Tehranla “altılar” qrupu ölkələri arasında əldə edilmiş nüvə razılaşmasının şərtinə əsasən ötən gün dekabrın 28-də İranın 11.3 ton aşağı faizli zənginləşdirilmiş uranı Rusiyaya aparılıb.

Butov.az Virtualaz.org-a istinadən xəbər verir ki, bu barədə ABŞ dövlət katibi Con Kerrinin bəyanatında bildirilir.

“Mən bunu bildirməkdən şadam ki, İranın üzərinə götürdüyü mühüm öhdəliklərdən birinin yerinə yetirilməsi istiqamətində əhəmiyyətli irəliləyiş əldə olunub. İranın üzərinə götürdüyü öhdəlikləri yerinə yetirmək istiqamətində ən əhəmiyyətli addımlarından biri bu gün atılıb. İranın 11.3 ton zənginləşdirilmiş uranı gəmi ilə Rusiyaya daşınıb”-Con Kerri bildirib.

Con Kerrinin sözlərinə görə, İranın bu nüvə materialından imtina etməsi Tehranın nüvə silahı əldə etməsini təxirə salacaq. ABŞ dövlət katibi deyib ki, zənginləşdirilmiş uranın daşınması bir sıra kommersiya tranzaksiyaları və bir çox ölkələrin iştirakı ilə mümkün olub. İranla nüvə razılaşmasının iştirkçısı olan və bu ölkənin nüvə materiallarını öz ərazisində saxlamağı üzərinə götürən ölkə kimi Rusiya bu prosesdə mühüm rol oynayıb. Rusiya İranın zənginləşdirilmiş uranını öz ərazisinə daşıyaraq əvəzində bu ölkəyə təbii uran xammalı verib.

ABŞ dövlət katibi İranın zənginləşdirilmiş uranının Xəzər dənizi üzərindən Rusiyaya daşınmasında Qazaxıstan və Azərbaycanın da rolu olduğunu deyib. Kerrinin bildirdiyinə görə, Qazaxıstanın prosesdə rolu İrana müəyyən həcmdə təbii uran verməkdən ibarət idi. Habelə Qazaxıstan “altılar”la İran arasında danışıqların ilkin mərhələsində iştirak edib. “Mən bu gün Qazaxıstan XİN-in rəhbəri Erlan İdrisovla danışdım və bütün bu səylərə görə ona minnətdarlıq etdim. Azərbaycan da bu yükün Rusiyaya çatdırılmasında rol oynayıb”-Con Kerri bildirib.