Butov.az xəbər verir ki, şəhid anası Sultan İlhasova ilə bağlı həyəcan təbili çalan "Əsgər Ailələrinə Dəstək" İctimai Birliyinin rəhbəri Mətanət Əsgərqızı öz feysbuk (Facebook) sosial şəbəkəsində diqqətimizi çəkən məlumat paylaşıb. Həmin məlumatı ictimailəşməsinin lazım olduğunu düşünüb təqdim edirik və inanırıq ki, QHT rəhbəri dəstəyini əsirgəməyəcək:

"İki gündür Səma Əliyeva adlı bir qız burada mənimlə yazışır. Deyir ki, Sultan ana ilə bağlı deyilən faktlar doğru deyil. Məni dəfələrlə günahlandırır ki, gərək faktları araşdıraydım. Ən böyük fakt Sultan ananın yaşadığı ortamdır. Bir sürü məsələni tökdü ortaya, Sultan ananın Səyyaf adlı oğlundan tutmuş, onun əl açıb məcburi diləndirilməyinə qədər. Çox məsələlər var. Amma hər nə məsələ olsa da bir şəhid anasının ortalıqda qalması, evsiz qalması heç nəyi dəyişmir. Və o xanım deyir ki, olan hadisələri videoya çəkib. O, Səyyafı da məni də biyabır edəcək ki, mən yalan danışmışam. Görəsən Sultan ananın dilənməyindən, evsiz olmağından böyük fakt nə ola bilər? Və o xanım deyir ki, saytlara çıxacağıq, sizi biyabır edəcəyik. Vallah "zəhmətkeş məktubları" təşkil edənlərin maşaları hər şey edər. Çünki mən deyirəm ki, cənab İlham Əliyevi, birinci vitse-prezident Mehriban Əliyevanı aldadırlar. Əli Həsənov nəvəsinə var-dövlət toplayıb belə ailələri unudub. Kəlbəcər və digər rayonların icra başçıları vətəndaşları taleyin ümidinə qoyublar. Cavid Qurbanovun adamları şəhid ailəsini təhdid edir.

Mən deyirəm ki, xaricdən milyonlar tökdülər, müxalifət xalqı başqa istiqamətə yönəldə bilmədilər, amma gələn il seçki ilidir, məmurlar xalqı hakimiyyətdən narazı salırlar. Və həmin məmurlar faktlarımız qarşısında iş görmək əvəzinə Səma xanım kimi bir gənci gizli video çəkməyə yönəldirlər... Amma hansı faktlar ortaya qoyulmağından asılı olmayaraq gizli video çəkmək cinayət əməlidir. Belə insanlar qanun qarşısında cavab verməli olarlar. Məmurlara isə son sözüm odur ki, insanları üstümüzə qaldırmaq, “zəhmətkeş məktubları” təşkil etmək əvəzinə ölkə rəhbərinə sədaqətli olun, iş görün, şantajla məşğul olmayın. Xalq sizin hər sifətinizi yaxşı tanıyır! Təbiidir ki, hamı də mənim Dövlətimə, cənab İlham Əliyevə sədaqətimi bilir... Alınmayacaq. Sadəcə onların maşasına çevrilən insanlara belə şeylərdən çəkinin deyirəm. Bunlar tarix olacaq. Elə olsun ki, nəsliniz bir zaman bunlardan utanmasın".