Təbrizdəki konsulluğumuzun qarşısında aksiya keçirilib

Azərbaycanın Təbrizdəki Baş Konsulluğunun binası qarşısında aksiya keçirilib. Aksiya iştirakçıları Azərbaycanın İsraildə səfirlik açmasına etirazlarını bildiriblər. Etirazçılar konsulluğun bağlanması tələbi ilə şüarlar səsləndirib, təxribatçı fikirlər irəli sürüblər. Nümayişçilərin kimliyi və aksiyanın hansı siyasi qrup tərəfindən təşkil olunması barədə məlumat verilməyib. Məlumata görə, İranın hüquq-mühafizə orqanları diplomatik nümayəndəliyin qarşısında keçirilən icazəsiz aksiyaya müdaxilə etməyib, seyirçi mövqedən çıxış edib. Bu isə ondan xəbər verir ki, Azərbaycanın Baş Konsulluğuna qarşı təxribat məqsədi daşıyan etirazlar hökumət qüvvələri tərəfindən təşkil olunub və bu səbəbdən polis aksiyaya göz yumub. Qeyd edək ki, martın 29-da İsraildə Azərbaycan səfirliyinin rəsmi açılış mərasimi keçirilib. Tədbirdə iştirak edən Azərbaycanın xarici işlər naziri Ceyhun Bayramov və İsrailin XİN başçısı Eli Kohen strateji əməkdaşlığın gücləndirilməsində diplomatik əlaqələrin mühüm rol oynadığını bildiriblər. Xatırladaq ki, 2022-ci ilin sonunda Milli Məclis Azərbaycanın İsraildə səfirliyinin təsis edilməsi haqqında qanun layihəsini qəbul edib. Noyabrın 26-da Prezident İlham Əliyev “Azərbaycan Respublikasının İsrail Dövlətində Səfirliyinin təsis edilməsi haqqında” qanunu təsdiqləyib. Prezident İlham Əliyevin yanvarın 11-də imzaladığı sərəncamı ilə Muxtar Məmmədov Azərbaycanın İsraildəki fövqəladə və səlahiyyətli səfir təyin edilib. M.Məmmədov bu il martın 26-da etimadnaməsini İsrail Prezidenti İsxak Hersoqa təqdim edib.