Bakı Şəhər Baş Polis İdarəsinin Dövlət Yol Polisi İdarəsi əhaliyə və avtomobil sahiblərinə müraciət edib.

Butov.az xəbər verir ki, İdarənin şöbə rəisi, polis polkovniki Vaqif Əsədov AZƏRTAC-a açıqlamasında bildirib ki, dekabrın 10-da Azadlıq meydanında keçiriləcək Zəfər paradında texnikaların hərəkəti və hərbi yürüş Nobel prospektindən başlayacaq və Ağ Şəhər bulvarına bitişik ərazidən keçərək Dənizkənarı bulvar boyu, Neftçilər prospekti, Azneft meydanı, Bayıl qəsəbəsi və Bibiheybət məscidi istiqaməti üzrə nəzərdə tutulub. Tədbirin təhlükəsizliyinin, parad iştirakçılarının sərbəst hərəkətinin təmin edilməsi məqsədilə Azadlıq meydanı istiqamətinə paralel və kəsişən bütün küçə və prospektlərdən avtomobillərin hərəkətinə məhdudiyyət qoyulur.

Belə ki, tədbir tam başa çatanadək həmin istiqamətlər üzrə - Bakı-Salyan yolunun 14-cü kilometrliyindən 3-cü Kənar Dairəvi yol istiqamətinə, Bayıl qəsəbəsi Üzgüçülük hovuzu yanından Xanlar küçəsinə, Səbail Rayonu Yanğından Mühafizə İdarəsinin inzibati binası qarşısından Q.Abbasov və Saraykin küçəsinə, M.Hüseynov, T.Elçin, Lermontov, İstiqlaliyyət və Niyazi küçələrindən Azərbaycan prospektinə, A.Cəlilov küçəsinin A.İsmayılov, N.Əliyev, F.Bayramov və Y.Səfərov küçələri ilə kəsişməsindən 10-cu zavod dairəsinə, Y.Səfərov, Ə.Quliyev və 28 May küçələri kəsişməsindən D.Əliyeva küçəsi istiqamətinə, 28 May küçəsinin, R.Zorgi, K.Səfərəliyeva, Puşkin, S.Vurğun, R.Behbudov küçələri, Azadlıq və Bülbül prospektləri kəsişməsindən A.Bakıxanov və Füzuli küçələri istiqamətinə hərəkət müəyyənləşdirilir.

"Yol hərəkəti iştirakçılarına bildirilir ki, həmin istiqamətlər üzrə şəxsi avtomobillərdən istifadə suni sıxlığın və ya tıxacların yaranmasına səbəb ola bilər. Bir daha xahiş edilir ki, ölkə əhəmiyyətli tədbirin yüksək səviyyədə keçirilməsi üçün qaydalara düzgün əməl edilsin", - deyə V.Əsədov bildirib.