Muxtar respublika rəhbərinin tapşırığı və dəstəyi ilə daha 2 ədəd elektriklə işləyən nəqliyyat vasitəsi taksi xidməti kimi fəaliyyət göstərmək üçün sərnişinlərin istifadəsinə verilib. CHANGAN AUCHAN markalı bu nəqliyyat vasitələri 7 yerlikdir (6+1). Tam yüklü batareya ilə 300-350 kilometr məsafə qət edə bilir.

Butov.az AZƏRTAC-a istinadən xəbər verir ki, Naxçıvan şəhərindəki avtobus parkında keçirilən elektriklə işləyən taksilərin təqdimatında bu sözləri “Naxçıvan Muxtar Respublikası Dövlət Nəqliyyat Xidməti” publik hüquqi şəxsin direktoru Əli Hüseynəliyev deyib.

Əli Hüseynəliyev qeyd edib ki, taksilərdə batareyaların tam dolması üçün ev şəraitində (220 V) 5-7 saat, şarj aparatı ilə 100 dəqiqə kifayət edir. Nəqliyyat vasitəsinin sürət həddi 200 km/saatdır. Avtomaşın kondisioner və qızdırıcı sistemlə təmin olunub. Maşınların öndən və arxadan görüntü kameraları vardır. Bu da baş verə biləcək hadisələrin araşdırılmasına köməklik göstərəcək. Həmçinin ABS əyləc sistemi, elektrikli pəncərələr (ön və arxa tərəf), arxa park radar sistemi mövcuddur. Elektriklə işləyən bu maşınlar ekoloji cəhətdən təmiz, yanacaq sərfi baxımdan qənaətcildir. Elektriklə işləyən nəqliyyat vasitələrinin şəhərimizdə xəttə buraxılması sərnişindaşıma səviyyəsinin daha da yüksəldilməsinə töhfəsini verəcək.

Diqqətə çatdırılıb ki, istifadəyə verilən yeni taksiləri işlətmək üçün işə götürülən sürücülər diqqətli olmalı, maşınların sazlığına daim nəzarət etməli, texniki qulluğu vaxtında həyata keçirməli, sərnişinlərə daha yüksək səviyyədə xidmət göstərməli, 288 taksi xidməti ilə sıx əlaqədə işləməlidirlər.

Sonra tədbir iştirakçıları istifadəyə verilən yeni taksilərlə əyani tanış olublar.

Qeyd edək ki, bu il mayın 13-də “Naxçıvan Muxtar Respublikası Dövlət Nəqliyyat Xidməti” publik hüquqi şəxsinə 6 yeni elektrobus təqdim olunub. Elektriklə işləyən nəqliyyat vasitələri müasir sərnişindaşıma xidməti göstərməklə bərabər, ekologiyanın çirklənməsinin də qarşısını alır.