Avtomobili avtopilot rejimində idarə edənlər cərimələnəcək

Son illərdə ölkəmizə xaricdən avtopilot rejimində çalışan bir sıra avtomobillər gətirilir. Bu rejim bir çox sürücülər üçün rahatlıq yaratsa da, avtomobilin tam avtomatik şəkildə, yəni sürücünün müdaxiləsi olmadan idarə olunması müəyyən suallar doğurur. Belə ki, sözügedən məsələ həm təhlükəsizlik, həm də hüquqi baxımdan ciddi müzakirə mövzusudur.
Hüquqşünas, nəqliyyat eksperti Ərşad Hüseynov bildirib ki, ilk növbədə qeyd etmək lazımdır ki, hazırda Azərbaycanda sükan arxasında sürücünün müdaxiləsi olmadan, tam avtonom rejimdə hərəkət edən avtomobillərin istifadəsi üçün zəruri infrastruktur mövcud deyil.
“Avtopilot sistemlərinin düzgün işləməsi üçün bütün yol nişanları, xətlər, svetoforların qarşısındakı xəttlər, yol ayrıcındakı işarələr və digər yol elementləri ideal vəziyyətdə olmalıdır. Avtomobil proqramlaşdırılmış şəkildə hərəkət edərkən, nişanlara uyğun dayanmalı, dönmə zolaqlarını düzgün təyin etməli, piyadalara və digər nəqliyyat vasitələrinə düzgün şəkildə yol verməlidir”.
Hüquqşünasın sözlərinə görə, hazırda ölkəmizdə bu tip dəqiq və kompleks infrastruktur mövcud olmadığından, avtopilot rejimində olan avtomobillərin sürücü müdaxiləsi olmadan istismarı həm praktiki, həm də təhlükəsizlik baxımından mümkünsüzdür:
“Belə şəraitdə avtomobilin hansı istiqamətə hərəkət etməli olduğunu və harada dayanmalı olduğunu düzgün müəyyənləşdirməsi çətinləşir ki, bu da həm sərnişinlərin, həm də digər yol hərəkəti iştirakçılarının həyatı üçün təhlükə yarada bilər”.
Ərşad Hüseynov həmçinin məsələyə hüquqi baxımdan da aydınlıq gətirib:
“Yol Hərəkəti Haqqında” Azərbaycan Respublikasının Qanununa əsasən, hər bir avtomobilin sükanı arxasında sürücü olmalı və o, nəqliyyat vasitəsinə nəzarət etməlidir. Qanun tələb edir ki, sürücü ən azı bir əli ilə sükanı tutmalı və idarəetməni itirməməlidir. Bu baxımdan sözügedən norma avtomobilin tam avtonom rejimdə, yəni sürücünün tamamilə müdaxiləsi olmadan idarə olunmasını qadağan edir”,- deyə o əlavə edib.