Bu il oktyabrın 7-də Azərbaycan Gimnastika Federasiyasının (AGF) yenidən qurulmasının 20 ili tamam olur.

Butov.az Oxu.Az-a istinadən xəbər verir ki, bu məqsədlə ölkəmizdə idman gimnastikası üzrə keçiriən Dünya Kuboku zamanı yarış iştirakçılarına və tamaşaçılara AGF-in 20-ci ildönümünə həsr olunmuş yubiley nişanı və Azərbaycan gimnastikasının nailiyyətlərindən bəhs edən videoçarx nümayiş etdirilib.

Qeyd edək ki, AGF-in korporativ üslubuna uyğun hazırlanan yubiley nişanında bədii gimnastika aləti olan lentin “sıfır” rəqəmi işarəsi formasında olması ideyasından istifadə edilib. Burada qeyd olunan “20 il inkişafda” yazıları AGF-in 20 il ərzindəki uğur hekayəsini əks etdirir.

Videoçarx ölkəmizin Birinci vitse-prezidenti Mehriban Əliyevanın 2002-ci ildən federasiyaya rəhbərlik etdiyi 20 ilik müddət ərzində gimnastika sahəsində əldə olunan uğurlu inkişafdan və qazanılan yüksək nailiyyətlərdən bəhs edir.

Məhz Mehriban Əliyevanın rəhbərliyi altında həyata keçirilən uğurlu və səmərəli fəaliyyət nəticəsində Azərbaycanda idmanın bu növünün inkişaf mərhələsi başlayıb, beynəlxalq əlaqələr qurulub, yüksək nailiyyətlər qazanılıb, federasiya bütün tədbirlər üzrə dünyada ən fəal quruma çevrilib.