Cənubi Muğan Kanalı İstismarı İdarəsi tərəfindən cari ildə Təzə Cənubi Muğan, Köhnə Cənubi Muğan və Maşın qolu kanallarında lildən təmizlənmə işləri davam etdirilib. Əlavə olaraq kanallar üzərində olan hidrotexniki qurğular və istismar yolları da təmir olunub. Bundan başqa, idarənin balansında olan nasos stansiyalarına baxış keçirilərək təmir olunub və yenidən istismara verilib.

Butov.az xəbər verir ki, Meliorasiya və Su Təsərrüfatı Açıq Səhmdar Cəmiyyətinin mətbuat katibi Dilqəm Şərifov AZƏRTAC-a bildirib ki, Cənubi Muğan Kanalı İstismarı İdarəsi Biləsuvar, Cəlilabad, İmişli və Cəbrayıl rayonlarının 85 min hektara yaxın əkin sahəsinin suvarılmasına xidmət edir.

İdarənin balansında 136 kilometr magistral kanallar var ki, onun 46 kilometri beton üzlüklü, 90 kilometri isə torpaq məcrarlı kanallardır. Magistral kanallar üzərində isə 168 texniki qurğu mövcuddur. Onlardan 38-i körpü, 36-sı hidropost, 24-ü səviyyəqaldırıcı qurğu, 68-i isə suburaxıcı qurğulardır. Hazırda idarə plana uyğun olaraq kanallarda lildən təmizləmə işlərini həyata keçirir.

Dilqəm Şərifov, həmçinin qeyd edib ki, ilin əvvəlində Cənubi Muğan Kanalı İstismarı İdarəsinin əməkdaşları Azərbaycan Meliorasiya və Su Təsərrüfatı ASC-nin rəhbərliyinin tapşırığı əsasında rayon ərazisində yerləşən bütün kəndlərdə sudan istifadə edən mülkiyyətçilərlə görüş keçirib. Görüş zamanı sudan qənaətlə və səmərəli istifadə olunması, növbəlilik qrafikinə əməl edilməsi, gecə suvarması zamanı suyun kollektor-drenaj şəbəkəsinə axıdılmasına yol verilməməsi mövzularında maarifləndirmə işləri aparılıb.