Bu gün ömrünün yarıdan çoxunu Güney Azərbaycan türklərinin dilinə və kimlik məsələsinə həsr etmiş böyük ziyalı Hüseyn Məhəmmədzadə Sədiq (Hüseyn Düzgün) Təbrizdə milli fəallar və sevənlərinin müşayiəti ilə son mənzilinə yola salındı. Güneylilər onu görkəmli alim, dünya şöhrətli həkim Doktor Cavad Heyətdən sonra ikinci böyükləri hesab edirdilər.

Qeyd edək ki, 23 avqust 2022-ci ildə əbədiyyətə qovuşan Hüseyn Məhəmmədzadə Sədiq 1945-ci ilin iyul ayında Təbrizdə anadan olub.

Hüseyn Düzgün təxəllüsü ilə yüzlərlə yazının müəllifi olan siyasi fəal, publisist, araşdırmaçı, yazıçı Dr. Sədiq İstanbul Universitetinin Türk dili və ədəbiyyatı fakültəsinin məzunu idi. Sonralar həmin Universitetin türk-fars-ərəb dilləri üzrə tətbiqi doktorluq dərəcəsini qazanan alim rejimin Güney Azərbaycandakı bütün qadağalarına baxmayaraq qeyri-rəsmi olaraq Tehran, Kərəc, Urmiya və Zəncan Universitetlərində Azərbaycan türkcəsini tədris edərək dilimizin unudulmaması uğrunda böyük əmək verib.

30-a yaxın kitabın müəllifi, 10-larla əsərin tərcüməçisi olan Hüseyn Məhəmmədzadə Sədiq Azərbaycan xalqının milli haqlarını hər zaman müdafiə etdiyinə görə daim təzyiqlərə və təqiblərə məruz qalıb.
Ruhu şad olsun!

"Güney Xəbərləri" Agentliyi