Bakı-Tiblisi-Qars dəmir (BTQ) yolu xətti Türkiyənin Qars vilayətində strateji xarakter daşıyan logistika mərkəzi ilə birləşdiriləcək.

Butov.az Teleqraf.com-a istinadən xəbər verir ki, bu, Türkiyə-Azərbaycan iqtisadi əməkdaşlığına dair fəaliyyət planında əks olunub.

Sənədə əsasən, fəaliyyətin icrasını Türkiyə tərəfdən Nəqliyyat və İnfrastrukktur Nazirliyi və Dövlət Dəmir Yoları, Azərbaycan tərəfindən isə “Azərbaycan Dəmir Yolları” QSC həyata keçirəcək.

Xatırladaq ki, BTQ 30 oktyabr 2017-ci ildə açılıb. Dəmir yolu xətti Asiya və Avropanın dəmir yol şəbəkələrinin birləşdirilməsini təmin edir. Bu təkcə 3 ölkə arasında deyil, həm də Asiya ilə Avropa arasında ən qısa yoldur. BTQ yüklərin daşınmasına sərf edilən vaxtı 2 dəfədən çox qısaltmağa imkan verir. BTQ dəmir yolu Mərkəzi Asiya ölkələrinin – Türkmənistan, Qazaxıstan, Özbəkistan, Qırğızıstan, Tacikistan və Əfqanıstanın Avropa və dünya bazarlarına çıxışını asanlaşdırır.

Ümumi uzunluğu 846 kilometr olan BTQ-nin 504 kilometrlik hissəsi Azərbaycanın ərazisinə düşür. Dəmir yolu xəttinin 263 kilometri Gürcüstandan keçir. Yolun 79 kilometri isə Türkiyə ərazisindədir. Bu yol vasitəsilə birinci mərhələdə 5 milyon ton, ondan sonrakı mərhələdə 17 milyon ton, ondan sonra isə daha böyük həcmdə yüklərin daşınması nəzərdə tutulur.

Logistika mərkəzinin tikintisi 2021-ci ildə başa çatacaq. Layihənin dəyəri 221,816 milyon lirə səvyyəsində gözlənilir. Mərkəzin istifadəsindən əldə olunan gəlir bir milyard ABŞ dollara çataçağı mümkündür. Logistika mərkəzinin ərazisində ümumilikdə 1 600 kvadrat metr həcmində iki su çəni, 1 300 kvadrat metr sahədə avtomobil qarajı, 7 000 kvadrat metr sahədə qatar təmiri emalatxanası yerləşəcək. Mərkəzdə həm sərnişin, həm də yük qatarları təmir ediləcək”.

Qeyd edək ki, Qarsda logistika mərkəzinin tikintisi üçün 300 min kvadrat metr ərazi ayrılıb ki, bunun 170 min kvadrat metri anbarlar üçün nəzərdə tutulub. İl ərzində logistika mərkəzindən 412 min ton yük nəql olunacaq.

Logistika mərkəzinin ərazisindən Qars-Ərzurum dəmir yolu ilə birləşəcək 16 kilometr uzunluğunda dəmir yolu keçəcək.