7-ci Beynəlxalq Sosial Elmlər Konqresinin iştirakçıları sabah Şuşaya gedəcəklər.

Butov.az Modern.az-a istinadən xəbər verir ki, konqres iştirakçıları Azərbaycanın işğaldan azad olunmuş ərazilərinə səfər edərək, Ermənistan ordusunun törətdiyi cinayətlərə şahidlik edəcəklər.

Qeyd edək ki, tədbirin ilk günündə xüsusi qonaq olaraq Türkiyə Böyük Millət Məclisinin sədri Mustafa Şentop və Azərbaycan Milli Məclisinin sədri Sahibə Qafarova iştirak edib. Eyni zamanda Türkiyənin 40-dan çox universitetinin rektoru da Bakıdakı toplantıda iştirak edib.

Konqresdə Qarabağın işğaldan azad edilməsi və Xocalı qətliamı kimi məsələlərə diqqət yetirilib.

Geniş elmi mövzuları əhatə edən beynəlxalq simpozium təşkil etməklə universitetlər və ölkələr arasında əməkdaşlığı artırmaq, Azərbaycan və Türkiyə alimlərinin hazırladıqları elmi araşdırmaların xaricdə təmsil olunmasını təmin etmək və bu münasibətlə elmə töhfə vermək hədəf olaraq seçilib.

Bundan sonra mərhələdə konqresdə təqdim olunan məruzələrin tam mətnləri, qurultay və regionun şəkillərindən ibarət kitab hazırlanaraq həm çap, həm də onlayn olaraq xüsusi buraxılış kimi aidiyyəti şəxslərin diqqətinə təqdim olunacaq.

İctimai elmlərin bütün sahələrinə açıq olacaq bu konqresdə xüsusi mövzu olaraq Qarabağ seçilib. Bundan əlavə, Şuşa, Füzuli kimi tarixi şəhərlərin, Xocalı soyqrımı kimi mövzuların xüsusi araşdırılması planlaşdırılır.