“Azərbaycan Televiziya və Radio Verilişləri” (AzTV) Qapalı Səhmdar Cəmiyyəti (QSC) yanında Bədii Şuranın növbəti iclası keçirilib.
Butov.az xəbər verir ki, “Azərbaycan Televiziya və Radio Verilişləri” QSC-nin Sosial media və ictimaiyyətlə əlaqələr şöbəsindən AZƏRTAC-a bildiriblər ki, iclasda QSC sədri Rövşən Məmmədov AzTV-nin bu günlərdə qeyd olunan 64, Mədəniyyət kanalının isə 9 yaşı münasibətilə şura üzvlərini təbrik edib. Sədr, eyni zamanda, şura üzvlərinin Xəzər rayonunda ictimaiyyətlə keçirilən görüşünün nəticələri ilə maraqlanıb. Şura üzvləri - Əməkdar incəsənət xadimi, şair Baba Vəziroğlu, Xalq artistləri Faiq Sücəddinov, Mübariz Tağıyev, Ramiz Quliyev, Mənsum İbrahimov, Siyavuş Kərimi, Əməkdar incəsənət xadimi Fəxriyyə Xələfova, professor Ceyran Mahmudova və digərləri çıxış edərək ictimaiyyətin Xəzər rayonunda da Azərbaycan Televiziyasına isti münasibət göstərdiklərini bildiriblər. Şura üzvləri daha sonra rayon sakinləri ilə görüşdə Azərbaycan Televiziyası ilə bağlı qaldırılan fikir və təkliflərini səsləndiriblər. Rövşən Məmmədov qeyd edib ki, ictimaiyyətin rəy və təklifləri televiziyanın efir siyasətinin yürüdülməsi üçün vacib amildir.
Daha sonra iclasda cari məsələlər müzakirə olunub. Eyni zamanda, şura üzvləri tərəfindən təklif olunub ki, AzTV Bədii Şurası ictimaiyyətlə ardıcıl olaraq ayda iki dəfə görüşsün, bu görüşlər veriliş formatında həftəsonu efirdə yayımlansın. Veriliş zamanı görüşdə qaldırılan irad və təkliflərin də yayımlanması təkliflər arasında yer alıb. Təklif dəstəklənərək qəbul olunub. Bədii Şuranın növbəti görüşünün Bakı Dövlət Universitetində tələbələrlə baş tutması qərara alınıb.