İctimai Şura polisin müdafiəsinə qalxdı - BƏYANAT

Daxili İşlər Nazirliyi yanında İctimai Şura bəyanat yayıb.
Bəyanatda bildirilib ki, bu gün Azərbaycan cinayətkarlığa qarşı mübarizə və əmin-amanlığın qorunması sahəsində ən uğurlu ölkələrdəndir. İctimai Şura polisin asayişin qorunmasındakı xidmətinə xüsusi diqqət çəkib.
Qeyd edilib ki, Azərbaycan polisi Birinci Qarabağ və 44 günlük Vətən Müharibəsində fədakarlıq göstərib. Daxili İşlər Nazirliyinin şəxsi heyətindən döyüşlərdə 66 nəfər şəhid olib, 346 hərbi qulluqçu yaralanıb, 4 nəfər “Vətən Müharibəsi Qəhrəmanı” adına layiq görülüb.
İctimai Şura bəyan edib ki, bəzi hallarda polisə qarşı haqsız, qərəzli, qeyri-obyektiv münasibətin şahidi oluruq.
“Polsin fəaliyyətinə kölgə salmaq üçün böhtan və şaiyələr yayılır, faktlar, məlumatlar təhrif edilir və bu formada ictimailəşdirilir. Daxili İşlər Nazirliyi yanında İctimai Şura bu cür halları qəti şəkildə pisləyir və qınayır. Eyni zamanda İctimai Şura ictimaiyyəti, medianı, vətəndaş cəmiyyətini, ictimai rəy liderlərini bu cür hallara qarşı barışmaz, sərt movqe tutmağa çağırır.
Bu günlərdə xidməti vəzifələrini yerinə yetirən zaman polis əməkdaşlarının həlak olması bütün cəmiyyətimizi sarsıtdı. Bir daha nümayiş olundu ki, polis əməkdaşları canları bahasına olsa da asayişi qoruyurlar və son ana qədər polis andına sadiq qalıb vəzifələrini yerinə yetirirlər. Bu nümunələr polis əməkdaşlarını qorumaq, onların xidmətini layiqincə qiymətləndirmək barədə əlavə tədbirlərə olan ehtiyacı bir daha diqqətə çatdırdı.
Daxili İşlər Nazirliyi yanında İctimai Şura xidməti vəzifələrini yerinə yetirən polis əməkdaşlarına qarşı müqavimət göstərilməsi, zor tətbiq edilməsi, hədə-qorxu gəlinməsi, yalan məlumatlar yayılması hallarına qarşı qanunvericliyin ən sərt formada tətbiqinə çağırır. Bu cür hüquqazidd əməllərə görə qanunverilciyin sərtləşdirilməsini vacib hesab edir və müvafiq dövlət orqanlarını bu istiqamətdə addımlar atmağa çağırır.
Daxili İşlər Nazirliyi yanında İctimai Şura polis əməkdaşlarının sosial müdafiəsinin gücləndirilməsi istiqamətində kompleks tədbirlərin görülməsini vacib sayır və hökuməti bu istiqamətdə atmağa çağırır”.