Xocalı soyqırımının 30-cu ildönümü ilə əlaqədar Şamaxı rayon Mədəniyyət Evində tədbir keçirilib.

Butov.az xəbər verir ki, Şamaxı Rayon İcra Hakimiyyətindən “Qafqazinfo”ya verilən məlumata görə, tədbirdə icra başçısı Tahir Məmmədov, Milli Məclisin deputatı Tamam Cəfərova, hüquq-mühafizə orqanlarının rəhbərləri, rayon ictimaiyyətinin nümayəndələri, Vətən müharibəsi iştirakçılarının bir qismi iştirak ediblər.

Şamaxı RİH başçısı Tahir Məmmədov tədbirdə çıxış edərək Xocalı soyqırımının insanlığa qarşı törədilmiş ən dəhşətli cinayət olduğunu qeyd edib, Xocalı həqiqətlərinin dünyaya çatdırılması, bu soyqırımın beynəlxalq aləmə yayılması, qətliama obyektiv qiymət verilməsi istiqamətində Heydər Əliyev Fondunun gördüyü işləri xüsusi vurğulayıb. Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası nəticəsində dünya ictimaiyyətinin məlumatlandırılması məqsədilə həyata keçirilən tədbirlərdən bəhs edib.

Milli Məclisin deputatı Tamam Cəfərova tarixi torpaqlarımızda məskunlaşmış ermənilərin ölkəmizə qarşı daim ərazi iddiasında olmaları, məkrli və təcavüzkar siyasət yürütmələri torpaqlarımızın iyirmi faizini işğal etmələri, əlverişli strateji və coğrafi mövqedə olan Xocalıda və digər yaşayış məntəqələrimizdə xüsusi amansızlıqla xeyli sayda dinc sakinləri qətlə yetirmələri və əsirlərə qarşı qeyri-insani hərəkətlər etmələrini qeyd edib.

Tədbir çərçivəsində Prezident İlham Əliyevin müvafiq sərəncamlarına əsasən, medallarla təltif olunan bir neçə Vətən müharibəsi iştirakçısına medallar təqdim olunub.