Butov.az xəbər verir ki, "Əsgər Ailələrinə Dəstək" İctimai Birliyinin sədri Mətanət Əsgərqızı Azərbaycan Respublikasının Birinci vitse-prezidenti xanım Mehriban Əliyevaya AÇIQ MƏKTUB yazıb. Həmin məktubu Mətanət xanımın öz feysbuk (Facebook) sosial şəbəkəsində paylaşdığı kimi təqdim edirik:

Azərbaycan Respublikasının Birinci
vitse-prezidenti xanım Mehriban Əliyevaya

AÇIQ MƏKTUB

Hörmətli Mehriban xanım,
Bu günlərdə "Əsgər Ailələrinə Dəstək" İctimai Birliyi Sizə şəhid Xalıq Əzizzadənin bank borcu məsələsinə görə bir minnətdarlıq məktubu göndərdi. Siz o şəhid ailəsinə dəstək oldunuz. Bununla bir daha bəyan etdiniz ki, şəhid və məcburi köçkün ailələri ölkəmiz üçün dəyərlidirlər və hər zaman dövlətimizin himayəsindədirlər. Bu həm də bəzi məmurlara bir mesaj idi.
Dəyərli Mehriban xanım, lakin görünən odur ki, sizin sərgilədiyiniz bu nəcib hərəkət, hər müşavirədə cənab İlham Əliyevin "məmurlar təvazökar olmalıdırlar, xalqa xidmət etməlidirlər" sözləri onlara təsir etmir. Belə olmasa Kəlbəcərdən olan şəhid anası əl açıb dilənməz. Sultan Bəylərqızı İlyasovanın oğlu şəhid olub. Onun meyidi belə ələ gəlməyib. Ana bir məzar tapmır ki, oğlunu ağlasın. O dərddən də betər bu ailənin səhralıqda susuz bir tövlədə yaşamasıdır. "Əsgər Ailələrinə Dəstək" İctimai Birliyi şəhid anasını dilənərkən tapdı. Məsələni ictimailəşdirdik ki, ona yiyə duran olsun. Lakin ailənin həm də qara günləri başladı. İstər Kəlbəcər Rayon İcra Hakimiyyəti başçısı, istərsə də deputat Cavid Qurbanovun adamları ailəni hədələmək, polislə təhdid etməyə başladılar. Sultan ananın yaşadığı yeri tapdıq. Gözlər görməsin, amma heç inanmazdım ki, bir şəhid ailəsi belə məhrumiyyətlərdə yaşasın. Canlı video paylaşdıq. O video sosial şəbəkələrdə 100 minlərlə səs topladı. Hər kəs kömək əlini uzatmaq istədi. Lakin İctimai Birlik olaraq biz də dövlətimizdən gələcək yardımı gözlədik. Amma əvəzində yenə şəhid ailəsi polislə təhdid olunmağa başladı ki, niyə Əli Həsənovun, Cavid Qurbanovun və digər məmurların adları çəkilir.

Hörmətli Mehriban xanım, ötən həftə Kəlbəcər Rayon İcra Hakimiyyətinin başçısı Aqil Məmmədov imkansız ailəni, xəstə şəhid anasını Gəncəyə çağırtdırıb ki, niyə şikayət edirsiz. Polislə təhdid ediblər. Bu adamlardan hər şey gözləmək olar.
Biz dövlətimizin, dövlət başçılarımızın cənab İlham Əliyevin və sizin, birinci vitse-prezident Mehriban xanım Əliyevanın yanındayıq. Ulu öndər Heydər Əliyevin kursunun davamçıları olan siz onun silahdaşlarısınız. O, hər zaman həssas qruplardan olan insanlara çox diqqətlə yanaşırdı. Siz də bu yolu davam etdirirsiniz. Qaçqın, məcburi-köçkünlər, şəhid ailələri, müharibə veteranları və əllilləri üçün çoxlu işlər görülüb. Amma bilirik ki, bu işlərin yüksək səviyyədə aparılması üçün məmurlar işlərinə vicdanla yanaşmalıdırlar. Lakin xalq belə məmurlardan məhrumdur. Bu məmurların zorakılığından doyub. Şəhid anası mənə sual verir ki, qanından erməni qarışığı olan anası, nənəsi, arvadı erməni olan bu məmurlar oğlum onlara güllə atdığınamı görə bizim ailəni cəzalandırırlar. Bu suala cavab tapa bilmirəm...

Hörmətli Mehriban xanım, bu vəziyyətdə yaşayan şəhid və məcburi köçkün ailələri çoxdur. Lakin məmurlar Sizə və cənab İlham Əliyevə yalan məlumatlar verirlər. Adlarını qeyd etdiyim şəxslərin problemlərini həll etmək əvəzinə şantajla, təhdidlə məşğuldurlar. 2017-ci ilin fevralında şəhid olmuş 5 kəşfiyyatçımızdan biri Zülfü Qədimovun ailəsi Beyləqan rayonunda tövlədə yaşayır. Ailə Ağdamdan məcburi köçkündür. Lakin nə Qaçqınkom Əli Həsənovun, nə Səlim Müslümovun, nə də Ağdam Rayon və Beyləqan Rayon İcra Hakimiyyəti Başçılarının bu ailənin varlığından xəbərləri yoxdur. O tövlənin üzərindəki Azərbaycan Bayrağını görsəniz!

Afət Xanış qızı Rzayeva Laçından olan məcburi köçkündür. Həyat yoldaşı Şahin Əhməd oğlu Əhmədov 1992-ci ildə şəhid olub. Şəhidin ailəsi o zaman Ali Sovet tərəfindən boş evə yerləşdirilib. 1996-ci ildə isə həmin evi Binəqədi rayonunda Gədəbəydən olan vətəndaşın adına sənədləşdiriblər. 2017-ci ilin iyul ayında Afət Rzayeva işdə olarkən məhkəmə icraçıları gələrək qapını sındırıb, onun əmlakını daşıyıblar. İndi Afət Rzayeva şəhidin yadigarı olan bircə oğlu ilə küçələrdə qalıb. Nə Laçın rayon İcra Hakimiyyətinin başçısı, nə də Qaçqınkom Əli Həsənov bu ailə ilə maraqlanmır. Afaq Rzayeva deyir ki, ağır durumda olan bir qohumuma kömək etmişəm. Onlar övladlarını evləndirmək istəyirdilər. Ev yox idi. Mənim adıma ipoteka ilə oğullarına ev götürdülər. İndi evləndiriblər, ailə həmin mənzildə yaşayır. Bunu hamı bilir, Qaçqınkom da həmçinin. Bunu bəhanə gətirib məni heç hara yerləşdirmirlər.

Hörmətli Mehriban xanım, qeyd etdiyim siyahıları uzada bilərəm. Dövlətin etibar etdiyi, cənab İlham Əliyevin etimadını doğrultmayaraq tutduğu postda özünə milyonlar yığan məmurların, xüsusi ilə bu ailələrin dramının səbəkarları Kəlbəcər, Bərdə, Ağdam, Beyləqan, Laçın rayon İcra Hakimiyyətlərinin başçılarının, Əmək və Əhalinin Sosial Müdafiəsi naziri Səlim Müslümovun, Baş nazirin müavini, Dövlət Qaçqınkomun sədri Əli Həsənovun, qeyd etdiyim rayonların millət vəkillərinin ayağının altından torpaq qaçmalıdır.

Bu şəxslər görün nə qədər işlərini bacarmırlar ki, şəhid ailələrinin problemlərini təcili həll etmək əvəzinə "zəhmətkeş" məktubları, ağsaqqalların müraciətlərini təşkil edirlər. Dövlətə qarşı təxribatı məhz bu məmurlar törədir. Xaricdən maliyyələşərək ölkədə narazı mühit formalaşdırmaq istəyən müxalifətin və digər qrupların xalqda narazılıq yaratmağı bacarmadığını belə məmurlar etdilər. İnsanları dövlətdən narazı saldılar. Gələn il seçki ilidir. Həssas qruplardan olan insanların problemlərini həll etmək əvəzinə onları dövlətdən narazı salaraq hakimiyyətə qarşı çevirənlər əslində, cənab İlham Əliyevə və Sizə xəyanət etmiş olurlar. Nəhayət, belə məmurlara durun deyin!

Dəyərli Mehriban xanım, şəhid ailəsi təhdid olunursa, bu məsələləri ictimailəşdirən mənim də demək, həyatım təhlükədədir. Sizdən və Dövlət Təhlükəsizlik Xidmətinin rəisi cənab Mədət Quliyevdən xahiş edirəm, kəlbəcərli şəhid ailəsinin, mənim və ailəmin təhlükəsizliyini təmin edəsiniz, qeyd etdiyim məsələlərlə bağlı şəhid ailələrini himayənizə götürəsiniz.
Əvvəlcədən minnətdarlığımı bildirirəm.

Hörmətlə,
"Əsgər Ailələrinə Dəstək" İctimai Birliyinin sədri Mətanət Əsgərqızı