məsələ isə bəyanatın 4-cü maddəsinin icrasında yaranan problemlərdir. Belə ki, sülhməramlıların nəzarət zonasında qalan erməni separatçılar (söhbət “hərbçi” kimi təqdim olunan yaraqlılardan gedir) ərazidən çıxmaq əvəzinə həyasız addımlara yol atırlar. Bu, azmış kimi, ara-sıra hərbi təxribatlara da yol verirlər, amma Azərbaycan Ordusunun adekvat cavab tədbirləri ilə yerlərində otuzdurulurlar.
Separatçıların mənəvi dünyasındakı revanşizm duyğularını qidalandıran səbəblərdən biri də Rusiya sülhməramlı qüvvələrinin mandat və funksiyalarından kənar presedentlər yaratmasıdır.
Bu, zamanla Bakının narazılığına səbəb olsa da, hazırda Azərbaycan sülhməramlıların fəaliyyətinin ümumi cizgisindən razıdır.
NƏTİCƏ:
1. 10 noyabr bəyanatı sülh müqaviləsinin rüşeymi rolunu oynadı;
2. Bəyanatdan sonra Azərbaycan Ermənistan üzərində hərbi-siyasi qüdrətini yeni fazaya daxil etdi;
3. Yeni siyasi reallıqda Azərbaycan-Türkiyə-Rusiya üçlük formatı ön plana çıxdı;
4. 10 noyabr bəyanatı Ermənistanın özü haqqında yaratdığı mifi darmadağın etdi, bundan sonra Ermənistanda ictimai-siyasi, intellektual böhran dərinləşərək uçuruma yuvarlandı.
Butov.az
10-11-2021, 11:43
Bu gün Türkiyə Cümhuriyyətinin qurucusu və lideri Mustafa Kamal Atatürkün vəfat etməsindən 83 il ötür.
57 illik həyatında millətinin və vətəninin istiqlaliyyəti uğrunda apardığı hər bir mübarizəni zəfərlə taclandıran Atatürkün adı Türkiyə və dünya tarixinə qızıl hərflərlə yazılıb.
Atatürk 1881-ci ildə Selanikdə anadan olub.
Təhsil aldığı Selanik Hərbi Liseyində riyaziyyat müəllimi olan Mustafa Əfəndi Atatürkü sinifdəki digər “Mustafa”dan fərqləndirmək üçün istedadlı şagirdinə “Kamal” adını qoyub.
1923-cü ilin 29 oktyabr tarixində Türkiyə Böyük Millət Məclisi tərəfindən Cümhuriyyət elan edilərkən, Mustafa Kamal Atatürk dövlət başçısı seçilir (cumhurbaşkanı). 1938-ci il, vəfat etdiyi zamana qədər ard-arda dörd dəfə cumhurbaşkanı seçilən Atatürk bu vəzifədə ən uzun müddət qalan dövlət başçısı olub.
1921-ci il 23 avqustda yunanlarla aparılan Sakarya döyüşündə qələbə qazanan Mustafa Kamala “Marşal” və “Qazi” rütbəsi verilib. 1934-cü ildə isə ona qanunla “Atatürk” soyadı verilib və bu soyadın başqaları tərəfindən istifadə olunması qadağan edilib.
Atatürk 1938-ci il 10 noyabrda, 57 yaşında İstanbulda Dolmabahçe Sarayında gözlərini əbədi yumub. Onun nəşi 1953-cü ildə ölümünün 15-ci ilində Ankaradakı Etnoqrafiya muzeyindən Anıtkabirə köçürülüb.
Butov.az
10-11-2021, 11:17
Qadınlardan ibarət Azərbaycan millisinin futbolçuları Aysun Əliyeva və Ayşən Əhmədovanın yeni klubu bəlli olub.
Butov.az xəbər verir ki, hər iki oyunçu Türkiyə təmsilçisi "Rizespor"la müqavilə imzalayıb.
Qeyd edək ki, Aysun Əliyeva son olaraq Türkiyədə "Fomget Genclik ve Spor", Ayşən Əhmədova isə Rusiyanın "Rubin" klubunun formasını geyinib.
10-11-2021, 11:07
Koronavirusa yoluxan Biləsuvar Rayon İcra Hakimiyyətinin keçmiş başçısı Mahir Quliyev süni tənəffüs aparatından ayrılıb.
Butov.az xəbər verir ki, bu barədə Qaynarinfo.az-a onun vəkili Leyla Məmmədova məlumat verib.
Vəkil bildirib ki, hazırda Dövlət Gömrük Komitəsinin İxtisaslaşmış Hospitalında müalicə alan Mahir Quliyevin vəziyyəti nisbətən düzəlib.
"Amma buna baxmayaraq, bəzən ağırlaşmalar olur. Hərəkət edə bilmir. Hazırda M.Quliyevin xəstəxanada müalicəsi davam etdirilir”, - deyə vəkil əlavə edib.
Qeyd edək ki, Mahir Quliyev 2006-2011-ci illərdə Astara Rayon İcra Hakimiyyətinin, 2011-2020-ci illərdə Biləsuvar Rayon İcra Hakimiyyətinin başçısı olub. O, 2020-ci il 29 apreldə Dövlət Təhlükəsizliyi Xidmətinin xüsusi təyinatlı dəstələrinin İcra Hakimiyyətinin binasında keçirdiyi əməliyyat zamanı saxlanılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!