AMEA Mərkəzi Elmi Kitabxanası (MEK) və Türkiyənin Ankara şəhərində yerləşən İldırım Bəyazid Universiteti Kitabxanası arasında əməkdaşlıq haqqında memorandum imzalanıb. Memorandum MEK direktoru Leyla İmanova və Ankara İldırım Bəyazid Universiteti Kitabxanasının direktoru Mahmut Kocaman tərəfindən imzalanıb.
Kitabxanaların elmi və mədəni irsinin toplanılıb qorunması sahəsindəki rolunun, ölkələr arasında siyasi, diplomatik və mədəni əlaqələrin inkişafında elmi-mədəni irsin mübadiləsi zəruriliyinin vurğulandığı memorandumda göstərilən istiqamətlərin birgə inkişaf etdirilməsi nəzərdə tutulub. Memorandumda – kitabxana prosеslərinin avtomatlaşdırılması; elеktron kataloqların mübadiləsi; elеktron кitabxanalardan qarşılıqlı istifadə; kitab nəşri; elmi tədqiqatlar; informasiya mənbələrinin (nadir kitablar daxil olmaqla) mühafizəsi (elektron nəzarət və başqa tеxnologiyalar); arxivlərin və kitab fondlarının zənginləşdirilməsi məqsədilə bеynəlxalq кitab mübadiləsi; kitab sərgilərinin təşкili; virtual sərgilərin təşkili (elm və mədəniyyət mövzularında); kitabxana işi sahəsində mütəxəssislərin hazırlanması, təcrübə mübadiləsi, təlimlər, müzakirələr, seminarlar və konfransların keçirilməsi; Azərbaycan, türk, ingilis dilli tərcüməçilər şəbəkəsinin yaradılması və inkişaf etdirilməsi; vahid kataloqlaşdırma qaydalarının müzakirəsi və birgə addımların atılması; vahid biblioqrafik təsvir qaydalarının müzakirəsi və birgə addımların atılması; vahid elmi e-kitabxana platformasının yaradılması və kitabxanaların inteqrasiyası; sağlamlıq məhdudiyyəti olan şəxslərin (görmə qabiliyyəti zəif və ya əlil arabasından istifadə edən şəxslər) kitabxana xidmətlərindən istifadə imkanlarının genişləndirilməsi kimi mühüm məsələlər əks olunub.
Qeyd edək ki, MEK Kitabxana-xidmət şöbəsinin əməkdaşları 10-14 dekabr 2018-ci il tarixində Türkiyənin Ankara şəhərində işgüzar səfərdə olub, kitabxanalarla təcrübə mübadiləsi həyata keçirmişlər. Ankara İldırım Bəyazid Universiteti Kitabxanasını da ziyarət edən MEK əməkdaşları Mərkəzi Elmi Kitabxananın fəaliyyəti, iş prinsipi, imkanları, mövcud bazası, fondları, həyata keçirdiyi layihə və təşəbbüslər haqqında ankaralı həmkarlarına geniş məlumat verib, kitabxanaya Azərbaycanın zəngin mədəniyyətini, incəsənətini və qədim tarixini əks etdirən kitablar bağışlayıblar.
Ankara İldırım Bəyazid Universiteti Kitabxanasının direktoru Mahmut Kocaman MEK əməkdaşlarının ziyarətindən məmnunluğunu ifadə edib, MEK-ə memorial yaddaşı əks etdirən kitab və rəsmlər təqdim edib. Mərkəzi Elmi Kitabxana haqqında geniş təsəvvürə sahiblənən, xüsusilə Azərbaycana aid cəm edilmiş strateji informasiyanı elektron formatda oxucu üçün əlçatan edən Milli Rəqəmsal Yaddaş layihəsinin üstünlüklərinə və Vahid Qeydiyyat Sisteminin iş prinsiplərinə maraq göstərən müəssisə rəhbəri əməkdaşlıq təkliflərini səsləndirib və işbirliyinin təşkili üçün birgə addımların atılması təşəbbüsü ilə çıxış edib.