Son zamanlar Bakı metrosunda yaşanan problemlərlə bağlı şikayətlər daxil olur. Şikayətçilər bildirirlər ki, bu həftə ərzində Bakı metrosunda dəhşətli dərəcədə sıxlıq yaşanır. Bununla bərabər şikayət edən şəxslər hesab edirlər ki, "Bakı Metropoliteni” QSC xidmətin təşkilində bəzi qüsurlara yol verib. Belə ki, məlumata görə, sentyabrın 21-də "Gənclik” stansiyasında qatarda tüstüləmə müşahidə olunub və sərnişinlər evakuasiya olunub. Bildirilir ki, bundan bir gün sonra "Bakı Metropoliteni” QSC-nin yeganə xanım maşinisti "Xalqlar dostluğu” stansiyasında qatarı saxlaya bilməyərək, 2 vaqon ölçüsündə tunelə daxil olub. Bildirilir ki, bu cür hadisələr Bakı metrosunda tez-tez baş verir.
Butov.az Qaynarinfo-ya istinadən xəbər verir ki, musavat.com səslənən ittihamlarla bağlı məlumat almaq üçün "Bakı Metropoliteni” QSC-nin mətbuat xidmətinin rəhbəri Bəxtiyar Məmmədovla əlaqə saxlayıb. O, səslənən ittihamlarla bağlı aşağıdakıları deyib:
"Sentyabrın 21-də saat 14:30 radələrində xətdə hərəkət edən qatarın vaqonunda spesifik qoxu və tüstü müşahidə olunub. Ancaq tüstüləyən qatarın içərisində sərnişin olmayıb. Belə ki, həmin qatar, sadəcə olaraq, sınaq üçün xəttə buraxılıb. Qatarın təkərinin detallarından biri sıxıldığından sürtünmə baş verib və nəticədə ətrafa dəmirin sürtünməsindən yaranan qoxu yayılıb. Ondan sonra gələn qatara tüstü dolduğu üçün təlimat tələbinə uyğun olaraq ”Gənclik" stansiyasında sərnişinlər qatardan düşürülüb, vaqonlara baxış keçirilib. Hər hansısa problem aşkar olunmayıb. Həmin qatar sərnişinlərlə yoluna davam edib.
Sərnişinlər arasında həyəcanlanan olub. Müvafiq ilkin yardım göstərilib və təcili tibbi yardımın dəvət edilməsi təklif olunub. Lakin sərnişinlər könüllü təcili tibbi yardımın çağırılmasından imtina ediblər. Təmirlərin sonuncu mərhələsində sınaq məqsədilə qatar normal qaydada sərnişinsiz formada xəttə buraxılır. Müəyyən qədər məsafəni qət edən qatar yenidən depoya qaytarılır. Problem həmin qatarda baş vermişdi".
Xanım maşinistin qatarı saxlaya bilməməsi məsələsinə gəlincə isə B. Məmmədov bununla bağlı hələ şərh vermək istəmədiyini söyləyib:
"Məsələ təsvir olunan kimi deyil. Ancaq bu cür hadisə baş verib. Belə məqamlar nadir hallarda da olsa bütün dünya metropolitenlərində rast gəlinən bir hadisədir. Metroda maşinistlərin istirahət vaxtından şikayət ola bilməz. Biz 3 növbəli sistemə keçdikdən sonra maşinistlərin istirahət vaxtı normativ hədlərə uyğundur. Hər bir maşinist kifayət qədər istirahət edə bilər”.
Çikayət edən maşinistlər bildirirlər ki, əvvəllər bəzi stansiyalarda maşinistlərin istirahəti üçün müvafiq yerlər olduğu halda, hazırda onlar yığışdırılıb. Bu məsələ ilə bağlı Bəxtiyar Məmmədov deyib ki, əslində deyilən yerlər maşinistlərin istirahətləri üçün nəzərdə tutulmamışdı:
"Bizdə xətlərdə maşinistlərin təlimat otaqları vardı. Sadəcə olaraq, maşinistlər əvvəllər metropolitendəki obyektlərdə gecələyirdilər. Yəni onların yataq yerləri var idi. Ancaq hazırda həmin qayda ləğv olunub. Maşinistlər metropoliten tərəfindən evlərinə daşınır, növbələri gəldikdə isə metropolitenə gətirilirlər. Bu sistemin tətbiqi maşinistlərin istirahət saatlarının artmasına səbəb olub. Yaranan vəziyyət maşinistlərin yataqxanada deyil, evlərində rahat dincəlmələrinə şərait yaradılıb. Bununla bağlı hər şey qaydasındadır”.
Metropoliten sözçüsü bildirib ki, dərs ili başlanandan yüz minlərlə insan daşınıb:
"Sentyabrın 16-da 800 mindən artıq sərnişin daşınıb. Sentyabr ayının 14-dən yeni qrafikə keçmişik. Bununla qatarların sayı da artırılıb. Belə ki, yay aylarında Bakı metrosunda sərnişinlər kifayət qədər azalır. Bununla bağlı iyul-avqust aylarında yay qrafiki tətbiq olunur. Yəni qatarların sayı azaldılır. Ancaq qış mövsümü başlayandan sonra qış qrafiki tətbiq olunur. ”28 May", "Həzi Aslanov” istiqamətində gur saatlarda qatarların sayı artırılır və qrafik 2 dəqiqəyə bərabər olur. Biz buna 30 cüt prinsipi deyirik. Bu da o deməkdir ki, 1 saatda 1 stansiyadan 30 qatar keçir. Bu da 2 dəqiqəyə 1 qatar deməkdir".