Xatirə İslamın ifasında "Qarabağ" futbol komandasına həsr olunmuş mahnını çox sevirəm. Həmin mahnıda müğənni belə deyir: "Gözləyirik, vur "Qarabağ"! Hesabını sor, "Qarabağ"! Meydan özü meydanlara, buna gücün var, "Qarabağ""!..
Bəli, gözlədik, izlədik və sevindik - "Qarabağ'' meydanlara meydan oxudu...

"Qarabağ"a həmişə inanmışam, o da çox vaxt mənim inamımı doğruldub. Bu dəfə olduğu kimi. Doğma vətəndə Danimarkanın "Kopenhagen" klubuna minimal hesabla (1:0) qalib gələn Ağdam təmsilçimiz səfərdəki cavab görüşündə əldə etdiyi sərfəli nəticə ilə (1:2) ümumi hesabda qələbə qazanaraq UEFA-nın Çempionlar Liqasının qrup mərhələsinə vəsiqə qazandı. Əhsən! Təbriklər, "Qarabağ" və bütün Azərbaycan!

Demək olar ki, hər matçda özünün soyuqqanlılığını saxlamağa çalışan təcrübəli mütəxəssis Qurban Qurbanovun bu dəfəki sevinc göz yaşları nəzərimdən qaçmadı. Əlbəttə, bu göz yaşları təkcə qələbə yox, həm də tarixə imza atmaq göz yaşları idi... Axı indiyə kimi Azərbaycan futbol tarixində bu cür nailliyyət olmamışdı. Biz azarkeşlər televizor qarşısında belə sevinirdiksə, bir də onu təsəvvür edin. Çox sağ olun, Qurban müəllim! Bizə bu sevinci yaşatdırdığınız üçün çox sağ olun! Şəhərdəki izdihamlar, xoş sözlər, alqışlar...nəyə desən dəyərdi.

Qələbədən sonra bir insandan eşitdim ki, bu nəticə "Pirr qələbəsi" idi. Yəni məğlubiyyətə bərabər nəticə. Razı deyiləm. Əsla razı deyiləm. Bu qələbə qarabağlılara yaraşan əzmkar bir qələbə idi. İnanıram ki, biz hələ Qarabağın adı ilə bağlı çox qələbələr, xoş xəbərlər eşidəcəyik...

Dünən gecə komandamız təyyara ilə geri qayıtdı. Bütün saytlar, xəbər portalları da yazdı ki, "Qarabağ" geri qayıtdı. Hələ bir də Qarabağın geri qayıdacağına sevinəcəyik. Mütləq sevinəciyik...

Kənan Novruzov