Təbrizin "Traxtur" futbol klubunda baş məşqçi dəyişikliyi olub. Fəraz Kamalvəndin istefası qəbul edilib.
Firuz Kərimi "Traxtur" futbol klubunun baş məşqçisi təyin olunub.
Firuz Kərimi bundan öncə də komandanın baş məşqçisi olumuşdu. Rəhbərlik Səudiyyə Ərəbistanının “Əl-Nəsr” komandası ilə görüş öncəsi yenidən tanınmış mütəxəssislə işləməyə qərar verib.
Qeyd edək ki, son vaxtlar "Traxtur" klubu böhran yaşayır. Əsas oyunçular komandadan ayrılıb və rəhbərliyin idarəçiliyinin yarıtmazlığını bildirən İdarə Heyəti ilə klubun sahibi arasında ixtilaflar ortaya çıxıb.
Sentyabrın 4-də "Traxtur" tərəfdarları 5-ci dəfə olaraq aksiya keçirib və kluba rəhbərliyin Məhəmmədrza Zunuzidən alınaraq Şərqi Azərbaycan Futbol Heyətinin səlahiyyətinə verilməsini tələb ediblər.
Onlar klub sahibinin fəaliyyətini tənqid edərək şəxsi mənafeyini klub maraqlarından üstün tutmaqda ittiham ediblər.
Məhəmmədrza Zunuzi isə mətbuata verdiyi açıqlamada bundan sonra klubun sahibi kimi fəaliyyət göstərməkdə maraqlı olmadığını və istefa verəcəyini bildirmişdi.
“Klubun fəaliyyəti üçün həm öz sərmayəmdən xərcləyir, həm də tənqid və söyüş eşidirəm”-deyə, M. Zunuzi son vaxtlar baş verən qalmaqallardan yorulduğunu qeyd etmişdi.
Hal-hazırda böhran yaşayan klubun 338 milyard tümən borcu var.
Buna görə hər hansı özəl və dövlət qurumu kluba hamiliyi öhdəsinə götürməkdən imtina edir.